Ifa 22

1“Umbuŋ unya anóm nə umbuŋ mbaʼ, mbən zwaray anó zənə ami ghayn injən ifigi da ichiyə anó inyə atəw.” 2Amaʼazənə mbə́ zəw kwi u yə nayn abú úŋwən akə inayn Hibru, mbə tana ichuʼ izey. Anigə u ghayn kwi, 3Amə Jû mbə́ ibə́ aŋu Tasus á Selisiya. Mə kwey akə Yerusanem. Ikweme aŋwaʼanayn aton Gamaliyə́. Mbə́ taʼa aŋu anji chuŋ akə ikɨy tənə mbə́ naʼ abú umba umbaʼ imbey. Mə nibi zi atəw akə afaʼa Nwiye numugə umbən ujum mbən zi akə̂choŋ. 4Mə́ nwine inya ughəw ba mbənə mbə́ beni akə Nji izwere moʼ, Mə́ mə ibiya anóm nə ayey ŋuw zi andəŋ. 5Atəw kyayn abú ba mbənə umə́ faʼa ambəŋ Nwiye nə mbə́ saʼa abey ujum nibi beni kwi anó zənə amə ghayn amə anó asiʼ. Mə́ num á ŋwaʼanayn abú úŋwən iŋu naʼ abú ba Jû mbənə umə Damaskos. Anigə mə ŋu awu da ibiya ba mbənə u beni Kristo ikod inum zaʼa a Yerusanem da u nyiyə úŋwən.

Pol ghayn umugə Yeso beŋe uŋwən

6Amə angom ika nu mə́ mə sə tine iyad Damaskos, u zayn zayn moʼ noʼ azobo ikad aŋu. 7Mə́ gow asey anigə izəw igəg nu ighayn iniŋ kwi, “Sol, Sol, ngwə mə nwine itəŋ inya ughəw da ngiya?” 8Mə biri kwi, “Asɨyisəg ngəw mə ngwa?” Yə ywiri kwi, “Amə Yeso wa Nazared ŋunə ngwə mə nwine inya ughəw ma.” 9Anom mbənə mə́ mə nə úŋwən zən u zayn zayn wu, asɨmə cha mbə di zəw uma igəg zənə yə́ mə inayn iniŋ.

10Mə́ biri kwi, “Asɨyisəg a ghini ngiya?” Asɨyisəg ghayn iniŋ kwi, “Noʼ atey ŋu nyi ungɨŋ Damaskos. Ngwə yi mbə pey awu, wa moʼ yə ghayn anó zənə Nwiye kaba kwi ngwə faʼa abú uŋwən.” 11U zayn zayn wu aghəy a fəgə, anigə anóm mbənə mə́ mə yeŋ nə úŋwən yimi abugə iniŋ mba ŋu nyi a Damaskos. 12Anom moʼ mə awu nu ukum ma mə́ Ananiyas, yə́ zi fiŋ inyo Nwiye. Yə́ mə nibə isey unoʼo Mose. Ba Jû ujum mbənə mbə́ mə́ awu mə wumine uŋwən. 13Yə zaʼa izən aŋu pey yi təm inyi iyad ghayn kwi, “Uŋu unya anóm Sol, gha izən usin.” Aba ighari wu, mə gha ki zən usin. Anigə izən uŋwən.

14Yə ghayn iniŋ kwi, “Nwiye umba mbaʼ imbəy, choʼo ayə kwi ngwə kyay unó mbənə u kaba. Kwi ngwə zən wa faʼa ma ŋunə umə aghəy unó nu ukoʼoro foro kwi ngwə zəw inayn uchəw ma. 15Boʼo ngwə mi ghayn unó ujum mbənə ngwə zən ə nibi zəw da uŋwən abú ba ujum. 16Anigə akinine, ngwə mə nəmə ngiya? Noʼo atey inum une i chaʼara Nwiye da umi səw umbə unó iboŋ.”

17“Mə́ wene iŋu a Yerusanem. Amaʼazənə mə́ mə chaʼara Nwiye, ungɨŋ imbəŋ Nwiye ukaŋ chigə aŋu. 18Akə ukaŋ wu, mə zən Asɨyisəg u ghayn iniŋ kwi, ‘Yabi aghəy noʼ a Yerusanem amara mad, damugə cha ba mbənə umə akəŋ, u mi beni uma anó zənə ngwə mi ghayn da aŋu.’ 19Mə ywiri abú uŋwən kwi, ‘Asɨyisəg, úŋwən kaŋa kyay kwi mə́ mə ŋuw ungɨŋ na buni ba Jû, ibiya ba mbənə u beni ayə zi andəŋ nibi som. 20#Ifa 7.58Amaʼazənə mbə́ zwere Stifin ŋunə yə́ mə́ ghayn anó da ayə, mə́ mə akuŋ ibeni kwi uzwere uŋwən. Mə́ mə nəmə ndwi ba mbənə mbə́ zwere uŋwən.’

21Asɨyisəg ghayn iniŋ kwi, ‘ŋuw, Ayi cha ayə agha sa abú ba mbənə akaʼa ma ba Jû.’”

22Ba wu mə zwaray inayn Pol pey Amaʼazənə yə́ ghayn anó zəŋ. Anigə mbə́ kyayn akə ikay ghayn kwi, “Mba niy uŋwən igun isəg! Cha u di kəʼərə ma imə ikay!”

23amaʼazənə mbə́ mə́ kyayn nigə imiyə ndwi uma nibə maʼa imboyi ufə, 24atəw kyay abú usogwi sob kwi usogwi num Pol iŋu ungɨŋ ukam uma. Yə ghayn kwi uswayn uŋwən akə ngwat da kaba atono zənə ba mə kyayn atəw ma. 25Asɨmə Amaʼazənə mbə si kod uŋwən akə uniʼ, yə ghayn abú atəw abú usogwi ukɨ feyn nu yə təm iyad ma kwi, “Noʼo mə tey kwi u swayn wa Rom akə ngwat nu cha u sob uma usaʼa kwi yə gow anó?”

26Amaʼazənə atəw abú usogwi ukɨ feyn zəw anó zəŋ, yə ŋu zən atəw kyayn abú usogwi, pey yi biri abú uŋwən kwi, “Amə anó ngiya ngwə mə kaba ighəy ney? Anóm uŋu amə wa Rom.”

27Anigə atəw kyayn abú usogwi ŋu biri abú Pol kwi, “Ngwə mə wa Rom ə ghayn iniŋ?”

Pol ywiri kwi, “Aŋ.”

28Atəw kyayn abú usogwi ghayn kwi, “Mə́ zoŋ iməŋi wa Rom akə ukab nanaʼ.”

Pol ywiri kwi, “Asɨmə mbə́ ibə́ aŋu ni ŋwə̂ asey Rom.”

29Anom mbənə mbə́ mə́ kaba nwine Pol wene. Anigə igərə ibiya atəw kyayn abú usogwi damugə yə zən kwi yə kod Pol nu amə wa Rom.

Pol təm ifigi mbə́ saʼa abey

30Atəw kyay abú usogwi mə kaba ikyay ton zənə ba Jû mə zi usaʼa atəw Pol. Anigə, aney akuŋ, yə ghayn u za Pol. Ighayn abú ba kyayn ambəŋ Nwiye nibi ghayn abú ba ujum mbənə mbə́ mə́ saʼa abey kwi, u zaʼa bumə. Anigə yə́ num Pol u ŋu təm ifigi uma.

Currently Selected:

Ifa 22: NGI

Highlight

Copy

Compare