Ifa 21

Pol ŋuw Yerusanem

1Amaʼazənə utəw abú ba Kristo mbənə mbə́ mə́ Efesus si sayn uŋwən, mba nyi abaŋ ugwi yeŋ aba nigə ŋuw Kos. Aney akuŋ mba ŋuw Rodes anigə mba noʼ awu iŋuw Patara. 2Mba pey awu yi zən abaŋ ugwi nu amə ŋuw Fonesiya, anigə mba nyi abaŋ ugwi wu iŋu. 3Amaʼazənə mba umə sə́ zən ə Sayiprus, mba chigə aba chuŋ iŋuw Siriya. Mba pey yi təm a Tayi. Mbə chi u ghəy mbənə abaŋ ugwi wu beʼe awu. 4Awu, mba zən ba moʼ nu u beni Kristo. Mba chomo aboʼo úŋwən akə iká. Azugə zayn zayn aghəy ba wu ghayn abú Pol kwi, ka ŋuw ma Yerusanem 5Amaʼazənə unəy mbənə mba mi chomo awu si mey, mba sayn úŋwən noʼ ŋu ngwa. Ba ujum mbənə u beni Kristo foro iyey ma nə buŋ ma noʼ iŋu cha ngwa. Mba du ungɨŋ asin wu ŋu pey iyad iba yi zum utəw nwi asey ichaʼara Nwiye. 6Amaʼazənə mba mara, mba naʼara abú úŋwən noʼ ŋu nyi abaŋ ugwi, úŋwən gha wene ŋu unuʼ.

7Mba yeŋ du ungɨŋ Tayi ŋuw Tolemas. Mba pey yi chaʼara unya anóm ungɨŋ Kristo mbənə umə awu. Anigə ichomo nə úŋwən akə aney feyn. 8#Ifa 6.5; 8.5Akə aney akuŋ, mba noʼ awu iŋuw Kayisariya. Mba pey awu yi chomo ana Filip ŋunə yə́ mə́ ghayn ukən uchuŋ. Uŋwen mə wa feyn akaʼa anóm isambigə mbənə mbə́ choʼo kwi uni ghaba u aghəy á Yerusanem. 9Yə mə́ mə buŋ ayey kyugə nu cha mbə di si nam. Buŋ ayey wu mə́ ghayn ukən Nwiye. 10#Ifa 11.28Mba sí chomo awu akə unəy nanaʼ, ki wa ukən Nwiye moʼ nu ukum ma mə́ Agabús noʼo Judeya swiʼi zaʼa Kayisariya. 11Yə́ zaʼa izən ngwa. Yə pey yi num utwiy Pol ikod ughəw nə ubugə ma awu ighayn kwi, “Azugə zayn zayn ghayn kwi, ‘amə ney ba Jû mbənə umə Yerusanem umi kod wa ŋunə amə utwiy ma uŋu. Anigə inaʼ uŋwən abú ba mbənə akaʼa ma ba Jû.’”

12Amaʼazənə mba zəw anó zəŋ, umba nə ba mbənə mbə́ mə́ awu boʼo ubugə abú Pol kwi ka ŋuw ma Yerusanem. 13Asɨmə Pol ywiri kwi, “Mbən mə ghəy ney da ngiya? Mbən mə chwey isɨy ichiŋe inyi fiŋ? Mə si tana inyi inyo inyi andəŋ foro iku a Yerusanem da Asɨyisəg.”

14Umugə amə cha nji ina ikyabay anó zənə yə si siy ungɨŋ fiŋ ma, mba sayn anigə ighayn kwi, “Asɨyisəg aghəy anó zənə u kaba.”

15Amaʼazənə mba si chomo awu akə amaʼ moʼ, mba fere umba u ghəy koʼ iŋuw Yerusanem. 16Ba moʼ akaʼa ba mbənə u beni Kristo a Kayisariya, ŋu nə u mba. Mbə́ num ngwa mba ŋu chomo akuw Masɨn wa Sayiprus. Uŋwen mə wa moʼ akaʼa ba imbey mbənə mbə́ beni Kristo.

Pol ŋu chaʼara utəw akə ifere tənə imə ungɨŋ Yerusanem

17Amaʼazənə mba ŋu pey Yerusanem, unya anóm mbənə ubeni Kristo awu, num ngwa anji chuŋ. 18Aney akuŋ, umba foro Pol ŋu zən Jems. Utəw ujum akə ufere ba Kristo mə awu. 19Pol chaʼara úŋwən, anigə ghayn unó ujum mbənə Nwiye chigə anjim afaʼa ma, ighəy akaʼa ba mbənə akaʼa ma ba Jû. 20Amaʼazənə mbə́ zəw unó mbəŋ, mbə yere Nwiye ighayn abú Pol kwi, “Unya anóm, zən ichuʼ ba Jû zənə ú si beni Kristo. Úŋwen uma ujum si zi atəw inum ikɨy Mose. 21Mbə́ si ghayn abú úŋwən kwi, ngwə yə ghayn abú ba Jû mbənə umə chomo akaʼa ba mbənə akaʼa ma ba Jû kwi, ka umə sey uma unoʼo Mose. Ighayn abú úŋwən kwi, ka umə ney ma ikad buŋ ma foro kwi ka umə isey ma inji aghəy unó ba Jû. 22U mbi kaŋa zəw kwi ngwə si pey. Mba si gheni ngiya? 23Anigə aghəy anó zənə mba mi ghayn inigə. Anom kyugə moʼ mbə́ akəŋ nu usi meʼe uma abú Nwiye. 24Num mbə anóm wu iŋu aghəy inji inyo zayn ifigi Nwiye. Nibi aghəy iti ma zayn fən. Anigə ngwə naʼa u aghəy ifaʼ mbənə úŋwən mi naʼ. Ngwə bə aghəy nigə, umbi shira utəw ma. Anigə ba ujum umbi kyay kwi cha asiʼ akə unó mbənə u zəw da ayə. Umbi kyay kwi ngwə yə siyə ikɨy Mose. 25#Ifa 15.29Amə da ba mbənə akaʼa ma ba Jû nu u si beni Kristo, mba si cha aŋwaʼanayn abú úŋwən ighayn kwi, mba sob kwi ka úŋwən jəg uma aghəy moʼ zənə u naʼa ni aghəy ifaʼ abú unwiye ibuw ibuw, kwi ka u jəg u ma anəm, ka u kəd uma nyə̂ zənə iswene foro kwi ka umə aghəy ma ufibiri unó.”

26Anigə, aney kuŋ, Pol num mbə anóm wu. Ighəy inyo ma nə iyi uma izayn. Mbə́ ŋu ungɨŋ imbəŋ Nwiye anigə naʼ unəy mbənə umi chomo kə aney zənə umi səw inyo uma izayn. Anigə mbə́ nibi naʼ aney zənə umi naʼ u aghəy ifaʼ atəw wa feyn feyn.

Ba Jû ibiya Pol ungɨŋ imbəŋ Nwiye

27Amaʼazənə unəy wu sambigə nu Pol mi ghey inyo ma zayn mə sə ŋú imey, ba Jû moʼ zaʼa Esiya pey yi zən Pol ungɨŋ imbəŋ Nwiye. Mbə́ buw atəw akama ba wu ujum, mbə́ ibiya Pol. 28Amaʼazənə mbə́ ibiya nigə, mbə́ kyay akə ikay ghayn kwi, “Ba Izre, mbən ywere ngwa. Anom ŋunə yə yeŋ yə́ taʼa ba ujum ungɨŋ usin ujum kwi uni bana ba Izre, kwi ka umə isey ma unoʼo Mose, nibi bana imbəŋ Nwiye zəŋ. Akinine, yə num ba mbənə akə mə ba Jû zaʼa akə ungɨŋ imbəŋ Nwiye kwi u zaʼa tebe asin azugə zəŋ.” 29#Ifa 20.4Mbə́ ghayn ney damugə mbə́ zən Trofimus nə Pol á Yerusanem. Trofimus wu mə wa Efesus anigə mbə́ kono kwi Pol num uŋwən u ŋu nyi ungɨŋ imbəŋ Nwiye.

30Abuyi du akaʼa ba ujum á Yerusanem. Anigə, mbə́ nod ŋu fere i ibiya Pol ighəw uŋwən chi ungɨŋ imbəŋ Nwiye. Aba ighari wu, u ghəbə ubunuʼ ambəŋ Nwiye. 31Amaʼazənə mbə́ mə́ kaba izwere uŋwən, Ukən wu ŋu pey abú atəw kyayn abú usogwi Rom kwi indum du ungɨŋ Yerusanem ujum. 32Amaʼazənə yə zəw anó zəŋ, yə num atəw abú usogwi ukɨ feyn nibi num usogwi u nod swiʼi iŋu zən akama ba wu. Amaʼazənə akama ba wu zən atəw kyayn abú usogwi Rom, nibi zən usogwi wu, mbə́ sayn imə somo Pol.

33Atəw kyayn abú usogwi wu, ŋú ibiya Pol ghayn u kod akə ndəŋ bigə. Yə biri kwi, “Wa ŋunə amə ngwa? Amə anó ngiya u aghəy?” 34Ba moʼ akaʼa akama ba wu mə kyay ghayn anó feyn, u moʼ ni kyay ghayn anó chini. Umugə mbə́ mə́ joʼo, cha atəw kyayn abú usogwi di kyay ma asiʼ da anó zənə yə duw. Anigə yə ghayn kwi u num Pol iŋu ungɨŋ ukam usogwi. 35Amaʼazənə mbə́ pey akə ustep, usogwi wu beʼere Pol damugə akama ba wu mə kaba isom uŋwən izwere. 36Akama ba wu mə yeŋ ŋuw aboʼo úŋwən yə kyay akə ikay ghayn kwi, “U zwere uŋwən!”

Pol nayn abú ba wu

37Amaʼazənə mbə́ mə́ sə ŋu nyi ungɨŋ ukam usogwi nə Pol, Yə biri abú atəw kyayn abú Usogwi kwi, “A ghayn anó moʼ inigə?”

Atəw kyayn abú usogwi biri abú uŋwən kwi, “Ngwə mə inayn Grik? 38Anigə cha ngwə mə yə wa Ijip ŋunə yə́ ti indum anigə inum mbə́ səgə atəw ichuʼ kyugə uŋu ungɨŋ imbayn zomo?”

39Pol ywiri kwi, “Amə Jû, wa Tasus a Selisiya nu amə asin kyayn. Mə boʼo ubugə kwi sayn a nayn abú ba mbəŋ.” 40Amaʼazənə atəw kyayn abú usogwi sayn uŋwən kwi u nayn, Pol təm akə ustep ighəy anwini abú ba wu akə ubugə kwi u chuʼ izey. Amaʼazənə mbə́ chuʼ izey, yə́ nayn abú úŋwən akə inayn Hibru kwi.

Currently Selected:

Ifa 21: NGI

Highlight

Copy

Compare