Lûm 10

1Awizə̂ yamə, mə mbvuŋə̀ anə fôŋ yam, gwùŋə̀ sòʼò awò Zə̀kìy nə̀ ghu bii fyi aghee Islàel. 2Mə də ani dzày nə̀ ghu liə ŋwoə Zə̀kìy, ghu kwuni zuw kyilə dzə̀ wǎy dzəd yə ì də nəniy tsitsi ani fwùlì Kə̀zə̀ ate. 3Ghu kwu dzə̀ way dzəd yə Zə̀kìy zəŋə nə̀ aghê doʼò tsə tsitsi ate anə sə kə we. Ghu fə̂d kaw yə̀ dzə̀d ì ŋwò yìy ani dòʼò tsə tsitsi anə sə k-a-zə̀. À yù də̀ ighe ghu kə də kə̀ bvami nəway iwee yiy ani dzwùmì yə̀ dzəd yə Zə̀kìy zəŋə nəniy nə aghê doʼò tsə tsitsi. 4Fàʼ kə̀ Kə̀litò fàʼ nəniy kə mə zəŋi nə̀ lâŋ kìy kə kâm kəli dzə̌ fàʼ kìy. I dê tsə nə̀ wù wə̀ Zə̀kìy nîy nə̀ ù də̀ tsitsi, à də̌ wù wə̀ ù bɛmə nəniy awò Yesù.

Wèlìy wày dzə Zə̀kìy də wày ani bii fyi we

5Musîs kə twà na kwùmə̀ yə̀ nə̀ ayiə yə wù də ani doʼò tsitsi ate anə sə k-a-zə̀, ù twà dzày tsə nə̀, “Wù wə̀ ù na dzə̂ lâŋ kìy ù kì mùə̀ ŋwò.” 6I kwuni twà dòʼò anə ŋwàʼà k-a-zə̀ kwùmə̀ yə̀ nə̀ àyiə yə wù də ani dòʼò tsitsi ate anə sə k-a-zə̀ nə̀, “Aghû yə̀ ghu kəli tsə ibɛmə yiy awò Zə̀kìy, ghu nî bəb dzə̀ anə fòŋ tə ghu nə̀, ‘À kì kwoʼ ndiə an-a-vələ ani zù nìy tswi bə Kə̀litò ə?’ 7Moo wò də̀ ani bəbə anə fôŋ yiə̀ nə̀, ‘À kì zè ndìə̀ anə inaʼ i pfə ani zù zɛ̀mə̀ ŋwò bə̀ Kə̀litò ə?’ ” 8Ŋwàʼà k-a-zə̀ kìy dzîy nə̀, “Ntwùm ə̀ Kə̀zə̀ də̀ dzəŋi kə nə̀ ghà, i də̀ anə adzwə ghii, də̀ sòʼò anə fòŋ təli.” Ntwùm ìghè yə̀ də̌ nə̀ aghê kwu ani bɛmə kə â Yesù. À yù də̌ ntwùm ìghè yə̀ ghè niʼà nəniy. 9Abu wò dzày fyi bə̂ nə̀ idzwə yiə̀ yìy nə̀ Yesù də̀ Mwe ə̀ mbyi, bɛmə kə sòʼò anə fôŋ yiə̀ nə̀ Zə̀kìy maa we zɛmə̀ ŋwò dzwoŋi anə ipfə, Zə̀kìy ki bii fyi wô. 10À də̀ ibɛmə yə̀ wò kwu nəniy anə fôŋ yiə̀ i zəŋə nəniy nə̀ Zə̀kìy zəŋi nə̀ wò doʼò tsə tsitsi anə səkə we. Zə̀kìy bii fyiə sòʼò wù abu ù dzày fyi bə̂ nə̀ idzwə iwe yiy nə̀ ghe bɛmə ŋwô â Kə̀litò. 11Ŋwàʼà k-a-zə̀ kìy dziy nə̀, “Wu wə̀ ù tsəb bɛmə dzə̂ awò Zə̀kìy, ù nì kəli dzə̀ wày tuw kə̀ dələ kiy.” 12Abu wù də kə wè Dzû, moo ù də way wè Dzû, Zə̀kìy də Mwe ə̀ Mbyi awò àghè dzə̀m. Ù kwu sòʼo fòŋə ì dzòŋə̀ yìy azoŋə àghù yə̀ à dzə̀m ghu ŋwa yə̂ nəniy ifày yìy awò we. 13Aghû yə̀ à dzə̀m ghu toŋə tsə nəniy Mwe ə̀ mbyi nə̀ ù fày ghu, ù kìy bii fyiə ŋwòə ghu.

14Ghu kwuni də̌ mə̀yiə ani twoŋə yə̀ we nə̀ ù bù fày ghu nə̀ ghu we kə̀ bɛmə nəway ə? Moo, ghu də mə̀yiə ani bɛmə yə̀ awò we nə̀ ghu kə̀ zuw nəway ntwùm ə̀ we ə? Ghu də mə̀yiə ani zuw ntwumə̀ we nə̀ wù lìy kamə naʼà nə way ntwùmə ì ghè yə̀ awò ghu ə? 15Wù ki kwuni zè nìʼà məyiə ntwùm ìghè yə̀ nə̀ wù kamə twum fyi we nə̀ ù zù nàʼà ə? Ŋwàʼà k-a-zə̀ kìy dziy nə̀, “I ŋge dzwàbə ŋwò abu aghê bû nəniy ani bù nàʼà ntwùm ìdzòŋə̀ yìy!” 16À kwuni wày ma dzə aghê Islàel àdzə̀m, ghu kə bɛmə dzə̂ nəniy ntwùm ìdzòŋə̀ yə̀. Wè ntwùm ə̀ Kə̀zə̀, Ìzayà maa dzây nə̀, “A Mwe ə̀ mbyi, à də̌ ndiə ù bɛmə dzəə ntwùm ə̀ ŋgàŋ ə?” 17Aghê kyilə tsə ìbɛmə abu ghu zuw tsə nəniy ntwùm ə̀ Kə̀zə̀. Aghê zuw tsə ntwùm ə̀ Kə̀zə̀ abu wù lìy nàʼà tsə nəniy ntwùm ìghè yə̀ awò ghu.

18Mə kwuni bəbə nə̀, “À ba də̌ ìsoŋə̀ yìy nə̀ aghee Dzû kə kə̀ zuw nə way ntwum yə ə̀?” À wày dzə aghi, aŋwòə ŋwàʼa k-a-zə̀ kìy dzîy nə̀,

“Dzə̂ tə ghù yə̀ ghu kə niʼà nəniy ntwùm ə̀ Kə̀zə̀ mə foŋ tsìy kpe yə̀ awò àghè dzə̀m anə mbyi

Ayiə yə ghu kə niʼà, a foŋ tsìy kpe yə̀ mbyi idzə̀m.”

19Mə kamə̀ bəbə soʼò nə̀, aghee Islàel kə kə̀ zuw kəli ə̀? Ìny ghu kə kə̀ zuw kəli dzə̂ aŋwòə Musîs maa twà na nə̀ Zə̀kìy kə dzày tsə a ghu nə,

“Mə kî zəŋə tsə aghee Islàel ghu ki kaʼ ani ghòʼ

àghù yə̀ ghu də wày fyiə kə̀li kiy.

Mə ki zəŋi tsə ghu tə̀ fôŋ tìy ki ŋəmə ghu

azoŋə̀ àghù yə̀ ghu lyaʼà nəniy.”

20Ìzayà kə kwu fòŋ ì taw yìy. U dzày tsə nə̀,

“Zə̀kiy dzîy nə̀, ‘Aghû yə̀ ghu kə də khu way miə, ghu kaw kòʼ mìə̀.

Mə kə dè ùwe nam awò àghù yə̀ ghu kə də bəbə kòʼò wày miə.’ ”

21Ìzayà kə kwuni dzày sòʼò ayiə kwùmə̀ yə̀ nə̀ aghee Islàel yìy nə̀, “Zə̀kiy kə dzày tsə nə̀, ‘Mə fwiy na awo yam anə ndaŋ k-a-ghab nə̀ aghû yamə nə̀ dzwəŋə bə̂ akə̀lə̀ mìə̀, ghu kwuni ŋwunə, taw sòʼò nə̀ ùtuw ani bù.’ ”

Currently Selected:

Lûm 10: isu

Highlight

Compare

Copy