Ifa 24
24
Gobuna Feliz saʼa Pol
1Amaʼazənə unəy itɨŋ chigə, atəw abú ba mbənə umə faʼa ambəŋ Nwiye nu amə tiya akə Ananiyas nə ba kyayn moʼ ungɨŋ abey, nə wa moʼ nu yə kyay unoʼo nu ukum ma mə Tertulus, mbə́ swiʼi ŋuw Kayisariya. Mbə pey yi ghayn usaʼa ŋunə yə́ mə́ abú úŋwən nə Pol abú gobuna Feliz. 2Amaʼazənə mbə́ tiya Pol u zaʼa, Tertulus zi usaʼa atəw ma ghayn kwi, “Wa kyayn Feliz, mba si chomo akə aborobod injə́ aton akə agha sá, iwe zənə imə inigə si aghəy unó nanaʼ kyabay ungɨŋ abey zəŋ. 3Mba beni unó mbəŋ ujum nə iwuʼi akə nji ujum ungɨŋ usin ujum. Mba yə naʼa yə beni yə inigə akə ita fiŋ ujum. 4Cha amə kaba aŋu ichiŋe injə ma nanaʼ, Asɨmə, ayə boʼo ubugə inigə kwi ngwə num fiŋ chomo izwaray ŋwə̂ asin anó ŋənə mba mə kaba ighayn inigə.”
5“Mba si zən anóm ŋunə ni wa ŋunə umə kaba usaʼa, yə́ aghəy indum akaʼa ba Jû ujum ungɨŋ isəg. Uŋwen amə atəw akə ufere ŋunə umə tiya akə ufere Nazarin.#24.5 Amə ba mbənə mbə́ niŋe anjim Yeso wa Nazared. 6Yə kab kwi nji yə tebe imbaŋ Nwiye, asɨmə mba ibiya uŋwən [mba kab isaʼa uŋwən anji zənə umba unoʼo mə tey, 7anigə Lisiya nu amə atəw kyay abú usogwi zaʼa chi uŋwən ita inya ubugə akə ikay. 8Yə ghayn kwi, anóm mbənə u zi usaʼa atəw ma u zaʼa ghayn inigə] ngwə mbə́ nwine uŋwən anji chuŋ, ngwə yi kyay asiʼ da unó ujum mbənə mba zi atəw ma.”
9Ba Jû umbi ujum nibi bumə Tertulus uzi usaʼa atəw Pol ghayn kwi, unó ujum mbənə u ghayn amə unó asiʼ.
Pol chi anó atəw ma ifigi gobuna Feliz
10Amaʼazənə gobuna Feliz aghəy anwini akə abugə kwi Pol u nayn, Pol ghayn kwi, “Mə kyayn kwi ngwə si saʼ abey zəŋ akə ituʼ nanaʼ. Anigə mə wuʼ itəm inji ifigi da ichi unó mbənə anóm mbəŋ zi inyi atəw. 11Ngwə bə nwine anji chuŋ, ngwə yi zən kwi cha unəy di si chigə uma ighum cho bigə nu mə koʼ ŋú á Yerusanem da iwumini Nwiye. 12Cha ba Jû di zən uma aŋu akə ataŋa nə wa moʼ ambəŋ Nwiye kə ibuw idum ungɨŋ na bumi ba Jû kə asin moʼ ungɨŋ Yerusanem. 13Cha a nwine moʼ amə aghəy u tey inigə kwi unó mbənə u zi inyə atəw amə asiʼ 14Asɨmə mə beni inigə kwi ayə wumine Nwiye umba mbaʼ imbey ni niŋe anjim Nji zənə Kristo mə́ tey. Nu umə tiya kwi amə ufere figə unó. Mə beni unó ujum mbənə umə ungɨŋ unoʼo Mose nibi beni u mbənə ba ukən Nwiye ŋwaʼanayn 15Mə zi fiŋ inyo Nwiye numugə ba mbəŋ uzi, kwi ba mbənə umə aghəy unó mbənə u kəʼərə ifigi Nwiye nə ba mbənə umə aghəy unó iboŋ umbi zəmə. 16Anigə, ayə zi ikay ighəy anó zənə ami aghəy kwi inyi fiŋ zayn ifigi Nwiye nibi zayn ifigi ba. 17#Ifa 21.17-28Mə noʼ á Yerusanem si chomo isəg akə ituʼ nanaʼ, mə wene iŋu a Yerusanem boʼo inaʼ ukab abú ba ukwaŋ nibi naʼ u aghəy ifaʼ abú Nwiye. 18Amə Amaʼazənə mə́ mə ghayn anó zəŋ nu mbə́ zən aŋu ungɨŋ imbəŋ Nwiye nu mə si aghəy inyi inyo zayn. A mə cha ba nanaʼ aboʼo inyə, amə cha indum moʼ. 19Ba Jû moʼ nu mbə́ noʼo Esiya mə awu. Mbə di mə nə anó moʼ da aŋu, nji mbə́ mi zaʼa zi usaʼa inyə atəw inji ifigi. 20Numugə cha úŋwən akəŋ, ba mbəŋ ghayn anó zənə mə gow amaʼazənə mə təm ifigi mbə́ saʼa abey, 21#Ifa 23.6Chigə akə anó feyn nu mə təm ifigi ma ikyay akə ikay ghayn kwi, ‘Mbən yə́ saʼa aŋu akə̂choŋ damugə a beni kwi ba mbi zəmə.’”
22Feliz ŋunə yə tana ikyay anó da unó mbənə Yeso mə tey, yə nwi saʼa aŋu ghayn kwi, “Amaʼazənə Lisiya nu amə atəw kyayn abú usogwi mi zaʼa, i yi sob usaʼa uŋu.” 23Amaʼazənə yə́ ghayn nigə, yə́ ghayn abú atəw abú usogwi ukɨ feyn kwi, u num Pol ŋu ni nəmə uŋwən. Asɨmə u naʼa apan abú uŋwən kwi u aghəy unó mbənə u wuʼi. Foro kwi, u sayn kwi, u zi ma zaʼa naʼa u aghəy mbənə umə kaba.
Pol nayn abú Feliz foro abú Drusila
24Amaʼazənə unəy moʼ chigə, Feliz zaʼa nə uyey ma nu ukum ma mə Drusila. Uyey ma mə wa Jû. Mbə zaʼa nigə cha wa uŋu tiya Pol izəw unó mbənə yə mə ghayn da nji zənə amə aghəy wa zi fiŋ igun Yeso Kristo. 25Asɨmə umugə Pol mə ghayn da uno mbənə ukoʼoro da anó ni yimə inyo foro da anó kwi Nwiye yi saʼa isəg, Feliz gəd anigə ighayn kwi, “Ngwə akinine. Amaʼazənə ami mə nə apan, ayi gha tiya ayə ighari chini.” 26Feliz mə́ nibi kono kwi, Pol yi naʼa ukab abú uŋwən da izon uŋwən anigə yə mə ka cha ba kwi u tiya Pol zaʼa mbi nayn.
27Amaʼazənə ituʼ bigə si chigə, Posiyus Festus jəg atən Feliz ni gobuna. Umugə Feliz kaba kwi ba Jû wuʼi uŋwən yə sayn Pol andəŋ.
Currently Selected:
Ifa 24: NGI
Highlight
Copy
Compare
Share
Want to have your highlights saved across all your devices? Sign up or sign in
© 2023 CABTAL
