Lûm 8

Imuə̀ anə daʼa kə Zwàykə̀zwekiy

1Abu wù də nəniy anə fyiə kəmòʼ nə̀ Yesù Kə̀litò, Zə̀kìy way ani kàm saʼ wiy dzə̀ we, 2Zwàykə̀zwekiy ki nyiə̀ bə̂ wò nə̀ ìmùə̀ yìy i ŋwô bə̂ nəniy awò Yesù Kə̀litò, kə fây ŋwô fyi soʼò wò anə daʼa kə ibɛb yiy kwu nəniy azoŋə̀ wò nə̀ ìpfə yiy. 3Ulâŋ wìy kə wày dzə ani fày fyi ŋgaŋ aŋwòə, anə iwè i ŋgàŋ yəə à də̀ aghee mbyi, a kə lay ŋwò. Zə̀kìy kə bii fyi ŋgaŋ anə sòŋə fə ù kə twum bə̂ nəniy Wà we anə uwè u wû mbyi yəə à də̀ ŋgaŋ. Zə̀kìy kə twum bə̀ we nə̀ ù bù saʼ wiy ibɛb yə i kə kwu nəniy daʼa kiy azoŋə̀ àghě mbyi yiy. 4Zə̀kìy kə zəŋi ghii nə̀ ŋgàŋ yə a kə muə nəniy anə yiə yə Zwàykə̀zwekiy liə nəniy, nə̀ ŋgà muə way anə yiə yə fôŋ tə ŋgàŋ tìy dzîy nəniy, tə̀ ŋgǎ nì də ani zəŋi ayiə yə lâŋ kìy liə nəniy àdzə̀m nə̀ a də tsitsi. 5Aghû yə̀ ghu muə anə yiə yə iwee i ghu yiy dzìy nəniy, môʼ tə ghu tiy də təŋ kə anə yiə yə iwee i ghu yiy liə. Aghû yə̀ ghu muə nəniy anə yiə yə Zwàykə̀zwekiy dzîy nəniy â ghu, ghu gaʼ na sòʼò fòŋ tə ghu anə ayiə Zwàykə̀zwe kiy liə nəniy. 6Abu wò mòʼò təŋə kə ayiə yə uwee niə wìy liə nəniy, wò kì pfə ŋwò. Abu wò kwuni moʼò təŋə kə ayiə yə Zwàykə̀zwekiy liə nəniy, wò kî ndzə̀m mùə̀, wò kəli soʼò ìbvay. 7Wò də̌ wù wə̀ ù dzwə nə̀ Zə̀kìy abu wò mòʼò təŋə kə ayiə yə uwee uwe wiy liə nəniy. Ndzòʼò wù ghè wə̀ zuw way ayiə yə lâŋ kìy dzîy. Ù ndzə̀m wày dzə ani zuw ayiə yə lâŋ kìy dzîy 8Aghû yə̀ ghu faʼà nəniy ayiə yə iwee i ghu yiy liə, ghu way dzə ani zəŋi ayiə yə fòŋə̀ Kə̀zə̀ də ani dzwàb ate.

9Ghà zəŋə dzə̀ wày ayiə yə iwee nəli yiy liə nə̀ ghà zəŋi. Ghà kwuni zəŋə àyiə yə Zwàykə̀zwekiy dzîy bə̂ nə̀ ghà zəŋi aŋwòə Zwàykə̀zwekiy də azoŋə̀ ghà. Abu wù də kwu way Zwày kə Kə̀litò kìy, ù ghi wày dzə wè Kə̀litò. 10Abu Kə̀litò kwuni muə azoŋə̀ ghà, i dê tsə nə̀ ghà də utaw aŋwòə Kə̀litò mə zəŋi nə̀ ghà doʼò tsə tsitsi anə sə k-a-zə̀ yəə i də kə nə̀ iwee nəli yiy kwu ani pfə bòʼ àyiə ghi àbɛbə yiy. 11Bəə Zwày k-a-zə̀ kə̀ kə kə zɛmə̀ ŋwò kə nəniy Yesù anə ipfə muə nəniy azoŋə̀ wò, i dê tsə nə̀ wù wə̀ ù kə zɛmə̀ ŋwò bə̂ nəniy Yesù anə ipfə, ù kì nyìə̀ sòʼò ìmùə̀ anə uwè niə̀ wə̀ ù də mùə̀ tsà wày aŋwòə Zwày kə we kiy də azoŋə̀ wò.

12Yəə i də nəniy ghii awizə̂ yamə, ŋgà kwu kəndàŋ ani mùə̀ anə yiə yə Zwàykə̀zwekiy liə, à wày dzə anə yiə yə iwee i ŋgàŋ yìy liə nəniy. 13Abu ghè muə nəniy anə yiə yə iwee nəli yiy liə nəniy, ghà ki pfə kə. Abu ghè kwuni muə nəniy anə yiə yə Zwàykə̀zwekiy dzîy nəniy, nyəli màʼà yə̀ sòʼò àyiə àbɛbə yiy, ghà kî mùə̀ ŋwò. 14Aghû yə̀ ghu zuw yə̂ nəniy â Zwàykə̀zwekiy ghu də awa Kəzə̀. 15Zwàykə̀zwekiy zəŋə dzə̀ wày nə̀ ŋgà doʼò ùkwə̀d wə̀ u tsəŋə nəniy Zə̀kìy. Zwàykə̀zwekiy kwuni zəŋə tsə nə̀ ŋgà dòʼò tsə awa Kəzə̀, ŋgà ə tyoŋə sòʼò we dzìy tsə nə̀, “Wò də̌ Təli wam.” 16Zwàykə̀zwekiy byemə dzəŋə kə nə̀ fòŋ tə ŋgàŋ tìy nə̀ ŋgà kəli tsə nə̀ ŋgà də awa Kəzə̀. 17Yəə ŋgà dəə dzə awa kəzə̀ yìy, ŋgà nî kyilə ŋwǒ lwì kə ù na nəniy awò aghě we yìy, yəə ŋgà zôŋ dòʼò nə̀ Kə̀litò ŋgà nî kyilə sòʼò ŋwò namə kə Zə̀kìy tɛb na awò we aŋwòə abu ŋgà fii fwumi nə̀ we ŋgà ni kəli sòʼo ndzòʼo fyiə kə̀ soŋə̀ kə̀ ù nì kyilə nəniy.

Zə̀kìy mə byay na ufyiə ù dzoŋə̀ wìy isə

18Mə mòʼo nə̀ ifii yə ŋgà fyaʼa nəniy nyiə i kə̀ ndwâm kwoʼ kpe dzə̂ nəway ŋkwiʼi mə Zə̀kìy nî dê nəniy awò ŋgàŋ. 19Ufyiə wə ùdzə̀m Zə̀kìy kə zəŋi naa fə anə mbyi u nyìə̀ lyimə təŋə kə nə̀ fòŋ tə̀ swə tiy ani kòʼ soŋə fə Zə̀kìy nî ba dê fyiə bə̂ ndzòʼò aghû yə̀ ghu də aghě we yiy. 20Zə̀kìy kə tsə̀m bə̀ nə̀ ufyiə wə ghe zəŋi nəniy nə̀ u kə kəli dzə̂ fàʼ kìy. À kə wày dzə ufyiə u ghè wə̀ u kə tsə̂m nəniy ani dòʼò nə̀ ghu kwu way fàʼ kìy. Zə̀kìy kə ghii zəŋi aŋwòə ù kə mòʼò yə̀ soŋə fə̀ dzoŋə̀ fə̀ fə də nəniy isə. 21Zə̀kìy nî fìì fyiə ŋwò bə̀ ŋwò ufyiə wə anə utswə̀d, u fə̂ ni fwây. Ufyiə u ghè wə̀ ni kwu bwôʼ kìy ani dwiʼi anə ufyiə ùsoŋə̀ wə̀ u ŋwô bə̂ â Zə̀kìy anə yiə yə awa Kəzə̀ yìy də soʼo. 22A kwu ŋwô nə̀ ufyiə wə ù dzə̀m Zə̀kìy kə zəŋi na u muə tsə̀ kə ani təm kə dzwà, zuw sòʼò ifwabi bù kwùm tsə nyiə yəə à də̌ wìyəŋi wə ù dziy byi. 23Zwàykə̀zwekiy zəŋə tsə nə̀ ŋgà ə kəli tsə fyiə kə ŋgà kî bè dyoʼò nəniy ghe kiy isə. A kwuni bû nyiə ŋgà təmə kə kə̀dzwà anə fòŋ tə ŋgàŋ, lyimə kə nə̀ Zə̀kìy dê bə̂ nə̀ ŋgà də awa we.#8.23 Ùŋwàʼà ùliy wiy kwu dzə way kə̂m kə Dè bə̀ nə̀ ŋgà doʼò àwa we Ì yû dè tsə nə̀ ù nì fìì fyiə ŋwò iwee i ŋgàŋ yìy anə utswə̀d u ŋgàŋ, ù nyə̀ ŋgàŋ nə̀ ìwee ìfyiə yiy. 24Ani nìy ŋwò bə̀ yə Zə̀kìy kə bii fyi nəniy ŋgaŋ, ŋgà tsə̂ŋ kwu kə imôʼ nə̀ ŋgà nî kyilə ŋwò fyiə kə Zə̀kìy kə tɛb na nəniy â ŋgàŋ. Ŋgà ki də kàm kwu way imôʼ ìliy yiy aŋwòə wù kàm wày dzə ani kwu kə imôʼ yìy anə fyiə kə ù kəli dzə̂. 25A kwuni kwu imôʼ anə fyiə kə a də kamə kôʼ nəway. Ŋgà kwê kə tə̀fòŋ lyimə kə̂ fyiə kə ghè kə̀.

26À də̀ sòʼò ighəd, Zwàykə̀zwekiy fîy ŋgàŋ aŋwòə iwee i ŋgàŋ yìy lay ŋwò. Ŋgà kwu dzə̀ way iyiə yə ŋgà kwu nəniy ani gwùŋì ate. Zwàykə̀zwekiy kwuni fììy kə ŋgaŋ ani ŋgwùŋì yə̀ ìgwùŋi ŋgàŋ â Zə̀kìy anə dzəd yə wù də wày dzə ani dzày. 27Zə̀kìy koʼò ŋwò ayiə yə a də nəniy anə fòŋ tə ŋgàŋ. Ù kwu sòʼò ŋwô imôʼ i Zwàykə̀zwekiy aŋwòə Zwàykə̀zwekiy gwuŋə̀ nyìə̀ yə̀ ìgwùŋi ŋgàŋ awò Zə̀kìy anə yiə yə Zə̀kìy liə nəniy.

28Ŋgà kwu ŋwô nə̀ Zə̀kìy faʼà ayiə dzə̀m nə̀ a ki zee kədzôŋ#8.28 Ùŋwàʼà ù liy wiy kwu nə̀Ayiə dzɛ̀mə̀ zê kədzôŋ nə̀ àghù yə̀ ghu liə nəniy Zə̀kìy. Ùŋwàʼà ù liy wiy kwuni kwu nə̀ Zə̀kìy fàʼa nə̀ ayiə si bwîy kədzôŋ nə̀ àghù yə̀ ghu liə nəniy we awò aghù yə̀ ghu liə nəniy we. À də̀ aghû yə̀ ù sày na nəniy ghu nə̀ ghu doʼò fyiə kə ù liə nəniy. 29Aghû yə̀ Zə̀kìy kə kwu sây na dzə̂ nə̀ à də̀ aghee we, u zəŋi tsə nə̀ ghu bû doʼò yəə à də̀ Wà we anə umwàmə, ani zəŋi tsə nə̀ Wà we bû doʼò tsə kəsə anə fwumi kə ghù yə̀ ghu bɛmə nəniy awò Wà we. 30Aghû yə̀ Zə̀kìy kə zəŋi nə̀ ghu bû doʼò yəə à də̌ Wà we anə umwàmə, u dzày tsə nə̀ ghu bû doʼò akə̀lə̀ we. Aghû yə̀ ù kə dzây nə̀ ghu bû akə̀lə̀ we, u zəŋi tsə nə̀ ghu doʼò tsitsi anə sə kə we. Abù ghu doʼò tsə nəniy tsitsi anə sə kə we, u zəŋi tsə nə̀ ghu bû doʼò àghè àsoŋə̀ yìy ghu dzwabə̀ soʼò nəniy anə ayiə yə ù də nəniy ate.

Iliə yə Zə̀kìy kwu nəniy â ŋgàŋ abidzəmə̀ Yesù Kə̀litò

31A də ani dzày tsə nə̀ìndiə anə ayiə yə ə? Abu Zə̀kìy də nə̀ ŋgàŋ, à də ndiə ani zəŋi ŋgaŋ nə̀ ìyiə ìbɛbə yiy ə? 32Zə̀kìy kə kə̀ bôʼ twe dzə̂ ani nyə̀ bə̀ Wà we, u nìy nyiə̀ we nə̀ ù bù pfə anə utuw u ŋgàŋ ù dzə̀m. I dê tsə nə̀ Zə̀kìy kî nyiə̀ ŋwò ŋgaŋ nə̀ ùfyiə wə ùdzə̀m abu ŋgà ŋwaa yə̂ nəniy. 33Abu Zə̀kìy dzây dzə̂ nə̀ aghû yə̀ ghe sây na, ghe mə bɛmə nə̀ ghu də tsitsi anə səkə ighe, à də ndiə ani dzày nə̀ ghu mə zəŋi iyiə ìbɛbə yiy ə? 34À də̌ ndiə ani saʼ wiy ghu ə? Wè lìy wày dzə ani saʼ wiy ghu. Kə̀litò maa pfə, Zə̀kìy zɛ̀mə̀ ŋwò dzwoŋi kə we anə ipfə. Ù də̀ nyiə anə ukwe u Kəzə̀ ù nyiə wiy, gwùŋə̀ yə̀ awò Zə̀kìy anə utuw u ŋgàŋ. 35Fyiə kə̀li kiy way dzə kə də ani dzàw màʼà fyi yə̀ ŋgàŋ anə iliə yə Kə̀litò kwu nəniy azoŋə̀ ŋgàŋ. Abu à də̀ kə məntswə̀d, moo ifii, moo ayiə àbɛbə yə aghê zəŋə nə̀ ŋgàŋ, moo dzoŋ, moo ilaʼ i təndzwu, moo fyày fyày tə yiə tə tə də ani bù nə̀ ìpfə yiy, moo bəə ghu wiy màʼà kə ŋgaŋ. Fyiə kə̀li kiy way dzə ani twe nə̀ Kə̀litò kə ŋgaŋ liə. 36I bvami də̀ ighəd anə yiə yə i twâ doʼò nəniy anə ŋwàʼà k-a-zə̀ nə̀

“Aghê liy khu kə tə̀ dzələ ani wiy màʼà ghə̀d ntsukə indzə̀m

aŋwòə ghè də aghû yiə̀. Ghu bvamə zəŋə kə nə̀ ghə̀d yəə ghè də ndzù tə̀ ghu dziy zû suu.”

37Hǎy! Ŋgà mə təm nyi mà anə ayiə dzə̀m abidzəmə̀ Kə̀litò wə̀ ù liə nəniy ŋgaŋ. 38Mə kwu təŋ ŋwô nə̀ fyiə kə̀li kiy way dzə ani dzàw màʼà fyi yə̀ ŋgàŋ anə iliə yə Zə̀kìy kwu nəniy azoŋə̀ ŋgàŋ. Abu à də kə imuə̀ moo ipfə, tsə̀təndii t-a-zə̀ moo nsìy mə̀bɛbə̀ mə̀ ìn kwu nəniy daʼa kiy ani saʼa sòʼò, ayiə yə a də nəniy nyiə moo ayiə yə a nam kwu nəniy ani bù, 39udaʼa wə̀ u də nəniy idoŋ moo ù wə u də nəniy an-a-mbvə̀dintsə. Fyiə kə̀li kiy way dzə fə anə mbyi yə ìdzə̀m kə də nəniy ani twe nə̀ Zə̀kìy kə liə dzə̀ ŋgaŋ. Yesù Kə̀litò, Mwe ə̀ mbyi ə̀ ŋgàŋ, zəŋə nə̀ ŋgà kəli tsə ndzòʼò iliə yə Zə̀kìy kwu nəniy azoŋə̀ ŋgàŋ.

Currently Selected:

Lûm 8: isu

Highlight

Compare

Copy