Ifa 18

Pol ŋuw Korin

1Amaʼazənə Pol sí nay abú ba ufere Ariyopagus, yə́ noʼ Atens iŋuw a Korin 2Yə pey awu yi zən wa Jû moʼ nu ukum ma mə Akwila, wa Pontus, mbə chere zaʼa Itali nə uyey ma Prisila damugə ufon Klodus sob kwi ba Jû ujum u duw a Rom. Pol a ŋu i zən úŋwən. 3Yə pey yi chomo ni faʼa nə úŋwən damugə mbə́ mə́ faʼa afaʼa feyn. Afaʼa wu mə kwi mbə́ mə́ tana i gob tənə u mə kəbərə usɨgə awu fənə damugə amə inji zənə mbə́ mə́ jəgə uma awu. 4Yə mə taŋa ni ba Jû ungɨŋ na bumi ba Jû unəy aku ba Jû ujum ikaba inji ujum ighəy kwi ba Jû ni ba mbənə akaʼa ba Jû u bəni Kristo. 5Amaʼazənə Silas nə Timoti noʼo Masedoniya zaʼa, Pol num amaʼ ma ujum imə ghayn aba inayn Nwiye i toʼoro abú ba Jû kwi Yeso mə wa ŋunə Nwiye zoʼo. 6Amaʼazənə mbə ton anó zənə yə mə́ ghayn sə zumə uŋwen akə inayn, yə gha injim ma ikoro imboyi akə ndwi ma ighayn abú úŋwən kwi idon bə́ inyi igun inen amə umben mben amboŋ mbən kaba cha inyi abugə awu. Akinine, ayə ŋuw abú ba mbənə akaʼa ma ba Jû. 7Amaʼazənə yə ghayn nigə, yə sayn úŋwən i ŋu ungɨŋ na anóm moʼ nu akaʼa ma wa Jû nu ukum ma mə Tayitus Justus. Amə wa yə mə́ wumine Nwiye. Ina ma mə iyad ina bumi ba Jû 8Krispus ŋunə amə atəw awu ungɨŋ ina ibumi ba Jû wu nə unebey ma ujum mbə beni Asɨyisəg. Ba nanaʼ chini a Koren zəw anó zənə Pol a ghayn anigə mbə beni Asɨyisəg. Umugə mbə beni nigə, mbə num une.

9Afəb moʼ, Asɨyisəg ghayn abú Pol akə ukaŋ kwi, “imə goro ayə, ŋuw imbey imə nayn abú ba ibo ayə, 10ayə nə ngwə anigə cha nji wa moʼ mi aghəy anó iboŋ moʼ inigə damugə ba nanaʼ mbənə umə ungɨŋ asin zəŋ amə umbəŋ ba.” 11Amaʼazənə Pol zəw nigə, yə chomo awu akə utu feyn nə aba. Yə chomo nigə ni ghayn inayn Nwiye abú ba mbənə umə awu.

12Amaʼazənə Galiyo mə́ gobuna á Achaya, ba Jû moʼ awu asin wu bumə iŋu ibiya Pol num ŋu ana usaʼa. 13Mbə́ pey awu yi ghayn kwi, “Anom uŋu yə buw utəw ba kwi uni wumine Nwiye akə ukudu ji nu cha ungɨŋ umba unoʼo.”

14Amaʼazənə Pol mə́ kaba inayn, Galiyo ghayn abú ba Jû wu kwi, “Ba Jû mbən zwaray! A di mə kwi mbən yə zi usaʼa igun anóm ŋunə amə kwi yə gow anó moʼ, kə kwi yə aghəy anó iboŋ kaka moʼ, nji mə mi zwaray anó zənə mbən mə ghayn. 15Asɨmə umugə amə ataŋa da inayn, ataŋa da ukum foro ataŋa da umbən unoʼo, mbən num ŋu tana umbən umbən akaʼa ma umbugə a mi mə saʼa ukudu unó uŋu.” 16Amaʼazənə yə ghayn nigə, yə́ fuw úŋwən ungɨŋ i na usaʼa wu. 17Ba Jû wu ibiya Sostenes nu amə atəw ungɨŋ na bumi ba Jû isom uŋwən ifigi na usaʼa wu. Asɨmə cha Galiyo di num ma zigə akə anó moʼ.

Pol wene iŋuw Antiyok

18Pol gha chomo á Koren akə unəy nanaʼ. Amaʼazənə yə́ noʼo awu, yə sayn unya anóm mbənə mbə́ beni Kristo awu. I num Prisila nə Akwila ú nyi abaŋ ugwi kwene iŋuw Siriya. Ki yə́ sə́ ŋu noʼo Senkreya ungɨŋ Siriya, Yə shira atəw ma anji zənə yə sí kaʼ abú Nwiye. 19Amaʼazənə mbə́ pey Efesus, Pol sayn Prisila nə Akwila awu. Yə́ ŋu nyi ungɨŋ na bumi ba Jû ni inayn nə ba Jû. 20Mbə́ ghayn abú uŋwən kwi, u chomo akə amaʼa nu nyaʼa sara, u ton. 21Asɨmə, Amaʼazənə yə́ sə́ ŋuw, yə kaʼ abú úŋwən kwi, “Nwiye bə beni, a yi gha wene izaʼa inen.” Amaʼazənə yə ghayn nigə, yə́ nyi abaŋ ugwi i noʼo Efesus. 22Amaʼazənə yə́ pey Kasariya, yə du ungɨŋ abaŋ ugwi wu koʼ ŋu chaʼara ba ungɨŋ ufere ba Kristo ŋunə umə Yerusanem. Yə́ ghəy nigə swiʼi ŋuw Antiyok. 23Amaʼazənə yə chomo awu akə maʼa moʼ, yə́ noʼ iyeŋ usin usin ungɨŋ aba abey Galesiya foro Frigiya. Yə mə yeŋ yə tere ba Kristo.

Apolos ghayn inayn Nwiye á Efesus foro á Koren

24Akaʼa maʼa zənə Pol mə́ Galatiyans foro Frigiya, wa Jû moʼ nu ukum ma mə Apolos ŋuw Efesus. Mbə́ ibə́ uŋwən á Alezandriya. Yə mə nə inayn uchəw nibi kyay unó mbənə mbə́ mə́ ungɨŋ Aŋwaʼanayn Nwiye kwaʼa anji chuŋ. 25Yə́ si kweme unó da Nji Asɨyisəg, izi fiŋ awu. Yə́ mə́ inayn ni tey unó da Yeso akə nji zənə ikoʼoro. Ka nə yə kyay aba nji zənə Jon num une. 26Yə́ mə́ ghayn inayn Nwiye ungɨŋ na bumi ba Jû akə fiŋ kaka. Asɨmə Amaʼazənə Prisila nə Akwila zəw anó zənə yə mə ghayn, mbə́ num uŋwən ŋu tana toʼoro Nji zənə Nwiye mə tey.

27Amaʼazənə Apolo kaba ŋu Achaya, ba Kristo mbənə umə Efesus tere uŋwən. Anigə iŋwaʼanayn abú ba Kristo mbənə umə Achaya kwi u num uŋwən. Amaʼazənə yə́ pey awu, yə́ naʼ awere kyayn abú ba mbənə, anjim ichuŋ Nwiye u ibeni Kristo. 28Yə́ ton ifigi ba, unó mbənə ba Jû mə́ ghayn, anigə itey abú úŋwən ungɨŋ Aŋwaʼanayn Nwiye kwi, Yeso mə wa ŋunə Nwiye zoʼo.

Currently Selected:

Ifa 18: NGI

Highlight

Copy

Compare