Ifa 23

1Pol toŋ aghɨ inyo mbə saʼa abey wu ghayn kwi, “Umbəŋ unya, iŋu pey akə̂choŋ, mə chomo ifigi Nwiye ni fiŋ zənə i zayn kwaʼa anji chuŋ.” 2Atəw abú ba mbənə umə faʼa ambəŋ Nwiye nu umə tiya akə Ananiyas ghayn abú ba mbənə mbə́ təm iyad Pol kwi u kono uchəw ma. 3#Mat 23.27, 28Pol ghayn abú uŋwən kwi, “Nwiye yi kono a yə. Ngwə chomo ni ubəm na ŋunə umə boŋo aba isəg. Ngwə kwaʼa kono kwi iyə saʼa aŋu anji zənə unoʼo mə itey, anigə ngwə gow noʼo ighayn kwi u komo aŋu!”

4Anom mbənə mbə́ təm iyad Pol ghayn kwi, “Ngwə jimə atəw kyay abú ba mbənə umə́ faʼa ambəŋ Nwiye!”

5Pol ywiri kwi, “Umbuŋ unya anom, cha mə di kyayn kwi uŋwən mə atəw kyayn abú mbənə umə́ faʼa ambəŋ Nwiye, damugə ayə ungɨŋ Aŋwaʼanayn Nwiye kwi, ‘ighayn ayə anó iboŋ da ba mbənə umə tumə ngwen.’” 6#Ifa 26.5; Fil 3.5Amaʼazənə Pol zən kwi, ba moʼ akaʼa ba wu amə ba Sadusi, nibi zən kwi uchini amə ba Farasay, yə ghayn akaʼa mbə saʼa abey wu kwi, “Umbuŋ unya anom, amə wa Farasay. Uŋu mbaʼ nə ingo mbə ba Farasay. Mbə́ num aŋu zaʼa isaʼ akəŋ damugə, mə zi fiŋ ni nəmə kwi, ba mbi zəmə.” 7Amaʼazənə yə ghayn ney, ba Sadusi nə ba Farasay ti ni taŋa anigə ufere wa ghaba. 8#Mat 22.23; Mak 12.18; Luk 20.27Yə ghaba damugə, ba Sadusi mə ghayn kwi cha ba mi zəmə foro kwi cha angəd kə azugə awu. Asɨmə ba Farasay beni unó mbəŋ ujum. 9Ba ti ni kyay akə ikay anigə mbə́ taʼa ba akə unoʼo, u moʼ nu amə ba akə ufere ba Farasay noʼ təm atey ighayn kwi, “Cha anom ŋunə di aghəy ma anó iboŋ moʼ. Ighari moʼ angəd kə azugə nayn abú uŋwən!” 10Amaʼazənə ataŋa wu si ka, atəw abú usogwi gəd kwi anóm wu umbi peŋi Pol akə uba. Anigə yə ghayn abú usogwi kwi, mbən swiʼi ŋu num Pol akaʼa uma iŋu ungɨŋ ukam uma.

11Akə afəb wu, Asɨyisəg Yeso təm iyad Pol ghayn kwi, “Yimə fiŋ! Numugə ngwə si ghayn anó da aŋu a Yerusanem, ngwə yi nibi ghayn á Rom.”

Ba Jû moʼ tə́ únaŋ izwere Pol

12Amaʼazənə isəg kiʼi, ba Jû moʼ bumə ni tə́ únaŋ. Mbə́ meʼe uma kwi cha umi jəg kə nugə aghəy moʼ pey Amaʼazənə umi zwere Pol. 13Unun ba ŋunə yə́ itə́ únaŋ wu chigə ma akə ighumi kyugə. 14Amaʼazənə mə́ tə́ nigə, mbə́ ŋú abú atəw abú ba mbənə umə faʼa ambəŋ Nwiye nə be kyay mbənə umə ungɨŋ abey Jû ghayn abú úŋwən kwi, “Mba si kaʼ kwi cha mba mi jəg aghəy moʼ pey Amaʼazənə mba mi zwere Pol. 15Anigə, umbən nə mbə́ saʼa abey, mbən tom ukən abú atəw abú usogwi kwi u cha Pol inen. Mbən aghəy ni kwi mbən yə kaba itana inwine usaʼa ma kwaʼa anji chuŋ. Mba si tana inyo izwere uŋwən ki u si pey akəŋ.”

16Amaʼazənə mbə́ mə́ tana nigə, ajoŋ unya ayey Pol zəw. Anigə yə ŋu nyi ungɨŋ ukam usogwi ighayn anó wu abú Pol. 17Amaʼazənə Pol zəw anó wu, yə tiya atəw moʼ abú usogwi ukɨ feyn ighayn abú uŋwən kwi, “Num ajoŋ zəŋ ŋú nə uŋwən abú atəw kyayn abú usogwi. U wə nə anó moʼ ighayn abú uŋwən.” 18Anigə atəw abú usogwi ukɨ feyn wu num ajoŋ wu, ŋu abú atəw kyayn abú usogwi. Yə pey yi ghayn abú uŋwən kwi, “Pol wa ndəŋ tiya aŋu ghayn kwi a num ajoŋ zəŋ zaʼa inigə, u wə nə anó moʼ ighayn inigə.”

19Atəw kyayn abú usogwi yimə abugə ajoŋ wu u tini ŋú iyad anigə u biri abú uŋwən kwi, “Amə anó ngiya ami nigə ngwə mə kaba ighayn iniŋə?”

20Ajoŋ wu ywiri kwi, “Ba Jû moʼ si beni kwi umbi ghayn inigə kwi, ngwə num Pol swiʼi iŋu nə uŋwən ungɨŋ na usaʼa asugə. Ighayn kwi umbə kaba nwine anó da uŋwən kwaʼa anji chuŋ. 21Asɨmə, i zəw ayə anó zənə u mə́ ghayn damugə ba moʼ mbə́ awu chigə ma akə ighumi kyugə nu u paʼa mə nəmə uŋwən. Úŋwən si meʼe uma kwi cha umi jəg kə nugə aghəy moʼ pey Amaʼazənə umi zwere Pol. Akinine, mbə́ si tana inyo ighəy nigə. Umə nəmə amə kwi ngwə beni anó zənə u ghayn inigə.”

22Anigə, atəw kyayn abú usogwi chire ajoŋ wu kwi, “Ighayn yə abú wa moʼ kwi wə si ghayn anó zəŋ iniŋ.” Yə aghəy nigə ghayn abú ajoŋ wu kwi u ŋuw ma.

Atəw kyayn abú usogwi cha Pol abú gobuna Feliz

23Atəw kyayn abú usogwi, tiya utəw bigə abú usogwi ukɨ feyn ghayn abú úŋwən kwi, “Mbən num akɨ usogwi bigə nə usogwi ighumi sambigə nu umə noro ingey foro akɨ usogwi bigə nu umə zoŋo nə ighoŋ. Mbən yi noʼ afəb akə unyama abəw iŋuw Kayisariya. 24Mbən tana ingey moʼ nu Pol mi koʼ igun. Mbən nəmə uŋwən kwaʼa anji chuŋ ŋu na uŋwən abú gobuna Feliz.”

25Atəw kyayn abú usogwi ŋwaʼanayn da anó zəŋ kwi:

26Amə umugə kluyadiyus Lisiya ŋwaʼanayn aŋwaʼanayn zəŋ. Ayə ŋwaʼanayn inigə u ngwə wa kyayn gobuna Feliz. A yə chaʼara yə. 27Ba Jû ibiya anóm ŋunə kaba izwere uŋwən, mə zəw kwi amə wa Rom. Anigə, mə́ ŋu nə umbəŋ usogwi mba ŋu chi uŋwən inya ubugə uma. 28Mə́ mə kaba ikyay asiʼ akə usaʼa ŋunə u zi atəw ma, anigə mə́ num uŋwən iŋu ungɨŋ na usaʼa uma. 29Mə́ pey yi zən kwi, cha uŋwən aghəy ma anó moʼ nu atey kwi u zwere uŋwən kə u zi uŋwən andəŋ. Usaʼa ŋunə mbə́ mə́ ziyə atəw ma amə anó da unoʼo ma. 30Amaʼazənə mbə ghayn iniŋ kwi, umbə sə itə́ únaŋ da i zwere uŋwən, mə zən kwi a cha uŋwən inigə. Mə́ si ghayn abú ba mbənə u zi usaʼa atəw ma kwi, u zaʼa ighayn anó zənə u aghəy inigə.

31Usogwi wu aghəy aba nji zənə, atəw kyayn abú usogwi ghayn abú úŋwən. Anigə mbə́ num Pol afəb iŋuw Antipatris. 32Amaʼazənə isəg kiʼi, usogwi mbənə mbə́ mə́ iyeŋ ughəw wene iŋu ukam usogwi. Anigə u mbənə mbə́ koʼo ingey ŋu nə Pol. 33Amaʼazənə mbə ŋu pey a Kayisariya, mbə́ naʼ ŋwaʼanayn wu abú gobuna wu nibi naʼ Pol aboʼ. 34Amaʼazənə gobuna foŋo aŋwaʼanayn wu, yə biri aba abey zənə Pol noʼo awu. Amaʼazənə yə́ zəw kwi Pol noʼo Selisiya, 35yə ghayn kwi, “Ayi zəw anó da usaʼa ŋunə Amaʼazənə ba mbənə u zi usaʼa injə atəw mi zaʼa. Anigə, yə ghayn kwi u num Pol ŋú zi ungɨŋ itoʼ Herod ni nəmə uŋwən.”

Currently Selected:

Ifa 23: NGI

Highlight

Copy

Compare