Ifa 15

Ba-tom Yeso Kristo yimə ufere á Yerusanem

1Ba moʼ noʼo Judeya swiʼi ŋuw Antiyok. Mbə pey awu ni taʼa ba mbənə u beni Kristo ighayn kwi, “Cha mbən mi du ngwən angəʼ ighari mbən ki ney ngwən itən ikad anji zənə amə ungɨŋ ikɨy mose.” 2Pol nə Banabas nyi akə ataŋa kaka nə ba wu da anó zəŋ. Anigə mbə́ choʼo Pol nə Banabas nə ba Kristo chini kwi u koʼo iŋu á Yerusanem iŋu zən ba tom foro abú ba mbənə umə cha ufere ba Kristo da anó wu.

3Umugə ufere ba Kristo tom úŋwən nigə, mbə ŋu yi chigə á Fonesiya foro Samariya yeŋ yə ghayn anó da mugə ba mbənə akaʼa ma ba Jû si beni Kristo. Ukən ŋunə aghəy iwuʼi sugi fiŋ ba mbənə u beni Kristo ujum. 4Amaʼazənə mbə́ ŋu pey á Yerusanem, ufere ba Kristo, ba tom Kristo nə ba mbənə mbə́ mə́ cha ufere ba Kristo num úŋwən anji chuŋ. Pol nə Banabas ghayn anó ujum mbənə Nwiye chigə anjim uma ighəy. 5Asəmə ba moʼ mbənə u beni Kristo nu umə ungɨŋ fere ba Farasay noʼ təm atey ghayn kwi, “Yə kə kwi u ney ikad abú ba mbənə akaʼa ma ba Jû nibi ghayn abú úŋwən kwi u ni isiy ikɨy mose.”

6Ba-tom Kristo nə ba mbənə mbə́ mə́ cha ufere ba Kristo bumə da iney anó zəŋ. 7#Ifa 10.1-43Amaʼazənə mbə́ si taŋ akə amaʼ sá, Pita noʼ təm atey ighayn abú úŋwən kwi, “Umbuŋ unya mbən kyay kwi mə akə amaʼa moʼ nu gha si sá, Nwiye choʼo aŋu injəŋ akaʼa kwi aghayn ukən uchuŋ abú ba mbənə akaʼa ma ba Jû da u zəw ibeni Nwiye. 8#Ifa 10.44; 2.4Anigə Nwiye ŋunə u kyay fiŋ ba ujum tey kwi yə beni úŋwən umugə yə naʼ Azugə zayn zayn abú úŋwən aba anji zənə yə́ naʼ ina 9Cha yə tey ma ikyaba moʼ ina nə úŋwən. Yə nibi wa unó iboŋ uma umugə mbə́ beni Kristo. 10Anigə akinine, mbən yə́ kaŋa izweʼe Nwiye umugə mbən mə kaŋa izi ikomo nu idere igun ba mbənə u beni Kristo nu cha umba umbaʼ imbey kə umba di kyay beʼe amə da ngiya? 11Anigə mba beni kwi mba yi du angəʼ anjim ichuŋ Asɨyisəg Yeso aba anji zənə úŋwən mi du.”

12Ba ujum mbənə mbə́ mə́ awu chuʼ izi umugə mbə mə́ zwaray unó mbənə Banabas nə Pol mə ghayn da mugənə Nwiye chigə anjim uma ighəy unwini unó nibi aghəy uyere unó akaʼa ba mbənə akaʼa ma ba Jû. 13Amaʼazənə mbə́ si mara inayn, Jems ghayn kwi, “Umbəŋ unya mbən zwaray anayn! 14Sayimon sí toʼoro umugə Nwiye tey kwi i yə nəmə ba mbənə akaʼa ma ba Jû. Yə aghəy nigə umugə yə choʼo ba moʼ akaʼa úŋwən kwi amə umbi.” 15Inayn zənə ba ukən Nwiye ŋwaʼanayn yə kəʼ nə unó mbəŋ. Mbə ŋwaʼanayn kwi,

16“Amaʼazənə unó mbəŋ mbí bə́ chigə, a yi gha wene izaʼa

igha noʼ anó fon Dafid zənə asi buʼe,

a yi gha noʼ anó fon wu

ghey atəm ikay.

17Anigə abuʼ ba ujum umbi kaba Asɨyisəg,

ba mbənə akaʼa ma ba Jû nu u tiya kwi amə umbəŋ ba umbi kaba Asɨyisəg.

18Amə nigə Asɨyisəg ghayn. Uŋwən ŋunə yə aghəy kyay unó mbəŋ inoʼo maʼa imbey.”

19“Anigə anó zənə a kono amə kwi, ka mba mə naʼa ngwa ingəʼ abú ba mbənə akaʼa ma ba Jû nu umə wene zaʼa abú Nwiye. 20Anigə mba ŋwaʼanayn aŋwaʼanayn abú úŋwən kwi, ka umə jəgə uma ijəg tənə u ifaʼ abú unwiye ibuw ibuw, ka umə jəgə uma isəg, ka umə koro uma nyə̂ zənə iswene, ka umə jəgə uma anəm. 21Mbə́ si foŋo unoʼo Mose akə ama sá ungɨŋ na bumi ba Jû unəy ku ba Jû ujum, anigə ighayn uno mbənə umə awu ungɨŋ usin ujum.”

Ba-tom Kristo ŋwaʼanayn aŋwaʼanayn abú ba mbənə akaʼa ma ba Jû

22Ba-tom Kristo nə ba mbənə umə cha ufere ba Kristo ŋunə umə Yerusanem nə be Kristo ujum choʼo anóm bigə akaʼa uma i tom úŋwən kwi uŋuw Antiyok nə Pol foro Banabas. Mbə tom Juda ŋunə mbə́ mə́ nibə tiya akə Basaba nə Silas. Úŋwen mə́ ba kyayn akaʼa ba Kristo mbənə mbə́ mə́ Yerusanem. 23Mbə́ cha úŋwən nə aŋwaʼanayn nu u ŋwaʼanayn kwi, “Amə umba ba tom Kristo nə ba mbənə umə cha ufere ŋunə umə Yerusanem mba ŋwaʼanayn aŋwaʼanayn zəŋ. Mba yə ŋwaʼanayn inen umbən umba unya anóm mbənə akaʼa ma ba Jû nu umə Antiyok, á Siriya foro á Selisiya. Mba yə chaʼara gwen. 24Mba zəw kwi ba moʼ du inja akaʼa zaʼa ni toboro itən fiŋ nə ukudu inayn moʼ nu cha mba ghayn ngwa kwi u zaʼa inen. 25Anigə mba nyi ufere umba ujum zən kwi yə boŋ kwi mba choʼo ba i tom u zaʼa inen nə umba unya anóm mbənə mba wuʼi azəd Pol nə Banabas. 26Nu úŋwən si chigə ungɨŋ ingəʼ da ungwa Asɨyisəg Yeso Kristo. 27Anigə mba tom Judas nə Silas inen. Umbi ghayn chini ichin unó mbənə mba ŋwaʼanayn inen uma amboŋ. 28Mba zən kwi ayi iboŋ abú Azugə zayn zayn foro ina kwi ka mba naʼa ngwa udere chini inen chigə akə unoʼo mba ghayn. 29Unó wu mə kwi, mbən mə́ jəgə ngwen u aghəy jəgi mbənə u si na nə aghəy ifaʼ abú unwiye ibuw ibuw, mbən mə jəgə gwen anəm, mbən mə kərə ŋwen nyə̂ zənə u swene, mbənə mə jəgə gwen isəg. Ayi mə anó chuŋ ighari mbən bə ki aghəy ngwen unó mbəŋ. Mbən chomo uchuŋ chuŋ.”

30Mbə́ tom ba wu u swiʼi iŋuw Antiyok. Mbə́ pey awu yi fere ba Kristo asin feyn inaʼ aŋwaʼanayn wu abú úŋwən. 31Amaʼazənə ba wu foŋo aŋwaʼanayn wu, mbə wuʼ uma azəd da inayn zənə yə́ duw ungɨŋ aŋwaʼanayn wu. Inayn wu naʼa ikay abú úŋwən. 32Judas nə Silas nu amə ba ukən Nwiye nayn abú unya anóm wu akə gha sá, ni naʼa ika abú úŋwən kwi ibeni fiŋ ma ika. 33Amaʼazənə mbə́ sí chomo awu akə amaʼa moʼ, unya anóm wu gha cha úŋwən akə aborobod abú ba mbənə mbə́ tom úŋwən. 34[Asəmə Silas chomo ma awu].#15.34 Cha asin zəŋ ungɨŋ uŋwaʼanayn moʼ.

35Pol nə Banabas tənə ma Antiyok. Úŋwen nə ba nanaʼ chini mə tey nibi ghayn inayn da Asɨyisəg.

Pol nə Banabas a ghaba

36Amaʼazənə amaʼ moʼ chigə, Pol ghayn abú Banabas kwi, “Zaʼa mba wene iŋu aboʼo unya anóm usin ujum mbənə mba ghayn inayn Nwiye awu, i zən umugə u məŋi.” 37Banabas kaba inum Jon Mak kwi ú ŋuw nə uŋwən. 38#Ifa 13.13Asəmə Pol kono kwi cha adi boŋ kwi u num wa nu yə wene ma anji Amaʼazənə imbey pey Pamfiliya nu cha u ŋuw ma i úŋwən ifaʼ. 39Anó zəŋ aghəy uni taŋa kwaʼa akə ikay anigə u ghaba. Banabas num mak ú nyi abaŋ ugwi iŋuw Sayiprus, 40anigə Pol num Silas ú ŋu nə uŋwən. Ba mbənə mbə́ beni Kristo chaʼara Nwiye abú úŋwən kwi Asɨyisəg aghəy ichuŋ abú úŋwən. 41Pol ŋu chigə Sira foro Selisa yeŋ yə zi ikay abú ufere ba Kristo ŋunə yə́ mə́ ungɨŋ usin wu.

Currently Selected:

Ifa 15: NGI

Highlight

Copy

Compare