Roman 2

Nwiye yi saʼa isəg akə inji zənə ikoʼoro

1 # Mat 7.1; Luk 6.37 Inyi azi, cha aton moʼ inigə ighayn kwi, “Cha mə di kyay” Damugə ngwə yə sob usaʼa igun ba chini. Ngwə mə sobo usaʼa igun wa chini, ngwə yə sobo usaʼa igun inji inyo damugə ungwə ŋunə ngwə mə sobo usaʼa, ngwə yə nibə aghəy unó iboŋ. 2Mba kyay kwi Nwiye yi saʼ ba mbənə umə aghəy ukudu unó uŋu akə inji zənə ikoʼoro. 3Inyi azi, ngwə yə saʼa úŋwən anigə ni aghəy unó mbənə mbə́ mə aghəy. Ngwə kono kwi Ngwə mi nod kwi ka Nwiye saʼa ma ayə? 4Kə ngwə waʼa kə kono ayə ichuŋ nanaʼ zənə Nwiye aghəy inigə anji zənə u sayn kwi ngwə aghəy unó mbənə cha udi koʼoro, foro anji zənə u yimi fiŋ? Cha ngwə di kyay kwi ichuŋ Nwiye amə aghəy kwi ngwə beŋe fiŋ?

5Asɨmə numugə ngwə mə nə fiŋ kaka nu cha imə kaba ibeŋe, anigə kyay kwi Nwiye yə isɨy itəm inigə, anigə u yi zi usaʼa nu ukwey igun inigə aney zənə umi sob usaʼa anji zənə ikoʼoro. 6Nwiye yi choʼo faʼa abú wa feyn feyn akə inji zənə u faʼa. 7U yi naʼa itəni nu cha imi noʼo imey abú ba mbənə u yimə fiŋ ni aghəy ichuŋ, ni kaba uzayn zayn, ni iwumini foro unó nu cha ba mi noʼo iku. 8Nwiye yi siyə itəm nibi zi usaʼa igun ba mbənə umə kaba u aghəy aba abú inyo ma, umbə́ tono unó mbənə amə unó asiʼ, da isə aghəy amə unó iboŋ. 9Ingəʼ nə inyo nya yi nyi igun ba ujum mbənə umə aghəy unó iboŋ. Iyi nyi igun ba Jû, inoʼo akuŋ inyi igun ba mbənə akə ma ba Jû. 10Asɨmə Nwiye yi naʼa uzayn zayn nə iwumini foro aborobod abú ba mbənə umə aghəy unó chuŋ. U yi dey naʼ abú ba Jû inoʼo akuŋ inaʼ abú ba mbənə akə ma ba Jû. 11Damugə cha Nwiye mə ghəy ama aghɨ.

12Ba ujum mbənə umə aghəy unó iboŋ nu cha u kyay uma unoʼo Mose, U mbi nim aba ni ba mbənə cha u di kyay uma unoʼo wu. Asɨmə Nwiye yi num unoʼo Mose isaʼa ba ujum mbənə u kyay unoʼo asɨmə umbə bugə aghəy unó iboŋ, 13damugə akə ma ba mbənə u zəw unoʼo nu umə aghəy unó mbənə u koʼoro. Amə ba mbənə umə aghəy unó mbənə unoʼo wu ghayn nu Nwiye mi beni kwi unó ma koʼoro. 14Amaʼazənə ba mbənə akə ma ba Jû nu cha u kyayn uma unoʼo Mose aghəy unó mbənə umə ungɨŋ unoʼo anji zənə aduw ungɨŋ fiŋ uma, anigə mbə tey kwi unoʼo wu mbə ungɨŋ fiŋ uma, ka di ma kwi cha u di kyay uma unoʼo Mose. 15Inji unó ma tey kwi, mbə si ŋwaʼanayn unó mbənə umə ungɨŋ unoʼo ungɨŋ fiŋ uma. Fiŋ zənə umə saʼa úŋwən yi nibə tey kwi amə asiʼ. Ikono uma yə saʼa úŋwən da unó mbənə u koʼoro foro da u mbənə cha u di koʼoro. 16Ukən chuŋ ŋunə amə ghayn tey kwi aney zənə Nwiye mi saʼa isəg anjim Yeso Kristo, u yi nibi saʼa ikono tənə i paʼa.

Anó zənə unoʼo Mose ghayn da ba Jû

17Amə u ngwə? Ngwə yə tiya inji inyo kwi imə wa Jû, ngwə niŋe injə fiŋ igun unoʼo Mose. Ngwə yə nibə komo iguwə da mugə ngwə kyay Nwiye. 18Ngwə kyay anó zənə Nwiye mə kaba kwi ngwə aghəy, ngwə si kweme unoʼo ikyay anó zənə a koʼoro. 19Ngwə kaŋa kyay kwi ngwə yə yimə imbaŋ abú ifəg. Ngwə nibi kyay kwi ngwə mə uzayn zayn abú ba mbənə umə ungɨŋ imbiri. 20Ngwə ghayn kwi iyə taʼa uneŋ. Ngwə nibi ghayn kwi iyə itey unó abú buŋ kuŋe. Ngwə yə aghəy nigə damugə ngwə kyay kwi iwe ujum nə asiʼ ujum yə ungɨŋ unoʼo. 21Ngwə yə itey unó abú ba chini, ngwə si kə itey yə unó abú ijigə mi inyo? Ngwə yə ghayn kwi ka ba mə ji uma, ngwə waʼa kə ji yə? 22Ngwə yə ghayn kwi ka wa neŋi ma unom kə uyey wa chini, ngwə waʼa kə neŋi ayə unom kə uyey wa chini? Ngwə yə bana unwiye ibuw ibuw, ngwə waʼa kə ŋuw iji yə ungɨŋ imbəŋ unwiye ibuw ibuw? 23Ngwə yə komo iguwə kwi yə kyay unoʼo Nwiye, ngwə waʼa kə tebe yə Nwiye akə inji zənə ngwə mə igow unoʼo wu? 24Ayə ungɨŋ Aŋwaʼanayn Nwiye kwi, “Amə umbən mbən mə aghəy kwi ba mbənə akə ma ba Jû uni jimə Nwiye.”

25Anó ni iney ikad anóm amə anó chuŋ ighari zənə ngwə sə num unoʼo Nwiye. Ngwə bə sə gow unoʼo, anigə ngwə chomo ni kwi cha mbə di iney uma iji ikad. 26Anom ŋunə cha mbə di iney ikad ma bə aghəy unó mbənə umə ungɨŋ unoʼo, nji ka umi num kwi mbə si ney ikad ma? 27Amə nigə ba mbənə akə ma ba Jû nu cha udi si ney uma ikad uma asɨmə u mbə isiyə unoʼo, umbi zi usaʼa igun inigə u ngwə ŋunə ngwə kyay unoʼo nibi ney inji ikad asɨmə cha ngwə mə isiyə yə unoʼo wu. 28Cha wa mə ma wa Jû asiʼ aba da mugə amə wa Jû ubə́ uŋwən. Cha anó ni iney ikad anóm di tey ma kwi uŋwən mə wa Jû asiʼ. 29Wa Jû asiʼ amə ungɨŋ fiŋ. Anó ni iney ikad amə anó ungɨŋ fiŋ. Amə nibə anó nu Azugə Nwiye aghəy. Cha Jû asiʼ amə anji zənə u ŋwaʼanayn amə ungɨŋ aŋwaʼanayn. Akə ma ba umə wumine Jû asiʼ. Amə Nwiye mə wumine uŋwən.

Currently Selected:

Roman 2: NGI

Highlight

Copy

Compare