Lûm 9
9
Zə̀kìy kə̀ sày kə aghee Islàel nə̀ ghu ba də̀ aghee we
1Ayiə yə mə dzîy â ghà yəə wè Kə̀litò à də̀ ayiə àsoŋə̀ yìy, mə guw dzə̀ wày, mə kwu anə fôŋ yam nə̀ Zwàykə̀zwekiy kwu ŋwô nə̀ ayiə yə mə dzîy a də àsoŋə̀ yìy. 2Mə ŋge mwe ŋwò, fòŋ ŋge fyimə soʼò nəniy miə. 3Mə ŋge mwe ŋwò bòʼ aghù yam, aghû yə̀ mə fyi fwumi tsə nəniy nə̀ ghu. Bəə i mə̀ də ani fày ghu, Mə mə dzây nə̀ Zə̀kiy zəŋi tsə nə̀ mə kə kâm təm dòʼò fwumi dzə̀ nə̀ Kə̀litò. 4Ghu də aghee Islàel də̀ sòʼò a ghû yə̀ Zə̀kìy kə kwu sây na nəniy. Zə̀kìy mə zəŋi nə̀ ghu doʼò tsə awa ighe, zəŋi tsə sòʼò nə̀ ghu kəli tsə nə̀ ghe də wù ùsòŋə̀ wìy. Ù ma nyi ŋkà mìy nə̀ ghu. U nyə̀ tsə sòʼò ghu nə̀ ùlàŋ wìy. Ghu fwulə̀ Kə̀zə̀ anə yiə tsitsi yiy. Ghu mə kəli sòʼò ayiə yə Zə̀kìy kə tɛb na nəniy. 5Zə̀kìy kə kwu sày kə nə̀ tě ghu, zəŋi tsə nə̀ ghu doʼò tsə aghê àsoŋə̀ yìy. Kə̀litò anə uwè u wû mbyi, kə də̀ sòʼò wè Islàel. A kwu ani nyə̀ Zə̀kə̀ kə kwu nəniy daʼa kiy anə ufyiə udzə̀m nə̀ ukali wiy anə nsòŋə̀ in dzə̀m. I doʼò kə ghii.
6Mə dzîy dzə̀ wày nə̀ Zə̀kìy mə bvwə̀ màʼà tɛb kə ù kə tɛb na nəniy, aŋwòə à wày dzə aghee Islàel àdzə̀m ghu də nəniy aghee Kəzə̀. 7À wày soʼo awi wa Ablàhâm à dzə̀m ghu də nəniy awa Kəzə̀ yìy, Zə̀kìy kə dzày tsə awò Ablàhâm nə̀, “Awi wa yə mə kə tɛb na nəniy â wò, wò ni kyilə ghu abidzəmə̀ wa niə̀ Ayzìk.” 8Ì yu dè tsə nə̀ awa yə ghu byikə bə̂ anə ayiə yə aghee byikə nəniy ate anə mbyi à wày dzə awa Kəzə̀. Akwuni bû àwa yə ghu byikə nəniy anə yiə yə Zə̀kìy tɛb na nəniy, ghu ba də̀ yəə à də̀ awi wa Ablàhâm. 9Tɛb kə ghà kə̀ kə də̌ nə̀, “Anə ndzòʼò sòŋə fə nə̀ ŋəm kìy, mə kî dzwəŋə bə̀ nə̀ wiy yiə̀, Sèla, kwu wà ùŋəmə̀.”
10À kaʼi wày dzə ìyiy, I də sòʼo nə̀ Lèbekà kə byi bə̀ àwi ndzə̀ nə̀ Ayzìk ù də nəniy mòʼ anə nə̀ tě ŋgàŋ asəsə yiy. 11-12Mwe ə̀ mbyi kə dzày na â Lèbekà a we nə, “Wa niə̀ u nɛmə nî fàʼà a təŋə ù sə̀ wə̀.” U kə dzày nə̀ Lèbekà kamə byi nəway awi ndzə̀ yə̀, à kə də̀ sòʼo nə̀ awi ndzə̀ yə̀ kamə zəŋi dzə̂ iyiə ìbɛbə yiy moo ìdzoŋə̀ yìy. Zə̀kìy kə ghii dzày ani dè tsə nə̀ ghe sî kə àghù yə̀ ghe liə nəniy ani sày, à wày dzə anə fàʼ kə̀ ghu fâʼ nəniy. 13Anə yiə yə ŋwàʼà k-a-zə̀ kìy dzîy nəniy nə̀, “Mə kə liə ŋwoə Dzàkôb, mə kwunə bà Isàw.”
14Ŋgà də ani dzày tsə nə̀ indiə? A də ŋwô ani dzày tsə nə̀ Zə̀kìy saʼa dzwàbə̀ wày ə̀? Hǎy! A way dzə ani dzày ghii. 15Zə̀kìy kə dzày tsə awò Musîs a we nə, “Mə kî kwoʼo ŋwò nə̀ mwuli kiy azoŋə̀ wù wə̀ mə liə nəniy ani kwoʼ, mə kî dè sòʼò fòŋə̀ ìdzòŋə̀ yìy awò wù wə̀ mə liə nəniy ani dè fòŋə̀ ìdzòŋə̀ yìy â we.” 16Ayiə dzə̀mə̀ zoʼo dòʼo kə anə mwùli k-a-zə̀ kə̀ kwoʼo kiy àwày dzə anə yiə yə wù liə nəniy moo ù zəŋə yə̂ nəniy. 17I twâ dòʼò anə ŋwàʼà k-a-zə̀ nə̀ Zə̀kìy kə dzìy awò dòŋ kə aghè Idzìp a we nə̀ “Mə kə zəŋi tsə wô nə̀ wò doʼò tsə kədòŋ tə̀ wò dê daʼa kam, wò zəŋi tsə sòʼò nə̀ izəd yam yiy foŋ tsîy yə̂ anə mbyi dzə̀m.” 18Yəə I də nəniy ghi, Zə̀kìy kwoʼo nə̀ mwuli kiy azoŋə̀ wù wə̀ ù liə nəniy ani kwoʼ nə̀ mwuli kiy azoŋə we. Ù kwulə nia sòʼò fòŋ ə̀ wù wə̀ ù liə nəniy nə̀ ù kəli kwuli kə fôŋ.
Zə̀kìy saʼa wiy àghù, kwoʼo sòʼò nə̀ mwuli kiy
19Wè lìy nyə̀ ni kwuni bəbə nə̀ “Zə̀kìy də mə̀yə ani dzày nə̀ ŋgà mə zəŋi bɛb ə? À də̌ ndiə ù də ani twe ani zəŋi ayiə yə Zə̀kìy liə ə? 20Wù mbyi yəə à də wô, wò də̌ ndiə ani səay Kəzə̀ ə?” Ntwà ìtsaʼ də mə̀yə ani bəb yə̀ â wù wə̀ ù bwam nəniy we a we nə, “Wò mìə̀ ghii bwam na anə iyîkìə̀?” 21Wù wə̀ ù bwamə nəniy ntwà tìy u kwu ŋwô daʼa kiy ani nìy kə itsaʼ ù bwam ndzòʼò ntwà yə̀ ù liə nəniy. Ù də ani nìy kə itsaʼ ù bwam kə tə ntwà ìbè ate, ù na tsə ntwà ìmòʼ ani faʼa ayiə àsoŋə̀ yìy ate, ù na tsə ìliy ani faʼa ate ntsukə indzə̀m.
22Ayiə yə Zə̀kìy zəŋi nəniy, a də sòʼò ighəd yəə à də̀ ayiə wù wə̀ ù bwamə̀ tə̀ ntwà wə̀. Zə̀kìy kə liə ani dè tsə fòŋə̀ we ìŋəmə̀ yìy, ani zəŋi tsə tə̀ aghê kəli tsə ndzòʼò daʼa kə ù kwu nəniy. Ù kwuni ŋge kwè fòŋ nə̀ àghù yə̀ ghu kə zəŋi nə̀ fòŋ ŋə̀m we anə ndaŋ k-a-ghab. À kə yù də̀ aghû yə̀ Zə̀kìy kə kwu ani byɛbi màʼà. 23Zə̀kìy kə kwè fòŋ lyimə sòʼò ani dè tsə nə̀ ghe də wù ùsòŋə̀ ùdzòŋə̀ wìy. Ù kə liə ani dè mwuli kə̀ kwoʼo kiy awò àghù yə̀ ù kə sây na nəniy. Ù maa byay na zìì bə̀ aghû yə̀ ghu kwu ani mùə̀ nə̀ we anə lòʼo kə̀ dzoŋə̀ kə̀ ù muə nəniy ate. 24Ŋgà də anə aghù yə̀ Zə̀kìy sây na nəniy nə̀ a dòʼò àghě we. Ù kə kə̀ kaʼi sây fyi dzə̂ anə ghě Dzû yìy, ù mə sày sòʼò aghê à liy anə ghù yə̀ ghu də wày aghee Dzû yìy. 25Ù kə dzày tsə anə ŋwàʼà kə Hosìyà nə̀,
“Aghû yə̀ ghu kə də wày aghû yamə,
mə ki tyoŋə tsə ghu nə̀ à də̀ ‘Aghû yam.’
Inaʼ yə mə kə də liə way, mə ki dzây tsə a ghu nə, ‘Mə liə ŋwò gha.’
26Loʼo kə mə kə dzây nəniy ate a ghu nə, ‘Ghà way dzə aghû yam’
À nì bvami də̀ kə anə lòʼo kə ghà kə̀ mə nî tyoŋə tsə ghu nə̀ ‘Awa Zə̀kə̀ kə muə nəniy.’ ”
27Ìzayà kə nàʼà na awò aghee Islàel nə̀, “Yəə awa Islàel boʼò dûw kə yəə à də̀ kə̀sisi anə dzwî, Zə̀kìy nî kwuni bii fyiə kə fə̀sə anə uzə u ghu. 28Mwe ə̀ Mbyi nî zə̀àŋə̀ fàʼà ŋwò ayiə yə ù dzày na nəniy nə̀ ghe nî fàʼà ŋwò anə mbyi anə kə̀mə̀ fəsòŋə.” 29I bvami də̀ kə ighəd yəə Ìzayà kə dzây fwuli tsə nəniy nə̀, “Mwe ə mbyi wə ù kwu nəniy daʼa kiy anə ufyiə udzə̀m, bəə ù kə də kə̀ kwoʼ nəway nə̀ mwuli kiy ani nasə awi wa ŋgàŋ, Zə̀kìy kə dziy byɛbə myàʼà ŋwò ŋgaŋ yəə ù kə byɛbi maʼà nəniy aghee Sodòm nə̀, Gòmolà.”
Aghee Islàel yìy kə kə̀ bɛmə ntwùm ìdzoŋə̀ yìy
30Ŋgà də ani dzày tsə nə̀ìndiə? Aghû yə̀ ghu də wày aghee Dzû yìy, ghu kə də khu yə̀ wày dzəd ani dòʼò tsə tsitsi a kə̀lə̀ Kə̀zə̀, ghu mə kwuni dòʼò tsitsi anə sə k-a-zə̀ bòʼ ìbɛmə i ghu azoŋə̀ Yesù. 31Aghee Dzû yə̀ ghu kə kwuni khu dzəd ani dòʼò tsə tsitsi nə̀ Zə̀kìy nə̀ ghu dzwumə̀ yə̀ ùlàŋ, ghu mə bvə̀ tesə ə ani dòʼò tsə tsitsi anə sə k-a-zə̀. 32Ghu kə bvə̀ tesə iyîkìə̀? Ghu kə bvə̀ tesə aŋwòə ghu kə kə̀ na dzə̂ isə yiy ani bɛmə awò Kə̀litò. Ghu kə fə̀d kwu ibɛmə anə yiə yə ghu kə zəŋə tsə̂. Ghu kə tyàŋì bvə̀ yə̀ anə itay yə i zəŋə nəniy nə̀ aghê bvə̂ 33Ighəd yəə ghu twâ na anə ŋwàʼà k-a-zə̀ nə̀,
“Kòʼo, mə kî nia tsə ìtay anə inaʼ i Zayòn,
itay yə i zəŋə nəniy nə̀ aghê tyaŋì bvə̂
nə̀ na kə kə zəŋə ghu nə̀ ghu bvə̂
Wù wə̀ ù kwuni bɛmə dzə̂ â we, ù nì kəli dzə̀ wày tuw kə̀ dələ kiy.”
Currently Selected:
Lûm 9: isu
Highlight
Share
Compare
Copy
Want to have your highlights saved across all your devices? Sign up or sign in
© CABTAL 2023
