Ifa 26
26
Pol nayn da ichi anó atəw ma ifigi Agripa
1Agripa ghayn abú Pol kwi, “Aney apan zəŋ, ghayn anó zənə amə inigə ighayn.” Amaʼazənə yə́ ghayn nigə, Pol beʼere ubugə ma aneŋ inayn da ichi anó atəw ma. Yə ghayn kwi, 2“Ufon Agripa, mə zən kwi amə anó chuŋ iniŋ akə̂choŋ i təm inji ifigi inayn da ichi unó ujum mbənə ba Jû zi inyə atəw, 3damugə mə kyay kwi ngwə tana kyay nji ba Jû ujum uchuŋ chuŋ, nibi kyay unó mbənə mbá mə́ taŋa igun. Anigə, mə boʼo ubugə inigə kwi ngwə yimə fiŋ izwaray anó zənə amə kaba ighayn.
4Ba Jû ujum kyay inji zənə mə́ mə chomo ungɨŋ inyə abey foro á Yerusanem iti Amaʼazənə mə mə́ ŋwə̂ kuŋe. 5#Ifa 23.6; Fil 3.5Amə aghəy mbə́ iwuʼ ighayn asiʼ, nji mbə mi kyayn kwi, inoʼ imbey, amə wa ungɨŋ aghaŋ ba Farasay nu amə ufere ŋunə ukay akə inja anó Nwiye. 6Mə təm akəŋ akinine kwi, usaʼ aŋu damugə a zi fiŋ akə anó zənə Nwiye akaʼa abú umba mbaʼ imbey. 7Amə akaʼa wu zənə ita inebey ghum cho bigə beni kwi ayi zaʼa du zənə mbə́ mə́ wumine Nwiye nə fiŋ ma ujum afəb nə ingom. Ufon Agripa, amə da anó wu nu ba Jû zi usaʼa inyə atəw. 8Amə kaŋa chigə wa feyn feyn injən kaʼa ibeni kwi Nwiye yi zəmə ba da ngiya?”
9 #
Ifa 8.3; 22.4, 5 Ka ba umugə mə́ kono kwi a aghəy anó zənə amə ghəy aghəy ichiŋe ukum Yeso wa Nazared. 10Mə́ mə aghəy nigə a Yerusanem. Ba kyayn ambəŋ Nwiye naʼa ikay iniŋ kwi a ghəbə ba mbənə u beni Kristo ana ndəŋ. Amaʼazənə mbə́ sob kwi uzwere úŋwən, mə́ nibi beni. 11Mə́ mə ŋuw ana ibumi ba Jû ighari nanaʼ ni naʼa ingəʼ abú úŋwən. Mə́ kab nji ighəy kwi úŋwən jimə Nwiye. Mə́ isɨy itəm azəd nə úŋwən anigə mə ŋu ungɨŋ usin isoʼ da inwine inya ughəw ma.
Pol ghayn umugə mbə́ beŋe uŋwen
12“A mə akə aton zəŋ nu ba kyayn ambəŋ Nwiye naʼ ikay iniŋ nibi tom aŋu a Damaskos. 13Ufon kyayn, amə́ anji angom ka nu mə́ zən uzayn zayn u noʼo azobo, yə́ zayn chigə ma akə nyamachugi. Uzayn zayn wu záyn kad aŋu nibi ka anóm mbənə mbə́ mə́ aboʼo inyə. 14Mba gow asey umba jum. Anigə mə zəw igəg moʼ ghayn iniŋ akə inayn Hibru kwi, ‘Sol, Sol, ngwə mə nwine itəŋ inya aghəw da ngiya? Ngwə inya ayə numugə ipoŋ zənə u tumi imbaŋ mbaʼ ma.’
15Mə biri kwi, ‘Ngwə mə ngwa Asɨyisəg?’ Asɨyisəg ghayn kwi, ‘Amə Yeso ŋunə ngwə mə nwine inya ughəw ma.’ 16Noʼo təm, mə buw inji ifigi da ichoʼo ayə kwi ngwə faʼa iniŋ. Ghayn anó zənə ngwə zən da aŋu akə̂choŋ nibi ghayn u mbənə ami tey inigə. 17Ayi chi ayə ubugə ba Izre nibi chi ayə ubugə ba mbənə akaʼa ma ba Jû nu amə ba mbənə amə tomo ayə abú úŋwən. 18Kwi ngwə fiʼi aghɨ uma boʼo u duw ungɨŋ imbiri iŋu ungɨŋ uzayn zayn, nibi du ton ikay Satan iŋu abú Nwiye, boʼo anjim ibeni fiŋ uma, Nwiye yi waʼ unó iboŋ uma i num úŋwen akə ba uma.
19Anigə, ufon kyayn Agripa, cha mə di ton ighəy aŋu anó zənə Asɨyisəg ghayn iniŋ akə ukaŋ. 20#Ifa 9.20, 28, 29Mə́ dey ghayn inayn Nwiye á Damaskos, ighayn a Yerusanem, iŋu ghayn ungɨŋ usin ujum mbənə umə Judeya foro akaʼa ba mbənə akaʼa ma ba Jû. Mə́ mə ghayn kwi u beŋe fiŋ uma niŋe anjim Nwiye. Mə́ nibi ghayn kwi uni aghəy unó mbənə u tey kwi mbə́ sí beŋe fiŋ uma. 21Amə da anó zəŋ nu ba Jû ibiya aŋu ungɨŋ imbəŋ Nwiye kaba izwere. 22Iŋu pey akə̂choŋ Nwiye si yere aŋu. Anigə mə təm akəŋ ighayn da Kristo abú ba ujum, abú mbi kuŋe foro abú ba kyayn. Ayə ghayn aba unó mbənə ba ukən Nwiye nə Mose ghayn kwi umbi aghəy. 23#1Ko 15.20Mbə́ ghayn kwi wa ŋunə Nwiye zoʼo yə zəw ingəʼ. Mbə́ nibi ghayn kwi uŋwən yi mə wa imbey i zəmə. U yi ghayn anó da uzayn zayn Nwiye abú ba Jû nibi ghayn abú ba mbənə akaʼa ma ba Jû.”
24Umugə Pol mə inayn da ichi anó atəw ma, Festus kyayn ghayn kwi, “Pol ngwə yə ibigə! Aŋwaʼanayn zənə ngwə kweme ayə aghəy kwi ngwə ibigə!”
25Asɨmə Pol ywiri kwi, “Wa kyayn Festus, cha a mə ibigə aŋu, ayə ghayn amə asiʼ.” 26Ufon kyayn, aton zənə amə ghayn unó mbəŋ inigə nu cha amə bo amə kwi, ngwə kyayn unó mbəŋ ujum. Damugə cha mbə́ mə́ aghəy ma unó mbəŋ amə anjim anjim. 27Ufon Agripa, ngwə beni unó mbənə ba ukən Nwiye ghayn? Mə kyayn kwi ngwə beni!
28Ufon Agripa biri abú Pol kwi, “Ngwə kono kwi ngwə mi num ŋwə̂ amaʼ ibeŋe aŋu akə wa Kristo?”
29Pol ywiri kwi, “Ayə chaʼara Nwiye kwi ungwə nə ba mbənə umə zəw anó zənə amə ghayn akə̂choŋ, mbən chomo nu umugə, kə amə akə amaʼ itum kə amaʼa sa. Asɨmə ka mbən mə ngwən wa ndəŋ ni umugə.”
30Amaʼazənə Pol ghayn nigə, ufon wu, gobuna, Benis nə ba ujum mbənə mbə́ chomo aboʼo úŋwen noʼ atey. 31Amaʼazənə mbə́ mə́ duw, mbə́ ghayn uma uma kwi, “Cha anóm ŋunə aghəy ma anó moʼ amə aghəy u zwere uŋwən, kə kwi u zi uŋwən andəŋ.”
32Ufon Agripa ghayn abú Festus kwi, “Adi mə kwi cha anóm ŋunə di cha ma usaʼa ŋu abú Kayisa, nji yə kəʼ ichi uŋwen sayn.”
Currently Selected:
Ifa 26: NGI
Highlight
Copy
Compare
Share
Want to have your highlights saved across all your devices? Sign up or sign in
© 2023 CABTAL
