Roman 3

Nwiye yə aghəy unó mbənə u kaʼa

1Ba mbənə amə ba Jû chigə ba mbənə akə ma ba Jû akə ingiya? Injim zənə wa mi jəg damugə mbə iney ikad ma amə ingiya? 2U yi jəg injim nanaʼ akə inji ujum. Anó imbey amə kwi, Nwiye dey zi inayn ma inya ubugə ba Jû. 3Yə si ŋu ingiya nu cha u moʼ di beni u ma inayn wu? U mugə cha mbə di beni, a waʼa kwi cha Nwiye mi aghəy ma anó zənə yə ghayn? 4Indəʼ, mba kyay kwi Nwiye yə ghayn asiʼ kanə di ma kwi ba ujum mə ba figə unó. A yə ungɨŋ Aŋwaʼanayn Nwiye kwi,

“Ngwə tey kwi inayn zənə ngwə mə ghayn amə inayn nu ikoʼoro.

Anigə ngwə yi chigə usaʼa wu Amaʼazənə u mə saʼa yə”

5Umba unó iboŋ umbə itey kwi Nwiye yə aghəy unó mbənə ukoʼoro, nji mba mi ghayn kwi ngiya? Kwi cha Nwiye aghəy ma unó nu ukoʼoro Amaʼazənə yə siy itəm nə umba? (Ayə inayn anji zənə ba inyoŋ atəw umə inayn). 6Ində! Abə mə kwi, cha Nwiye mə aghəy ma unó mbənə ukoʼoro, nji umi isaʼ isəg ingiya?

7Unó figi mbənə a ghayn mbə aghəy kwi ba kyay asiʼ da Nwiye foro kwi u naʼa iwumini abú uŋwən, nji aton zənə umi zi usaʼa igun iniŋ kwi ayə aghəy unó iboŋ amə da ingiya? 8Nji ba moʼ mbi ghayn kwi, “Mba ni aghəy unó iboŋ boʼo ichuŋ zaʼa” Ba moʼ si jimə ŋu anji zənə umə ghayn kwi mə ghayn anó zəŋ. Nwiye yi zi usaʼa igun uma akə inji zənə ikoʼoro.

Cha wa moʼ awu umə aghəy unó mbənə u koʼoro

9Anigə mba ghayn kwi ingiya? Umba ba Jû waʼa boŋ chigə ba chini? Indəʼ, ka ba kere. Mba si tey kwi unó iboŋ mbə tumə ba ujum, kə mə ba Jû kə ba mbənə akə ma ba Jû. 10Ayə ungɨŋ Aŋwaʼanayn Nwiye kwi,

“Cha wa moʼ awu umə aghəy unó mbənə u koʼoro kaba ufeyn.

11Cha atəw wa moʼ di tana izayn da Nwiye.

Cha wa awu nu u kaba ikyay Nwiye.

12Ba ujum si gha injim ma abú Nwiye,

Cha umə aghəy unó mbənə Nwiye mə kabay.

Cha wa moʼ awu umə aghəy ichuŋ kaba ufeyn.

13Inayn tənə imə duw uchəw ma amə iwu.

U mbə num uchəw itama ba,

Inayn tənə imə duw uchəw ma chomo ni uniʼi ŋunə umə duw akə ijugə.

14Aba inayn tənə imə naʼa indon imə duw ungɨŋ uchəw ma.

15Mbə kyay umugə iyabi nod iŋu zwere wa.

16Usin ujum mbənə umə ŋuw awu, u mbə yeŋ yə chiŋe u ghəy nibə yeŋ yə zi ingəʼ igun ba.

17Cha ukyay uma umugə ni chomo akə aborobod

18Cha ukyay uma kwi amə ghəy u wumine Nwiye.”

19Akinine mba si kyay kwi unó mbənə unoʼo ghayn u mbə ghayn amə abú ba mbənə umə aton unoʼo, da ka umə uma nə anó moʼ igha ighayn. Anigə, Nwiye yi saʼ ba ujum mbənə umə ungɨŋ isəg. 20#Gal 2.16Cha wa moʼ awu nu u tem ikoʼoro ifigi Nwiye numugə umə aghəy unó mbənə umə ungɨŋ unoʼo. Unoʼo mbə aghəy amə kwi ba kyay kwi u mbə aghəy unó iboŋ.

Nwiye yi aghəy kwi ba tem ikoʼoro ifigi ma

21Akinine, Nwiye si tey inji zənə amə aghəy ba tem ikoʼoro ifigi ma. Cha anó ni tem ikoʼoro ifigi ma mə ama nə anó moʼ ighəy nə unoʼo, kanə di ma kwi unoʼo Mose nə ba ukən Nwiye si ghayn nigə. 22#Gal 2.16Nwiye si aghəy kwi ba ujum mbi itəm ikoʼoro ifigi ma anjim umugə ú beni Yeso Kristo. Cha Nwiye mə zən ma ikyaba akaʼa ba, 23damugə ba ujum si aghəy anó iboŋ, anigə cha uzayn zayn Nwiye di ni bere ma ungɨŋ ma. 24Nwiye si aghəy kwi ba təm ikoʼoro akə inji zənə u aghəy ichuŋ abú úŋwən. Ichuŋ wu amə uneʼe ŋunə u naʼa abú úŋwən anjim Yeso Kristo ŋunə yə ziya utəw uma. 25Nwiye cha uŋwən nə aghəy ifá da anəm ma səw umba unó iboŋ anjim umugə mba zi fiŋ inyo ma. Nwiye tey anjim iyimi fiŋ kwi mba yi aghəy unó mbənə ukoʼoro anji zənə cha yə zi ma ingəʼ atəw ba mbənə mbə́ mə aghəy unó iboŋ imbəy. 26Yə́ aghəy ney da itey kwi uŋwən yə aghəy unó mbənə ukoʼoro foro kwi uŋwən yə aghəy kwi ba mbənə u zi fiŋ inyo Yeso u təm ikoʼoro.

27Anigə mba ni komo iguwə da ingiya? Cha anó moʼ ina imə komo iguwə da aŋwen. Aton mə kwi ingiya? A waʼa da mugə mba num unoʼo? Indəʼ! Amə da mugə mba mə ni ibeni. 28Mba beni kwi wa təm ikoʼoro anjim ibeni ma, akə ma da mugə u aghəy unó mbənə umə ungɨŋ unoʼo. 29Nwiye waʼa aba Nwiye ba Jû? Uŋwən aka ma nibə Nwiye abú ba mbənə akə ma ba Jû? Aŋ, uŋwən mə nibə Nwiye abú ba mbənə akə ma ba Jû. 30#Gal 3.20Numugə Nwiye aba ufeyn, u yi aghəy kwi ba mbənə u ney ikad uma təm ikoʼoro anjim ibeni ma, nibi aghəy kwi ba mbənə cha u di iney ikad ma nibi təm ikoʼoro anjim ibeni ma. 31Anigə mba waʼa waʼ unoʼo da ibeni wu? Ində? Mba yimə unoʼo wu anji chuŋ.

Currently Selected:

Roman 3: NGI

Highlight

Copy

Compare