Ifa 20

Pol wene ŋuw Masedoniya nibi ŋuw Gris

1Amaʼazənə indum wu si bow, Pol cha ba kwi u tiya ba mbənə u beni Kristo asin feyn. Amaʼazənə yə́ si nayn abú úŋwən kwi ú yimə fiŋ yə naʼara abú úŋwən noʼ iŋuw Masedoniya 2amaʼazənə yə́ mə́ chigə ungɨŋ aba abey wu, yə́ mə́ yeŋ yə zi ika abú ba ungɨŋ usin wu akə inayn nanaʼ. Yə́ mə́ ghəy nigə ŋu pey Achaya. 3Yə chomo awu akə aməg ta. Anigə yə́ tana inyo i wene iŋu Siriya, yə zəw kwi ba Jû moʼ mbə́ tə́ únaŋ da izwere uŋwən. Amaʼazənə yə zəw nigə, yə num ungɨŋ fiŋ ma kwi iyi wene iŋu chigə Masedoniya ki si ŋuw Siriya. 4Sopata nu amə ŋwə̂ Pirus wa Beriya ŋu nə uŋwən. Aristakus foro Sekundus nu amə ba Tesalonika ŋú nə uŋwən Timoti foro Tayikikus nə Trofimus ba Esiya nibi ŋú nə uŋwən. 5Mbə́ anóm wu ŋú imbey pey ni nəmə ngwa a Trowas. 6Amaʼazənə ufere ŋunə umə jəgə ingəŋ nu cha ma afuro chigə, mba nyi abaŋ ugwi Filipi num unəy itɨŋ ŋú kuw úŋwən á Trowas. Mba chomo awu akə unəy sambigə.

Pol zəmə ajoŋ moʼ á Trowas

7Anjaʼ aney sode, mba ŋú fere ijəg Itara Asɨyisəg. Umugə Pol mə kaba kwi iyi noʼ aney kuŋ yə́ nayn abú ba iŋu pey uzimi. 8Unam nanaʼ mə bəŋe atəw na aneŋ zənə mba fere awu. 9Ajoŋ moʼ nu ukum ma mə́ Yutikus, chomo ubəg afin na. Umugə Pol mə́ bə́ inayn ŋuw imbey, yə́ fwayn ambuni kaka anigə du ifwayn akə na aney zənə iŋu pey akə iwaŋ ita. Amaʼazənə mbə́ ŋu yimə uŋwən kwi u beʼere, yə si ku. 10Pol swiʼi ŋu pey yi gow igun ma num uŋwən yimi akə ubugə ghayn kwi, “Mbən goro ngwən! U yə bugə ma ikay.” 11Amaʼazənə Pol wene iŋu ungɨŋ atəw na aney, mbə jəg Itara Asɨyisəg. Yə́ mə́ inayn abú úŋwən iŋu pey Amaʼazənə isəg kyiʼi. Amaʼazənə isəg kyiʼi, yə́ noʼ ŋuw ma. 12Mbə́ num ajoŋ wu ŋu unuʼ ikay. Iwuʼi sugi ungɨŋ fiŋ ba wu.

Pol noʼo Trowas iŋuw Miletus

13Mbá ŋu imbey nyi abaŋ ugwi kwene iŋuw Asos asin nu mba mi pey yi num Pol awu. Pol tana kwi mba nyi abaŋ ugwi damugə yə mə kaba iŋu awu asey. 14Amaʼazənə yə́ kuw ngwa Asos, mba num uŋwən ungɨŋ abaŋ ugwi iŋuw Mitilene. 15Mbá noʼ awu nyi abaŋ ugwi ŋu iyad Chiyos sə ŋu pey isəg kyiʼi, Isəg kyiʼi aney akuŋ mba ŋuw Samos. Aney chini chigə, mba ŋu pey Miletus 16Ighəy kwi ka mba chiŋe ngwa amaʼ Esiya, Pol num ungɨŋ fiŋ ma kwi, mba yi chigə iyad Efesus. Yə́ mə́ kaba kwi inji mə awu, ú pey a Yerusanem ki ufere Pentekos sə ŋu kəʼ.

Pol naʼana abú utəw mbənə u mə cha ufere ŋunə umə Efesus

17Pol pey Miletus cha ukən abú utəw mbənə umə cha ufere ba Kristo ŋunə umə Efesus kwi, u zaʼa kuw ayi. 18Amaʼazənə mbə́ zaʼa, yə ghayn abú úŋwən kwi, “Mbən kwaʼa kyay umugə mə́ mə chomo injən akaʼa akə amaʼ ujum zənə mə́ mə nə umbən. Iti aney imbey zənə mə́ pey Esiya. 19Mə kwaʼa num inyi inyo asey, ifaʼ abú Asɨyisəg nə isɨy aghɨ ka nə mə di zəw ingəʼ ubugə ba Jû moʼ nu mbə́ tana kwi uzwere aŋu. 20Mbən kyay kwi, cha mə di ino aŋu anó moʼ nu iywere ngwen. Mə tey unó ujum inen ifigi ba, nibi tey ungɨŋ na na. 21Ayə ghayn abú ba Jû foro abú ba mbənə akə ba Jû kwi, u beŋe itən fiŋ ni wumini Nwiye, nibi zi fiŋ igun ungwa Asɨyisəg Yeso. 22Akinine, Azugə zayn zayn tom aŋu kwi a ŋuw Yerusanem. Cha a kyay aŋu anó zənə ami du nə umugə awu. 23Anó zənə a kyay amə kwi, Azugə zayn zayn yə ghayn ineŋ usin ujum kwi indəŋ nə ingəʼ yə nəmə aŋu. 24Asɨmə cha amə num aŋu inyi tənə kwi amə aghəy moʼ ineŋ. Ayə kaba aba kwi amara afaʼa zənə Asɨyisəg Yeso naʼa ineŋ kwi a faʼa. Afaʼa wu amə kwi a ghayn ukən uchuŋ da ichuŋ Nwiye.”

25 # 2Ti 4.7 “Akinine mə kyay kwi, cha wa moʼ akaʼa u mbən mbənə, mə́ mə yeŋ yə́ ghayn da anó ufon Nwiye inen, mi gha zən ma aŋu. 26Anigə ayə ghayn inen akə̂choŋ kwi wa moʼ injən kaʼa bi sam itəni cha inyə abugə awu, 27damugə cha a noŋ aŋu anó moʼ zənə Nwiye sey da ngwen inen. 28Anigə mbən ki ney itən inyo umbən umbən, nibə ney ba Kristo mbənə Azugə zayn zayn siy kwi mbən ki ney úŋwən. Mbən ki ney ufere ba Kristo ŋunə u aghəy amə ba ma anjim anəm zənə ŋwə̂ ma turi. 29Mə kyay kwi amaʼazənə ami noʼ, ba mbənə umə ghəy nə ifuŋ umbi zaʼa injən kaʼa ichiŋi ufere ba Nwiye. 30Amaʼ yi zaʼa nu ba mi du injən kaʼa, ni figə unó, da ighəw ba mbənə u beni Kristo, kwi u ŋuw aboʼo úŋwən. 31Anigə mbən iwe ngwən kono kwi akə ituʼ ta cha adi iwaʼ ichede aŋu wa moʼ injən akaʼa afəb foro ingom nə isɨy aghɨ.”

32“Akinine, mə zi ngwen ungɨŋ ikyi ubugə Nwiye, nibi zi ngwen ungɨŋ inayn ma zənə imə aghəy kwi, u aghəy ichuŋ inen. Ukən chuŋ wu, u yi aghəy mbən chomo ikay nibi aghəy kwi mbən jəg u aghəy mbənə Nwiye sey abú ba ujum mbənə Nwiye aghəy u zayn. 33Cha a di si noʼ swene aŋu adoʼ da gol kə siriva kə da ndwi wa moʼ. 34Mbən kaŋa kyay kwi amə akə umbəŋ ubugə nu a faʼa ki mə nə u ghəy ujum mbənə umugə nə ba mbənə u mə aboʼo inyi mba mə́ kaba. 35Akə unó ujum, mə si tey inen kwi, yə boŋ kwi mba faʼa akə ikay da iywere ba mbənə umə iyi ma abowyi. Mbən kono inayn Asɨyisəg Yeso umugə yə́ ghayn kwi, ‘Wa ŋunə u mə naʼa yə nə aborobod chigə ma akə wa ŋunə u mə numi.’”

36Amaʼazənə Pol si ghayn unó mbəŋ, yə zum utəw nwi asey nə úŋwən u chaʼara Nwiye. 37Úŋwen uma ujum chwəy isɨy yimə Pol soro indəʼ ma. 38Mbə́ kaŋa kənə azəd damugə yə́ ghayn abú úŋwən kwi, cha umi noʼ gha zən ma uŋwən. Mbə́ aghəy nigə num uŋwən ŋu cha ungɨŋ abaŋ ugwi.

Currently Selected:

Ifa 20: NGI

Highlight

Copy

Compare