Ifa 25

Pol kab kwi Kayisa saʼa uŋwən

1Amaʼazənə unəy chigə uta, Festus pey ungɨŋ aba abey Judiya. Yə noʼ á Kayisariya koʼ ŋuw Yerusanem. 2Ba kyayn mbənə umə ambəŋ Nwiye, nə ba kyayn ungɨŋ abey ba Jû, ŋu ghayn unó abú uŋwən da Pol. Mbə́ ghayn nigə boʼo ubugə abú uŋwən kwi, 3Ngwə ghəy ichuŋ ina icha Pol a Yerusanem. Mbə́ ghayn nigə damugə mbə́ si tana kwi ba mbi paʼa ungɨŋ ufəʼ da zwere Pol anji. 4Festus ywiri kwi, “Pol yə ana ndəŋ á Kayisariya, foro kwi cha agha mi sa nu ami ŋú awu.” 5Yə ŋu imbəy imə ghayn abú úŋwən kwi, “Mbən cha umbən ba kyayn u swiʼi ŋu nə umugə. Yə́ bə́ gow anó moʼ, úŋwən zi usaʼa atəw ma.”

6Amaʼazənə Festus si chomo nə úŋwən akə unəy ifeyn iŋu pey akə unəy ighum, yə swiʼi ŋuw Kayisariya. Aney akuŋ, yə ŋu chomo ungɨŋ na usaʼa ghayn kwi u num Pol zaʼa nə uŋwən. 7Amaʼazənə Pol zaʼa, ba Jû mbənə mbə́ swiʼi zaʼa Yerusanem təm ikad uŋwən ni ziyə unó kaka nanaʼ atəw na nu amə cha aghəy moʼ itey kwi unó wu amə asiʼ.

8Ichi unó wu atəw ma, Pol ghayn kwi, “Cha a di ghayn aŋu anó iboŋ moʼ da unoʼo ba Jû, da imbəŋ Nwiye kə da Kayisa.”

9Asɨmə Festus kaba kwi ba Jû wuʼe uŋwən, anigə u biri abú Pol kwi, “Ngwə waʼa kaba ikoʼ iŋu á Yerusanem da u saʼa ayə awu da unó mbənə umə ziyə injə atəw?”

10Pol ywiri kwi, “Ayə təmə ungɨŋ na usaʼa Kayisa nu amə asin nu umi saʼa aŋu akuŋ. Cha a gow aŋu anó moʼ abú ba Jû anji zənə ngwə kaŋa kyay. 11Anigə abə gow anó moʼ kə ighəy anó iboŋ moʼ nu a tey kwi u zwere aŋu, cha ami ton iku. Asɨmə numugə cha asiʼ akə unó mbənə umə zi inyə atəw, cha wa moʼ mi naʼa ma aŋu abú úŋwən. Ayə kaba kwi Kayisa saʼ usaʼa uŋu.”

12Amaʼazənə Festus si inayn nə anom mbənə umə naʼa ikɨy abú uŋwən, yə ywiri kwi, “Ngwə si ghayn kwi Kayisa saʼa usaʼa uŋu. Anigə ngwə yi ŋu abú Kayisa.”

Pol təm ifigi Agripa nə Benis

13Amaʼazənə unəy moʼ chigə, ufon Agripa foro Benis ŋu chaʼara Festus a Kayisariya.#25.13 Benis mə́ unya ayey abú ufon Agripa. 14Umugə mbə́ chomo awu unəy nanaʼ, Festus ghayn da usaʼa Pol abú ufon Agripa kwi, “Anom moʼ yə akəŋ nu Feliz sayn andəŋ. 15Amaʼazənə mə ŋuw Yerusanem, ba kyayn ambəŋ Nwiye nə ba kyayn ungɨŋ abey ba Jû ghayn da usaʼa ma iniŋ. Mbə́ kab kwi a sob usaʼa kwi u zwere uŋwən.”

16“Mə ywiri abú úŋwən kwi, akə ma nigə ba Rom mə num wa naʼa abú ba mbənə u zi usaʼa atəw ma kwi u zwere. Mba yə naʼa apan kwi u bumə nə ba mbənə u zi usaʼa atəw ma da u chiyə anó atəw ma. 17Amaʼazənə mbə́ zaʼa ifere akəŋ, cha mə chiŋe aŋu amaʼ. Afəb fəb aney akuŋ, mə ŋu chomo ungɨŋ na usaʼa ghayn kwi ú zaʼa nə anóm wu. 18Amaʼazənə ba mbənə mbə́ zi usaʼa atəw ma noʼo atey, cha mbə́ zi uma unó iboŋ atəw ma anji zənə mə́ mə kono. 19Mbə́ mə́ taŋa nə uŋwən da anó Nwiye uma. Foro da anóm moʼ nu ukum ma mə Yeso nu usi iku, asɨmə Pol yə ghayn kwi u yə ikay. 20Cha a kyay aŋu umugə inwine ukudu usaʼa wu. Anigə mə́ biri abú Pol kwi yə iwuʼ iŋu a Yerusanem da u saʼ uŋwən awu da unó mbənə u zi atəw ma? 21Asɨmə Pol ghayn kwi iyə kaba kwi Kayisa saʼ usaʼa wu. Mə́ ghayn kwi ú ni nəmə uŋwən pey Amaʼazənə ami cha uŋwən abú Kayisa.”

22Agripa ghayn abú Feliz kwi, “Mə wuʼ izəw anom wu umugə amboŋ.”

Feliz ywiri kwi, “Ngwə yi zəw uŋwən asugə.”

Pol təm ifigi Agripa

23Amaʼazənə isəg kiʼi, Agripa nə Benis yeŋ ni ifon kyayn, ŋu nyi ungɨŋ na usaʼa. Mbə ŋu nyi nə atəw kyayn abú usogwi for nə ba kyayn ungɨŋ asin wu. Amaʼazənə mbə́ nyi nigə, Festus ghayn kwi u num Pol zaʼa nə uŋwən. 24Festus ghayn kwi, “Ufon Agripa nə ba ujum mbənə umə akə ungɨŋ na, mbən zən anóm uŋu nu ba Jû ujum mbənə umə Yerusanem zi usaʼa atəw ma. Umbə ghayn kwi, cha adi kəʼ kwi u sey uŋwən ikay. 25Mə zən kwi cha udi gow ma anó moʼ nu atey kwi uzwere uŋwən. Asɨmə umugə u ghayn ma amboŋ kwi, Kayisa saʼa usaʼa awu, mə beni kwi ayi cha uŋwən a Rom. 26Asɨmə kwaʼa cha anó moʼ iniŋ iŋwaʼanayn abú Kayisa da uŋwən. Anigə mə num uŋwən zaʼa itən ifigi. Amara mə u ngwə ufon Agripa, da mba bə nwine usaʼa ma, ayi mə nə anó moʼ iŋwaʼanayn. 27Amə kaŋa anó neŋ kwi a cha wa ndəŋ abú ufon kyayn nu cha aŋwaʼanayn aŋu usaʼa ŋunə u zi atəw ma.”

Currently Selected:

Ifa 25: NGI

Highlight

Copy

Compare