Ifa 27

Pol nyi abaŋ ugwi iŋuw Rom

1Amaʼazənə Festus sob kwi mba nyi abaŋ ugwi iŋuw Itali, yə naʼ Pol nə ba ndəŋ chini abú anom moʼ nu ukum ma mə Juliyus. Juliyus wu amə atəw abú usogwi ukɨ feyn ungɨŋ Uwaŋ Usogwi Kayisa. 2Mba nyi abaŋ ugwi nu yə zaʼa Adramitum, nu yə mə́ sə ŋu noʼ ŋu yi təm usin mbənə abaŋ ugwi mə́ yeŋ yə təmə awu á Esiya. Anom moʼ nu ukum ma mə́ Aristakus wa Tesalonika á Masedoniya mə́ aboʼo inja.

3Akə aney akəŋ, mba pey Sidon. Juliyus ghəy ichuŋ abú Pol isayn uŋwen kwi u ŋuw abú u zi ma da umi naʼa u ghəy mbənə umə kaba. 4Mba noʼ awu ni ŋuw. Asɨmə umugə ufiy mə tinə ngwa aba ifigi, mba gha ŋu chigə aba Sayiprus zənə cha afim mə chigə ma awu. 5Amaʼ zənə mba si kwene iba zənə imə́ iyad Selisiya foro Pamfiliya, mba ŋú pey Mira a Lisiya. 6A Mira, atəw abú usogwi ukɨ feyn zən abaŋ ugwi nu noʼo Alezandriya mə ŋuw Itali. Yə zi ngwa ungɨŋ abaŋ wu. 7Mba mə́ yeŋ kerekere akə uney nanaʼ. Mba yeŋ nigə ŋu pey nidus. Cha afim di beni ma kwi ma ŋu imbey. Anigə, mba chigə iyad Salmone aba Kret zənə cha afim mə chigə ma awu. 8Mba yeŋ iyad iyad iba ungɨŋ ingəʼ kaka ŋu pey asin moʼ nu umə tiya akə asin chuŋ nu abaŋ ugwi mə zaʼa itəm awu. Asin wu mə́ iyad Leseya.

9Mba chiŋe amaʼ nanaʼ. Anigə cha yə di iboŋ imə yeŋ ungɨŋ iba da afim. Aney ba mə jiyə injəy kwi Nwiye nyaba unó iboŋ ma si chigə. Pol na ikɨy abú úŋwen kwi, 10“Unya anom, mə zən kwi ingəʼ yi mə wu nanaʼ i du akəŋ imə ŋuw, abaŋ yi ibɨy, u ghəy mbənə mba beʼe umbi nim, kaba ba umbi ku.” 11Asɨmə cha atəw abú usogwi mə zi ma atəw ma akə anó zənə Pol mə́ ghayn. Yə́ mə́ zwaray amə azənə atəw kyayn ungɨŋ abaŋ nə anom ŋunə amə abaŋ ma mə́ ghayn. 12Umugə cha asin zənə mbə́ pey yi təm awu di koʼoro ma kwi mba mə awu, nu ufiy mə ghəy azəd, ba nanaʼ ghayn kwi mba ŋuw da ipey Foniz. Foniz mə asin kyayn a Kret. Asin wu mə iney aba zənə nyamachugi mə duw awu. Mba chomo awu pey amaʼazənə ufiy wu chigə.

Afim chigə igun iba

13Amaʼazənə afim aba achuŋ mə chigə kerekere, mbə́ anom wu kono kwi umbi ghəy anó zənə mbə kono ighəy. Anigə mbə́ ghəw atənə zənə amə ghəy abaŋ təm ungɨŋ ugwi ichi. Mbə́ ghəy nigə ni nyaʼa yeŋ iyad ugwi Kret ŋuw. 14Cha gha di sa, afim zənə umə tiya akə “Afim aba koʼo” ti ni chigə ungɨŋ Kret swiʼi zaʼa. 15Amaʼazənə afim wu pey kom abaŋ ugwi wu, yə ka ighəy kwi abaŋ ugwi wu ni yeŋ ŋuw. Mba sayn anigə amə afim wu yə mə sə tinə abaŋ ugwi wu. 16Mba yeŋ nigə ŋu pey asin akwaʼ moʼ nu ugwi kad umə tiya akə Kayuda. Mba pey awu zəw ingəʼ isiy ukuʼ ugwi ŋunə yə mə ungɨŋ abaŋ ugwi. 17Mbə ghəw ukuʼ ugwi wu zi ungɨŋ abaŋ ugwi anigə ikod abaŋ ugwi wu akə uniʼ boʼo ka saʼa ma. Mbə mə goro kwi a yi ŋu nyi ungɨŋ akwaʼ zənə amə iyad iba Libiya. Anigə, mbə swiʼiri ndwi zənə imə ghəy kwi abaŋ ni yeŋ, i sayn kwi afim ni tənə abaŋ ugwi wu. 18Afim wu mə ka ŋu aba imbey. Anəy akuŋ, mbə́ mə́ chiyə u ghəy mbənə abaŋ wu beʼe maʼa ungɨŋ ugwi. 19Amaʼazənə uney ŋu pey akə uta, mbə́ mə́ chiyə uba moʼ akə abaŋ ugwi wu maʼa ungɨŋ ugwi. 20Uney nanaʼ chigə nu cha wa di zən achugi kə utəni duw azobo. Afim kaka mə́ bə́ chigə ŋuw imbey. Mba waʼ ikono ujum kwi mba yi du angəʼ.

21Ba si chomo akə uney nanaʼ nu cha u jəgə, anigə Pol noʼ təm akaʼa uma ghayn kwi, “U mbəŋ ba! Mbən di bi zəw anó zənə mə ghayn inen i chomo Kret, nji cha afim mi chiŋe ma abaŋ ugwi zəŋ, nji cha mba di nim u ghəy ney. 22Asɨmə akinine, ayə ghayn inen kwi mbən yimə fiŋ cha wa moʼ injən akaʼa mi ku aba abaŋ ugwi mi nim. 23Ayə ghayn ney damugə, akə afəb, angəd Nwiye ŋunə umugə mə wa ma, nu amə Nwiye ŋunə amə wumine yə zaʼa iniŋ, 24ighayn iniŋ kwi, ‘Pol imə goro ayə damugə ngwə yə ŋu təm ifigi Kayisa. Nwiye ghəy ichuŋ inigə. Yə si ghəy kwi ba jum mbənə umə yeŋ nə ngwə cha umoʼ mi nim.’ 25Anigə mbən yimə fiŋ umbəŋ unya anom, mə zi fiŋ inyo Nwiye kwi unó mbəŋ umbi du aba anji zənə u ghayn iniŋ. 26Asɨmə mba yə ŋu du akə asin nu une kad.”

27Yə́ mə́ ŋuw ká ufəb ighum cho kyugə nu afim wu tinə ngwa ungɨŋ iba Adriyatik. Asə uzimi afəb, anom mbənə mbə́ mə́ ifiyə abaŋ ugwi wu kono kwi mba yə sə tinə ŋuw iyad isey. 28Anigə, mbə num uniʼ ikod ghəy moʼ awu i maʼ ungɨŋ iba wu. Yə sa ŋu ungɨŋ ka u mata ighumi kyugə. Mbə́ yeŋ ŋu imbey kerekere i maʼ uniʼ wu ungɨŋ iba. Yə nyi ŋu ungɨŋ ka u mata ighumi ta. 29Mbə́ god kwi abaŋ ugwi wu yə ŋu komo ma akə ukob, anigə mbə́ swiʼiri útənə kyugə mbənə mbə́ mə́ anjim abaŋ wu,#27.29 Útənə wu amə iyimi abaŋ ugwi wu ungɨŋ ugwi i chaʼara Nwiye kwi isəg kyiʼi. 30Anom mbənə mbə́ mə́ ifiyə abaŋ ugwi wu, kaba inod idu ungɨŋ abaŋ ugwi wu. Anigə mbə swiʼiri ukuʼ ugwi wu icha ungɨŋ ugwi. Mbə́ mə́ ghəy ney kwi umbə́ kaba iswiʼiri útənə mbənə umə imbey abaŋ ugwi awu. 31Pol ghayn abú atəw abú usogwi ukɨ feyn nibi ghayn abú usogwi ma kwi, “Anom mbən bə ton ichomo ungɨŋ abaŋ ugwi zəŋ, ka ba mə uma nə ikono moʼ kwi umbi du angəʼ.” 32Anigə, usogwi wu səg uniʼ ŋunə mbə́ kod ukuʼ ugwi awu sayn u koŋ.

33Amaʼazənə isəg mə sə ŋu kyiʼi, Pol boʼo ubugə abú úŋwen kwi u jəg. Yə ghayn abú úŋwen kwi, “Akə̂choŋ amə unəy ighum cho kyugə nu mba mə nəmə kwi afim zəŋ sobo anigə cha mbən di si jəg aghəy moʼ akə uney mbəŋ ighum cho kyugə. 34Anigə ayə boʼo ubugə inen kwi mbən jəg aghəy moʼ da ami naʼa ikay inen. Cha inyoŋ atəw moʼ mi nimə ma atəw wa moʼ injən akaʼa.” 35Amaʼazənə yə ghayn ney, yə num ingəŋ chaʼara Nwiye ifigi uma ujum, ibɨʼiri ti ni jəgə. 36Úŋwen uma ujum yimə fiŋ ijəg aghəy moʼ. 37Ba jum mbənə mbə́ mə́ awu ungɨŋ abaŋ ugwi wu mə akɨ bigə nə ighumi sambigə cho ifəw. 38Amaʼazənə ba jum si jəg ikod, mbə́ chi ikwi tənə tə́ mə́ ungɨŋ abaŋ ugwi imaʼ ungɨŋ iba. Anigə yə ghəy abaŋ ugwi wu zab.

Abaŋ ugwi saʼa

39amaʼazənə isəg kyiʼi, cha anom mbənə mbə́ mə́ ifiyə abaŋ ugwi wu kyay uma asin zənə mbə́ mə́ awu. Asɨmə mbə́ zən asin moʼ nə asɨkwaʼ awu. Mbə́ zən nigə kaba kwi nji mbə́ ifiyə abaŋ ugwi wu ŋu təm asin wu. 40Mbə səg iniʼ tənə imə akə útənə mbənə umə yimə abaŋ ugwi ungɨŋ ugwi. Mbə́ nibi za iniʼ tənə umə yimə u ghəy mbənə umə ifiyə abaŋ ugwi awu. Mbə́ ghəy nigə ibeʼere ndwi tənə tə́ mə́ imbey. Amaʼazənə mbə́ ghəy nigə, abaŋ wu nyi ungɨŋ iba. 41Asɨmə abaŋ ugwi wu komo ma akə idum asɨkwaʼ anigə, aba imbey nyi tənə ungɨŋ idum asɨkwaʼ wu. Anigə imbəʼ ugwi kaka tum aba njim sa akə uba uba. 42Usogwi wu tana kwi umbi zwere ba ndəŋ ujum boʼo ka moʼ zoʼo ma iba noro ma. 43Asɨmə atəw abú usogwi kab kwi nji yə chi Pol angəʼ. Anigə, yə ton kwi ka u zwere uma ba ndəŋ. Yə́ ghayn abú anom mbənə u kyay umugə ni zoʼo ugwi kwi u dey uma dwen ungɨŋ iba i zoʼo ugwi du asaŋ. 44Yə́ si ghayn abú abúʼə ba kwi u chomo igun uba uzad foro igun ughəy mbənə mbə́ səŋərə akə abaŋ ugwi wu iŋu aboʼo uŋwen. Amə inji zənə umba jum du asaŋ nu cha wa moʼ nyi ma angəʼ.

Currently Selected:

Ifa 27: NGI

Highlight

Copy

Compare