Ifa 28

Anó zənə yə́ duw a Malta

1Amaʼazənə mba si du ungɨŋ iba ipey asaŋ nu cha wa moʼ nyi ma angəʼ, mbə́ ghayn ina kwi, ukum akə asin asey wu amə Malta. 2Ba asin wu ghəy ichuŋ ina nu cha adi si noʼ zən. Imbəŋ ti ni choʼo anigə imbayn ni zuw u num ngwa anji chuŋ anigə ichəw uwəd. 3Pol fere utin ughəy moʼ izi ungɨŋ uwəd. Amaʼazənə yə zi nigə, imbayn ti ni nomo anigə inom du ungɨŋ utini ughəy wu. Inom wu nom abugə Pol tənə awu. 4Amaʼazənə ba asin wu zən inom wu nu iyimə abugə Pol, mbə́ mə́ ghayn uma uma kwi, “Anom ŋunə amə wa umə zwere ba, kanə yə di bugə iwu ungɨŋ iba, cha Nwiye ayey ŋunə umə saʼa ba mi beni ma kwi u chomo ikay.” 5Asɨmə Pol nyiʼiri inóm wu ifwayn ungɨŋ uwəd, cha ghəy moʼ ghəy ma uŋwen. 6Ba wu mə nəmə kwi u yi mod kə kwi u yi saʼa fwayn asey iku. Asɨmə, Amaʼazənə mbə́ nəmə akə agha sa zən kwi cha anó moʼ aghəy ma abú uŋwen, mbə́ beŋe fiŋ uma ghayn kwi uŋwen mə Nwiye moʼ.

7Wa ŋunə yə́ mə́ tumə asin zənə ugwi kad nu ukum ma mə Poliyus mə nə imbayn moʼ aba awu iyad. Yə numə ngwa kwaʼa anji chuŋ. Anigə mba chomo ana ma akə uney uta. 8Mbaʼ Pobiyus mə igun ukon isɨgə ufəʼ foro utugə nomo. Pol nyi ŋu atəw na ma pey yi chaʼara Nwiye niŋe ubugə ma igun ma u boro. 9Amaʼazənə yə́ aghəy nigə, abúʼə ba isɨgə zənə yə́ mə́ ungɨŋ ibara asin wu ŋu abú Pol yə aghəy u boro. 10Mbə́ naʼ u ghəy nanaʼ ina. Amaʼazənə mba noʼ imə ŋuw, mbə́ zi u ghəy mbənə mba mə́ kaba ungɨŋ abaŋ ugwi.

Pol noʼo Malta iŋuw Rom

11Amaʼazənə aməg chigə ata, mba nyi abaŋ ugwi moʼ nu yə noʼo Alezandriya. Mbə́ mə́ tiya abaŋ ugwi wu kwi unwiye ubigə. Yə mə ungɨŋ asin zənə ugwi kad amaʼazənə imbayn mə zuw. 12Mba nyi nigə ŋu pey yi təm a Siraku. Mba chomo awu akə uney uta. 13Mba noʼ awu iŋuw Regum. Aney akuŋ, afim aba chuŋ mə chigə. Asə akə uney mbənə uŋu pey akə ubigə, mba ŋuw Putiyoli. 14Mba pey awu yi zən ba nu u beni Kristo. Anigə, mbə́ ghayn ina kwi, mba chomo nə úŋwen akə ika. Amaʼazənə mba noʼo awu, mba ŋu pey a Rom. 15Amaʼazənə ba mbənə u beni Kristo a Rom zəw da ngwa, mbə́ noʼ abey Iyuŋ Apiyus, nibi noʼ ana tənə umə iney ungɨŋ ituwə ita zaʼa kuw ngwa. Amaʼazənə Pol zən úŋwen, yə na uyaka abú Nwiye anigə fiŋ ma gha kara.

Pol ghayn inayn Nwiye Rom

16Amaʼazənə mba pey Rom, mbə́ sayn Pol kwi u chomo akə ighari ma nə sogwi umə nəmə uŋwen.

17Amaʼazənə unəy chigə uta, Pol tiya utəw mbənə umə cha ba Jû u zaʼa bumə anigə ughayn abú úŋwen kwi, “Umbuŋ unya anóm, kanə cha mə́ di aghəy aŋu anó moʼ abú umba ba kə da inji unó umba mbaʼ imbey, mbə́ ibiya aŋu a Yerusanem inaʼ abú ba Rom. 18Amaʼazənə ba Rom nwine aŋu, mbə́ kab isayn aŋu damugə mbə́ zən kwi cha adi gow aŋu anó nu atey kwi u zwere aŋu. 19#Ifa 25.11Asɨmə amaʼa zənə ba Jû ton izəw anó zənə ba Rom mə́ ghayn. Mə́ ghayn kwi, ucha usaʼa wu abú Kayisa, kanə cha usaʼa moʼ iniŋ izi atəw umbəŋ ba. 20Amə aton zənə mə ghayn kwi mbən zaʼa a zən ngwən nibi inayn inen damugə amə da wa ŋunə ba Izre zi ikono ma awu nu ghəy kwi u kod aŋu akə indəŋ təŋ.”

21Mbə́ ywiri kwi, “Cha mba zən ngwa aŋwaʼanayn moʼ abú ba Judeya da ayə. Cha umba unya mbənə u zaʼa awu, puri uma anó moʼ ina da ayə kə ighayn anó iboŋ moʼ da ayə.” 22Asɨmə mba wuʼ izəw iti kono damugə mba kyay kwi ba mbə́ tono ufere ŋunə ngwə mə awu usin ujum.

23Mbə́ sey anəy kwi umbə ŋu zən Pol. Amaʼazənə aney wu koʼo, mbə́ du kwaʼa uma nanaʼ iŋu asin zənə Pol mə chomo. Iti afəfəb iŋu pey afəb, yə́ mə́ toʼoro anó da anó ufon Nwiye abú úŋwen. Yə num unó ungɨŋ aŋwaʼanayn unoʼo Mose nibi num ungɨŋ uŋwaʼanayn mbənə ba ukən Nwiye ŋwaʼanayn, ighəy úŋwen kyay kwi unó mbənə umə ghayn da Yeso amə unó asiʼ. 24Ba moʼ beni unó mbənə yə́ mə́ ighayn, asɨmə cha ba moʼ di beni. 25Umugə cha úŋwen di beni akə anó feyn, mbə du awu ungɨŋ na Amaʼazənə Pol si ghayn anó feyn kwi, “Azugə zayn zayn ghayn anó chuŋ umugə yə chigə anjim wa ukən Nwiye Azaya ghayn abú umba mbaʼ imbey kwi!

26‘Ŋu abú ba mbəŋ ghayn abú úŋwen kwi,

Mbən yi zwaray izwaray asɨmə cha umbən utəw mi zayn,

Mbən yi ney iney asɨmə cha mbən mi zən ikyay

27Damugə fiŋ ba mbəŋ si tu,

Cha utoŋ ma mə tana zwaray ma anó,

Mbə si nibi kəbərə aghɨ,

Nji mbə mi mə zən usin akə aghɨ nibi,

Zəw anó akə utoŋ ma,

Kyay unó uzayn ungɨŋ,

Fiŋ ma, anigə ayi zwey úŋwen.

28Anigə, ayə kaba kwi, mbən kyay kwi Nwiye bi cha ukən damugə umi chi ba angəʼ abú ba mbənə akaʼa ma ba Jû anigə umbi zwaray.’” [29Amaʼazənə Pol si ghayn unó mbəŋ, ba Jû wu du ni ŋuw yeŋ yə taŋa akə ikay akaʼa uma uma].

30Pol chomo awu akə ituʼ abigə. Yə́ mə́ chomo akə na nu yə́ mə́ ituwə. Yə́ mə́ num ə ba ujum mbənə mbə́ mə́ ŋuw abú uŋwen. 31Yə́ mə́ inayn da anó ufon Nwiye nibə tey unó da Asɨyisəg Yeso Kristo asaŋ asaŋ nə fiŋ kaka. Cha wa moʼ kən ma uŋwen.

Currently Selected:

Ifa 28: NGI

Highlight

Copy

Compare