Ifa 17

Ba Jû mbənə umə Tesalonika nwine inya ughəw Pol

1Pol nə Sayilas chigə Amfipolis foro Apoloniya ŋu pey á Tesalonika, nu amə asin zənə i na bumi ba Jû mə awu. 2Pol ŋu nyi ungɨŋ na bumi wu anji zənə yə́ mə́ bə́ aghəy. Yə́ mə́ taŋa inay Nwiye akə unəy uta nə ba Jû mbənə mbə́ mə́ awu. 3Yə́ mə́ məgə inayn Nwiye nibə itey ungɨŋ Aŋwaʼanayn Nwiye kwi wa ŋunə Nwiye zoʼo u yi zəw ingəʼ, iku igha zəmə. Pol ghayn kwi, “Yeso wu ŋunə amə inayn da uŋwən inen amə wa ŋunə Nwiye zoʼo.” 4Ba Jû moʼ mbənə bə́ zəw inayn wu beni anigə ibumə Pol nə Sayilas. Ba Gris nanaʼ nu mbə́ zi fiŋ inyo Nwiye nə mbə ayey kyayn kyayn nanaʼ nibi bumə úŋwən.

5Amaʼazənə utəw moʼ abú ba Jû zən nigə, mbə́ ti ni kuw imbəw. Mbə ŋu fere ba izəw nanaʼ anigə ba izəw wu ti ni aghəy indum ungɨŋ asin wu. Mbə́ nod iŋu akuw Jasin nu mə awu Pol nə Sayilas mə chomo. Mbə ŋu kab úŋwən ichi cha isəg abú ba. 6Asɨmə umugə cha mbə́ di zən uma Pol nə Sayilas, mbə́ ghəw Jasin nə ba mbənə mbə́ beni Kristo num ŋu ifigi ba mbənə mbə́ mə́ tumə asin wu, pey yi ghayn kwi, “Ba mbəŋ si buw ba usin ujum a ŋunə u si nibi zaʼa akəŋ, 7anigə Jasin num úŋwən isey ungɨŋ na ma. Cha úŋwən uma ujum mə num ma unoʼo ufon Kayisa anigə u mbə ghayn kwi ufon chini yə awu nu u mə tiya akə Yeso” 8Amaʼazənə ba mbənə umə asin wu nə ba mbənə umə tumə asin wu zəw anó zəŋ, yə toboro úŋwən. 9Anigə mbə́ ghayn kwi Jasin nə ba umbi mbənə u beni Kristo u naʼa ukab ŋunə ba mə naʼa kwi u chiyə úŋwən indəŋ. Amaʼazənə mbə́ naʼa, mbə́ sayn úŋwən kwi ú ŋuw.

Anó zənə yə́ duw á Beriya

10Asə afəb, ba mbənə mbə́ beni Kristo a Tesalonika cha Pol nə Sayilas á Beriya. Amaʼazənə mbə́ pey awu, mbə́ ŋu nyi ungɨŋ na bumi ba Jû. 11Ba Jû mbənə mbə́ mə́ Beriya mə́ nə fiŋ chuŋ chigə ma akə u mbənə mbə́ mə́ Tesalonika damugə mbə́ num inayn Nwiye nə fiŋ ujum. Mbə́ mə́ foŋo inay Nwiye unəy ujum izən kwi unó mbənə Pol mə ghayn amə asiʼ? 12Ba nanaʼ akaʼa úŋwən beni Kristo. Ayey Gris kyayn kyayn nə mbə anóm Gris nanaʼ nibi beni Kristo.

13Asɨmə Amaʼazənə ba Jû mbənə umə́ Tesalonika zəw kwi Pol yə ghayn inay Nwiye á Beriya, mbə́ nibi ŋu awu pey ni zumə inayn abú ba toboro fiŋ uma. 14Aba ighari wu, ba mbənə mbə́ beni Kristo á Beriya cha ba kwi u num Pol ŋu cha iyad iba asɨmə Sayilas nə Timoti tənə á Beriya. 15Anom mbənə mbə́ num Pol ŋu nə uŋwən mbə́ yeŋ ŋu pey Atens. Amaʼazənə mbə́ mə́ gha wene, Pol tom úŋwən abú Sayilas nə Timoti kwi u yabi zaʼa ikuw ayi.

Pol ghayn inay Nwiye Atens

16Umugə Pol mə nəmə Sayilas nə Timoti á Atens, fiŋ ma mə toboro uŋwən umugə yə zən kwi unwiye ibuw ibuw sugi ungɨŋ asin wu. 17Anigə yə ŋu ni nayn ungɨŋ na bumi ba Jû nə ba Jû foro nə ba mbənə akaʼa ma ba Jû nu u zi fiŋ uma inyo Nwiye. Anigə yə́ mə́ ŋuw asin iyuŋ unəy ujum ni nayn nə ba mbənə mbə́ mə́ zaʼa awu. 18Ba iwe moʼ nu umə tiya akə ba Epikuriya nə u chini u mə tiya akə ba Stoyik ŋu kuw uŋwən ni taŋa nə uŋwən. U moʼ akaʼa úŋwən ghayn kwi, “Akama uchəw uŋu mə ghayn amə kwi ngiya?” Uchini ghayn kwi, “Yə́ chomo ni kwi u yə kaba imə ghayn anó moʼ da unwiye isoʼ.” Mbə́ mə́ ghayn ney da mugə Pol mə ghayn inayn Nwiye da Yeso foro umugə ba mi zəmə. 19Anigə mbə num Pol ŋu ungɨŋ ufere ba mbənə u mə tumə asin wu nu u mə tiya akə Ariyopagus. Mbə́ pey awu yi ghayn abú uŋwən kwi, “Mba yə kaba ikyay anó fey zənə ngwə mə itey. 20Ngwə yə ghayn ukudu unó isoʼ moʼ nu cha mba di si noʼ izəw, anigə mba yə kaba ikyay aton akə unó mbəŋ.” 21Ba Atens ujum nə ba isoʼ mbənə mbə́ mə́ awu mə́ chiŋe amaʼ uma ujum imə ghayn kə imə zəw unó fey mbənə mbə́ duw. 22Amaʼazənə Pol noʼ təm ungɨŋ ugha ufere Ariyopagus wu, wə ghayn kwi, “Ba Atens mə kaŋa zən kwi umbən ujum mbən yə wumine Nwiye akə inji ujum. 23A yə ghayn ney damugə Amaʼazənə mə́ mə yeŋ chigə, mə́ mə yə ney usin mbənə mbən mə chaʼara Nwiye akuŋ. Mə zən amoʼ nu mbən ŋwaʼanayn awu kwi, ‘abú Nwiye ŋunə cha mba di kyay.’ Anigə Nwiye ŋunə mbən mə wumine nu cha mbən di kyay amə uŋwən ŋunə amə inayn da uŋwən inen. 24#Ifa 7.48Nwiye ŋunə u tana isəg nibi tana u aghəy ujum mbənə u mə awu ungɨŋ, uŋwən amə Asɨyisəg abú azobo foro abú isey. Anigə cha amə aghəy uni chomo akə asin nu amə ba inyoŋ təw u chimi. 25Kə kwi amə ba inyoŋ atəw umi naʼ aghəy abú uŋwən ighey kwi uŋwən mə aghəy moʼ bəw abú uŋwən. Amə uŋwən mə naʼa itəni nibi naʼa azugə foro u aghəy ujum abú ba ujum. 26Yə́ tana wa feyn anigə anjim wa wu itana ba umbi ujum mbənə u mə aki igun isəg. Yə siy amaʼazənə ba mi chomo akə igun isəg nə unere akə asin uma. 27Yə aghəy nigə da ba mi mə chaʼa uŋwən, iŋu zən uŋwən. Cha Nwiye agha sá abú wa feyn feyn akaʼa inja. 28Wa moʼ ghayn kwi,

‘Mba yi ikay, ni yeŋ, mə nə itəni akə ikay nu i noʼo abú uŋwən.’

Umbən ba moʼ si ŋwaʼanayn unó nibi ghayn kwi

‘Amə asiʼ kwi, mba mə buŋ ma.’

29Numugə mba mə buŋ Nwiye, ka mba mə kono ngwa kwi Nwiye yə nə ghəy moʼ nu u tana akə gol kə akə siriva kə akə atəni. Cha uŋwən mə ma aghəy nu amə ghəy wa kono akə atəw itana akə ubugə. 30Cha Nwiye zi ma atəw akə unó mbənə ba aghəy nu cha mbə di kyay. Anigə akinine, u yə ghayn abú ba ujum usin ujum kwi u beŋe fiŋ ma. 31Yə sí siy aney nu umi chigə anjim wa ŋunə u choʼo isaʼ ba ujum ungɨŋ isəg akə ji zənə i koʼo. Yə si tey anwine abú ba ujum kwi anó zəŋ amə asiʼ. Yə́ ghəy umugə yə zəmə wa wu.”

32Amaʼazənə mbə́ zəw Amaʼazənə Pol ghayn da unó ni zəmə, u moʼ baʼaray uŋwən, asɨmə u chini ghayn kwi, “Mba yə kaba igha zəw anó zəŋ ighari chini.” 33Amaʼazənə mbə́ ghayn nigə, Pol noʼ idu ungɨŋ ufere wu. 34Asɨmə ba moʼ bumə uŋwən i beni Kristo. Wa moʼ akaʼa ba wu amə Diyonisiyus, nu amə wa moʼ akaʼa ba mbənə umə ungɨŋ ufere Ariyopagus. Ayey nu u mə tiya akə Damaris nə ba chini nibi bumə uŋwən ibeni Kristo.

Currently Selected:

Ifa 17: NGI

Highlight

Copy

Compare