Ezequiel 48
48
Ta xich' tuch'el sbanomil jteclum yu'un ti jujuvoc' nitilulile
1“Ti sts'aquil ti oy ta yeloval yolon ti yolon xocon sloq'ueb c'ac'ale, ti lic batel ta muc' ta nab Mediterráneoe, laj stam batel ta yeloval ti Hetlone, ti Hamate, ti Hazar-enane. C'ot ta tsutsel ta sts'ac Damasco ta yeloval yolon ti yolon xocon sloq'ueb c'ac'al yu'un ti Hamate. Ti ta xlic ti sts'aquil ti oy ta yeloval sloq'ueb c'ac'ale, ti ta stam ech'el ta yeloval smaleb c'ac'ale, ta xc'ot ta yu'un Dan ti jsep osile. 2Ta xtal yu'un ti Asere, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe. 3Ta xtal yu'un ti Neftalie, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe. 4Ta xtal yu'un ti Manasese, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe. 5Ta xtal yu'un ti Efraine, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe. 6Ta xtal yu'un ti Rubene, ti ta xlic ti oy ta yeloval sloq'uel c'ac'ale, ti ta xc'ot ta xocon nabe. 7Ta xtal yu'un ti Judae, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe.
8“Ta sts'el sts'ac ti Judae, ti ta xlic ti oy ta yeloval sloq'ueb c'ac'ale, ti ta xc'ot ta xocon nabe, oy jsep osil ti ch'acbil com yich'oj o'lol yoxlajunebal (12.50) kilometro ti sjamleje. Jech snatil jech c'u cha'al yich'ojic ti jujuvoc' nitiluletique. Ta o'lol taj une, tey ta xcom ti ch'ulnae.
Ti osil c'otem ta sventa ti Diose
(Ez 45.1-6)
9“Ti jsep osil c'otem ta sventa Dios ti oy ta yutil banomile, yich'oj o'lol yoxlajunebal (12.50) kilometro ti snatile, lajuneb (10) kilometro ti sjamleje. 10Ta yutil jsep ti osile, chapanbil juteb ta sventa ta xtun yu'un ti paleetique. Ta yeloval yolon ti yolon xocon sloq'ueb c'ac'ale, xchi'uc ta yeloval yolon ti yac'ol xocon sloq'ueb c'ac'ale, o'lol yoxlajunebal (12.50) kilometro snatil. Ta yeloval sloq'ueb c'ac'ale, xchi'uc ta yeloval smaleb c'ac'ale, vo'ob (5) kilometro ti sjamleje. Ta o'lol ti osil taje, tey ta xcom xch'ulna ti Diose. 11Ti banomil taje ta xc'ot ta sventa paleetic ti ochemic ta yajtunel Dios snitilultac ti Sadoque, ti sbainojic stunelic cu'un ti mu'yuc sts'aclivanic ta spasel jech c'u cha'al laj spasic jlom israeletic ti laj xch'ac sbaic ta spasel bu stamojic batel cu'un jech c'u cha'al laj spasic ti levitaetique. 12Jech o xal un, ti banomil ti c'otem ta sventa Dios ta sts'el yosil ti levitaetique, oy yosil paleetic ti bu cajal sc'oplal c'oteme. 13Ta sts'el yosil ti paleetique, oy yosil ec ti levitaetique, o'lol yoxlajunebal (12.50) kilometro ti snatile, vo'ob (5) kilometro ti sjamleje. Ja'uc ti c'otem ta sventa ti Diose. Le'e, oy o'lol yoxlajunebal (12.50) kilometro ti snatile, lajuneb (10) kilometro ti sjamleje. 14Stuc no'ox banomil jun yutsil oy ta muc' ta lum. Mi jutebuc stac' chonel, mi jel xi, mi va' xi yan yajval, yu'un c'otem ta sventa ti Diose.
15“Ti o'lol yoxlajunebal (12.50) kilometro ti snatile, ti o'lol yoxibal (2.50) kilometro ti sjamlej comeme, colemal banomil xa. Xu' xnaquiic jnaclejetic, xchi'uc ta xtun ta yavil pulem yaxal sventa ta slo' ti chon bolometique. Ti jteclume oy ta o'lol yaxaltic 16ti smacoj ta scotol cha'mil xchi'uc o'lol yoxibal ciento (2,250) metro ta xchanjotale. 17Naca yaxaltic oy ta sjoyobal ti jteclume, ti yich'oj vo'ob yucvinic (125) metro sjamlej ta xchanjotale. 18Ta xocontac ti jteclum ta yeloval sloq'ueb c'ac'ale, ta smaleb c'ac'ale, oy jsep banomil ta sts'el ti bu c'otem ta sventa ti Diose, yich'oj vo'ob (5) kilometro xchanjotal. Ti banomil taje, yich'uc abtelanel, ti c'usitic xloc' x'ayan yu'un une, sventa ta stun ta slajesic ti buch'u ta x'abtejic ta jteclume. 19Ti ta x'abtejic ta jteclume, buch'uuc no'ox ipaluc mi ja' snitilul ti israeletique, yabtelanicuc ti banomil taje. 20Scotol ti banomil comem xae, tsacbil xa ta venta c'otem ta yu'un ti Diose, xchi'uc ti c'u yepal smacoj ti jteclume, oy o'lol yoxlajunebal (12.50) kilometro yich'oj ta xchanjotal.
Ti osil ta xc'ot ta yu'un ti ajvalile
(Ez 45.7-8)
21“Ti bu ta xc'ot ta sventa ti ajvalile, ti xcaltique, ja' ti c'u yepal oy sts'aquinoj sba xchi'uc ti bu ac'bil ta ventae, xchi'uc ti bu c'otem ta yu'un ti jteclum ti sts'aquinoj sba xchi'uc ti oy ta o'lol yoxlajunebal (12.50) kilometro sjamleje, ti quiil xbat ta yeloval smaleb c'ac'ale, ti ta xocon smaleb c'ac'ale, ti ta xc'ot ta smaleb c'ac'al ta ti' nabe, xrexto ajvalil unbi ti bu yelovtaoj sba xchi'uc ti bu ac'bil ta ventaele. Ta o'lol taj une, tey ta xcom ti ch'ulnae. 22Ti sts'aquinoj yosil ti levitaetique, yosil ti jteclume, yosil ti Judá xchi'uc yosil ti Benjamín ti bu c'alal sventainoj ti ajvalile.
Sts'aquic ti jvoc' nitiluletique
23“Ti yan jayvoc' nitiluletique, xi s'elan ta xich' ti yosilique:
Ti jsepe, ta xlic ta yeloval sloq'ueb c'ac'al, ta xc'ot c'alal to sti'il ti nabe, ja' ta xc'ot ta yu'un ti Benjamine. 24Ti jsepe, ta xlic ta yeloval sloq'ueb c'ac'al, ta xc'ot c'alal to sti'il nabe, ja' ta xc'ot ta yu'un ti Simeone. 25Ti jsepe, ta xlic ta yeloval sloq'ueb c'ac'al, ta xc'ot c'alal to sti'il nabe, ja' ta xc'ot ta yu'un ti Isacare. 26Ti jsepe, ta xlic ta yeloval sloq'ueb c'ac'al, ta xc'ot c'alal to sti'il nabe, ja' ta xc'ot ta yu'un ti Zabulone. 27Ti jsepe, ta xlic ta yeloval sloq'ueb c'ac'al, ta xc'ot c'alal to sti'il nabe, ja' ta xc'ot ta yu'un ti Gade.
28“Ta yeloval yolon ti yac'ol xocon sloq'ueb c'ac'al, sti'il sts'ac ti Gade, ti sts'aquile ta stam ech'el ta Tamar, ta x'ech' batel ta sat vo' ta Meriba-cades xchi'uc ta uc'um yu'un Egipto, c'alal to ta muc' ta nab Mediterráneoe.
29“Li'e, ti muc' ta lum une, ta xc'ot ta xrextoic banomilic ti jnaclejetic yu'un ti jujuvoc' nitiluletic yu'un ti Israele. Ta xach'aquic ti va'i s'elan taj une. Vu'un ta xcal mantal ti Ajvalilune.
Ochebal ti'naetic yu'un ti Jerusalene
30“Xi s'elan ti loq'uebal yu'un ti jteclume: Ta yeloval yolon ti yolon xocon sloq'ueb c'ac'ale, yich'oj cha'mil xchi'uc o'lol yoxibal ciento (2,250) metro ti bisbile, ta xich' sti'tac. 31Sbitac ti ti'naetic ta xich'e, xi' s'elane: ja' ti c'u s'elan sbiic jujuvoc' snitilul ti Israele: oxib ta yeloval yolon ti yolon xocon sloq'ueb c'ac'ale: ti'na yu'un Rubén ti june, ti'na yu'un Judá ti xchibale, ti'na yu'un Leví ti yoxibale. 32Ta yeloval sloq'ueb c'ac'ale, yich'oj cha'mil xchi'uc o'lol yoxibal ciento (2,250) metro ti bisbile, oxib ti'na ti xi s'elan sbie: ti'na yu'un José ti june, ti'na yu'un Benjamín ti xchibale, ti'na yu'un Dan ti yoxibale. 33Ta yeloval yolon ti yac'ol xocon sloq'ueb c'ac'ale, yich'oj cha'mil xchi'uc o'lol yoxibal ciento (2,250) metro ti bisbile, yan oxib ti'na ti xi s'elan sbie: ti'na yu'un Simeón ti june, ti'na yu'un Isacar ti xchibale, ti'na yu'un Zabulón ti yoxibale. 34Ta yeloval smaleb c'ac'ale, yich'oj cha'mil xchi'uc o'lol yoxibal ciento (2,250) metro ti bisbile, yan oxib ti'na ti xi s'elan sbie: ti'na yu'un Gad ti june, ti'na yu'un Aser ti xchibale, ti'na yu'un Neftali ti yoxibale. 35Smocal ti jteclum ta joyobe, yich'oj balunmil (9,000) metro sbisol. ‘Li' oy ma' ti Diose’,#Ap 21.12-13. xi sbi ta xich' liquel ti jteclume”, xi laj yal ti Dios ti scotol xu' yu'une.
Currently Selected:
Ezequiel 48: TZC00
Highlight
Copy
Compare
Share
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000
