Ifa 16

Timoti ŋu aboʼo mbi Pol nə Silas

1Pol yeŋ ŋuw Debe foro nə Listra asin zənə, wa moʼ nu yə beni Kristo nu ukum ma mə Timoti mə chomo awu. Ingo ma mə ayey Jû nu wə beni Nwiye, anigə mbaʼ uma mə́ wa Grik 2Ba Kristo ujum mbənə mbə́ mə́ Listra nə Ikonium mə inayn unó uchuŋ da Timoti. 3Pol kab i num Timoti iŋu nə uŋwən, anigə wə niy ikad ma. Wə ghey nigə da mugə ba Jû ujum u mbənə umə chomo asin awu kyay kwi mbaʼ Timoti mə wa Grik 4Umugə úŋwən mə iyeŋ aba abey awu mbə toʼo abú ba Kristo unó mbənə ba utom foro nə utəw ufere a Yerusanem siy beni, anigə ighayn abú úŋwən kwi uni siy unoʼ awu. 5Anigə ba Kristo ungɨŋ ifere awu mə ni beni ikay ungɨŋ Kristo ghəy unun uma ni kwey uney ujum.

Pol a zən ukaŋ amaʼazənə wə mə Trowas

6Pol, Tomoti nə Salas yeŋ ichigə iyad aba abey Frigiya nə Galesiya damugə Azugə Zayn zayn ki beni ma kwi ughayn itom Nwiye aba abey Esiya. 7Amaʼa zənə úŋwən a pey unere Mysiya mbə kaba inji inyi aba abey Bitiniya anigə Azugə Yeso ki beni ma kwi u nyi. 8Anigə mbə yeŋ chigə Mysiya iswiʼi pey Trowas 9Akə afəb wu, Pol zən wa Masedoniya akə ukaŋ nu yə təm mə boʼo ubugə abú uŋwən kwi, “Kwənə zaʼa a Masedoniya iywere ngwa.” 10Aba ghari zənə Pol a zən ukaŋ wu, mba tana inyo inoʼ iŋuw Masedoniya damugə mba si beni kwi Nwiye tiya ngwa kwi mba ghayn ukən uchuŋ abú ba mbənə umə awu.

Á Filipi, Lidiya beŋe fiŋ ma ibeni Nwiye

11Mba noʼ Trowas akə abaŋ ugwi iŋu Samotras. Anigə anəy kuŋ mba ŋu Niyapolis. 12Mba noʼo awu iŋu a Filipi ungɨŋ abaŋ ugwi, aba abey imbey Masedoniya nu a nibi ma abey nu yə mə́ ton Rom. Mba chomo awu akə uney nanaʼ.

13Akə aney akuw ba Jû, mba du ungɨŋ asin wu ŋu iyad ugwi, nu mba kono kwi asin yi awu nu ba Jû mə ŋuw bumə akuŋ chaʼara Nwiye. Mba chomo asey inayn abú mbə́ ayey mbənə mbə bumə awu. 14Wa feyn akaʼa ba mbənə mbə́ zəw anó zənə mba mə́ ghayn amə Lidiya, nu yə noʼo Tiyatira. Yə mə fənə ndwi aka unun. Uŋwen mə ayey nu yə mə́ wumine Nwiye, anigə Asɨyisəg fiʼi fiŋ kwi u zi atəw akə anó zənə Pol mə́ ghayn. 15Amaʼazənə uŋwen foro ba mbənə mbə́ mə́ ungɨŋ na ma si num une, yə kaʼa ngwa kwi, “Mbən bə sob kwi mə beni Asɨyisəg akə asiʼ anigə mba zaʼa chomo inyi na. Yə komo ngwa anigə mba ŋuw chomo boʼo uŋwən.”

Pol nə Silas mə ndəŋ a Filipi

16Amə akə aney moʼ umugə mba mə́ ŋu asin zənə mbə́ mə́ chaʼara Nwiye, mba bomo ingwaʼ ayey afaʼa nu azugə iboŋ mə ungɨŋ inyo ma. Yə́ mə́ aghəy uŋwən ghayn anó zənə amə ŋu du. Yə́ mə́ aghəy ukab nanaʼ abú wa ŋunə amə isob ma umugə yə mə kwaba ikwa. 17Yə niŋi anjim Pol foro umba, ni kyayn ghayn kwi, “Anom mbəŋ amə ba faʼa abú Nwiye achigə isəg, u mbə toʼoro nji zənə mbən mi chigə idu angəʼ.” 18Yə mə aghəy nigə akə unəy nanaʼ, anigə yə toboro Pol azəd anigə igha ma ighayn abú azugə iboŋ wu kwi, “Ayə ghayn inigə akə ukum Yeso Kristo kwi ngwə duw inyo ŋwə̂ ayey ŋunə.” Azugə wu du inyo ŋwə̂ ayey wu aba ighara wu.

19Amaʼazənə ba mbənə amə sob uma zən kwi cha nji abú úŋwən amə nə aghəy ukab, mbə́ ibiya Pol nə Silas ghəw úŋwen ŋu usin iyuŋ ŋu siy ifigi ba mbənə mbə́ mə́ tumə asin. 20Mbə́ num úŋwen ŋú ifigi ba mbənə yə́ mə́ saʼa usaʼa ighayn kwi, “Anom mbəŋ amə́ ba Jû, umbə kaba zi idum ungɨŋ inja abey.

21Umbə taʼa ngwa akə inji abey nu cha unuŋ mba unoʼo. Mba mə ba Rom anigə chama mba mi beni ngwa inji abey itəŋ kə unoʼo umbəŋ.”

22Akama ba zənə yə mə wu, bumə wa akə isob wu i zi usaʼa atəw Pol foro Silas, Mbə́ saʼa abey pəŋi ndwi Pol foro Silas anigə ghayn kwi u som úŋwən. 23Amaʼazənə mbə́ si som úŋwən azəd, mbə́ maʼa úŋwən ana indəŋ anigə ighayn abú wa ŋunə umə zi ba andəŋ kwi i ni nəmə úŋwen anji chuŋ. 24Umugə wa ŋunə umə zi ba ana indəŋ zəw ukən ŋunə, yə num Pol nə Silas maʼ atəw na ungɨŋ anigə ifa ughəw ma ungɨŋ ugha ikəg uwayn.

25Yə sə ŋu pey uzimi afəb, Pol foro Silas mə chaʼara Nwiye kyugə ukyi, anigə ba ndəŋ mbi mə zwaray abú úŋwen. 26Usə ŋu zən, imbayn ti ni nyiʼere akə ikay, atiy na ki nyiʼere. Aba ighara wu ibunu ujum fiʼi anigə indəŋ tənə mbə́ kod mba indəŋ ujum awu iza. 27Amaʼazənə wa ŋunə yə́ mə nəmə ba ana ndəŋ noʼo atey izən kwi ubunu na ndəŋ yə fiʼi, yə kono kwi ba ndəŋ ujum si du bugə, anigə yə ghəw umbey ma choʼ ambaʼ mə́ si ŋu zwere inyo ma. 28Asɨmə, Amaʼazənə Pol zən, yə kyay akə igəg kaka ghayn kwi, “ighəy ayə anó iboŋ inji inyo mba wə akəŋ umba ujum.”

29Wa ŋunə yə mə́ nəmə ba andəŋ god anigə ikaba anam, nod inyi ungɨŋ na ndəŋ igow igun ughəw Pol nə Silas. 30Anigə yə num úŋwen uŋu isəg pey yi ibiri abú úŋwen kwi, “U masaʼ aghəy anó ngiya boʼo idu angə?”

31Mbə́ ywiri kwi, “Beni akə Asɨyisəg Yeso, anigə ngwə yi du angəʼ, ungwə foro ungwə unebey.” 32Anigə mbə́ ghayn inayn Asɨyisəg abú uŋwən foro abú ba ujum mbənə mbə mə́ ana ma. 33Aba akə amaʼa wu awə afəb, wa ŋunə yə mə nəmə ba andəŋ num úŋwen ŋu səw unay uma, anigə uŋwən foro unebey ma ujum num une aba ighara wu. 34Anigə wa ŋunə yə mə́ nəmə ba ndəŋ, num Pol nə Silas ungɨŋ na ma anigə i naʼ aghəy jəgi abú úŋwen kwi u jəg. Iwuʼi sugi ungɨŋ fiŋ ma damugə uŋwən foro nə unebey ma ujum si beni Nwiye.

35Amaʼazənə isəg kyiʼi, ba mbənə mbə́ mə́ saʼa usaʼa cha uporisi nə ukən kwi, “U sayn anóm wu u ŋuw.” 36Wa ŋunə yə́ mə́ nəmə ba andəŋ ghayn abú Pol kwi, “Ba mbənə umə́ saʼa usaʼa sob kwi, u chiyə ngwən andəŋ sayn. Mbən ŋuw Akinine, anigə mbən ŋuw akə aborobod.”

37Asɨmə Pol ghayn abú wa kyayn abú uporisi kwi, “Chama mba di aghəy ngwa anó iboŋ moʼ, asɨmə mbən som ngwa akaʼa ba izi ngwa andəŋ nu mba mə ba Rom, Anigə akinine, u mbə kaba ichi ngwa isayn anjim anjim? Indəʼ, u zaʼa ichi ngwa uma ambuŋ.”

38Uporisi ghayn anó zəŋ abú mbə́ saʼa usaʼa, anigə Amaʼazənə mbə́ zəw kwi Pol nə Silas mə ba Rom, mbə́ mə́ goro. 39Anigə mbə́ ŋú ibeni igow anó ma abú úŋwen, anigə ichi úŋwen andəŋ ighayn abú úŋwən kwi u duw ungɨŋ asin wu. 40Amaʼazənə Pol nə Silas du andəŋ, mbə́ ŋu ana Lidiya. Amaʼazənə mbə́ pey ana lidiya, mbə kuw ba umbi mbənə mbə́ beni Kristo anigə i ghayn abú úŋwen kwi u yimə fiŋ. Amaʼazənə mbə́ aghəy nigə, mbə́ noʼ iŋu.

Currently Selected:

Ifa 16: NGI

Highlight

Copy

Compare