Ifa 14

Pol nə Banabas á Ikonium

1Anó zənə yə aghəy abú Pol nə Banabas a Antiyok amə nibi aba aŋwen yə aghəy Ikonium. Amaʼazənə mbə́ pey Ikonium mbə chigə ŋu nyi ungɨŋ ina bumi ba Jû zənə yə mə awu. Mbə́ ghayn inayn Nwiye awu ungɨŋ anigə ba Jû nanaʼ nə ba mbənə akaʼa ma ba Jû mbə́ beni inayn Nwiye wu. 2Asəmə ba Jû mbənə cha mbə́ beni uma Kristo beʼere ba mbənə akaʼa ma ba Jû aghəy kwi uni bana ba mbənə u beni Kristo. 3Pol nə Banabas chomo awu akə amaʼ sá, ni ghayn inay Nwiye awu da Asɨyisəg akə fiŋ kaka. Asɨyisəg tey kwi unó mbənə umə ghayn da ichuŋ ma amə unó asiʼ umugə yə aghəy kwi uni aghəy uyere unó nibi aghəy unwini unó. 4Ba mbənə mbə́ mə́ ungɨŋ asin wu ghaba, u moʼ mə beni unó mbənə ba Jû mə ghayn, u moʼ ni beni unó mbənə ba tom mə ghayn.

5Ba mbənə akaʼa ma ba Jû nə ba Jû moʼ foro ba kyayn ma tana kwi umbi mə́ nyiyə ba tom anigə itum úŋwən akə atey. 6Amaʼazənə ba tom wu zəw anó zəŋ, mbə nod iŋuw Listra nə á Debe ungɨŋ aba abey Likaoniya foro ungɨŋ usin mbənə umə iyad iyad. 7Mbə́ pey awu ni ghayn ukən uchuŋ.

Pol nə Banabas a Listra foro a Debe

8Anom moʼ mə Listra nu amə abúʼiri wa. Ti Amaʼazənə mbə́ ibə́ uŋwən, cha u di si noʼ iyeŋ ma. 9Anom wu chomo ni zwaray anó zənə Pol mə ghayn. Pol toŋ aghɨ inyo ma i zən kwi u yə nə ibeni fiŋ amə aghəy ighəy boro. 10Anigə Pol ghayn abú uŋwən akə igəg kaka kwi, “Noʼ təm!” anóm wu noʼ itəm ti ni yeŋ. 11Amaʼazənə unoŋ ba ŋunə yə mə awu zən anó zənə Pol aghəy, mbə ti ni kyay akə inayn Likaoniya akə ikay ghayn kwi, “Unwiye beŋe akə ba swiʼi zaʼa asey ina!” 12Mbə naʼ ukum abú Banabas kwi Zeyos inaʼ ukum abú Pol kwi Hemes damugə amə Pol yə mə inay.#14.12 Zeos nə Hemes amə unwiye ma. Zoes amə Nwiye abú ba Jû anigə Hemes mə́ ŋwə̂ ma. 13wa faʼa ambəŋ Nwiye zənə mbə́ mə́ tiya akə Zeyos nu yə mə aba iyad akuŋ ŋú num ipoŋ foro ufrawa zaʼa awu uchəw ukam imbəy abey wu. Yə aghəy nigə damugə uŋwən nə unoŋ ba wu mə kaba inaʼ u aghəy ifaʼ abú ba tom.

14Amaʼazənə Banabas nə Pol zəw anó zənə mbə́ mə́ kaba ighəy, mbə́ pəŋi ndwi ma i nod ŋu ungɨŋ ugha ba wu ni kyay ghayn kwi, 15“Umbuŋ uzi, mbən mə́ aghəy ukudu unó ŋunə da ngiya? Mba mə ba nyoŋ atəw ni umbən. Mba zaʼa akəŋ nə ukən uchuŋ inen kwi mbən sayn u aghəy ibuw ibuw, mbən niŋe anjim Nwiye ŋunə umə ikay. Amə uŋwən tana azobo ni isəg foro iba nə u aghəy ujum mbənə umə awu. 16Amaʼ imbey, yə sayn ba jum kwi u chomo akə nji zənə u wuʼi. 17Asɨmə u yə bə tey anwini kwi iyə awu anji zənə umə ghəy ichuŋ inen. U yə ghəy kwi imbəŋ choʼo, inaʼ ijəg inen akə ama zənə akoʼo anigə ighəy kwi iwuʼi sugi ungɨŋ itən fiŋ.” 18Kanə ba tom di ghayn unó mbəŋ, cha unó wu di kən ma ba wu kwi ka u naʼa uma aghəy ifaʼ anji zənə mbə si kaʼ.

19Ba Jû moʼ noʼo Antiyok nibi noʼo Ikonium iŋu á Listra. Mbə́ pey awu yi gha utəw unoŋ ba wu u beni nə úŋwən. Anigə mbə́ tum Pol akə atey. Umugə mbə tumi nigə, mbə kono kwi yə si ku anigə mbə ghəw uŋwən ichi ungɨŋ Listra icha isəg. 20Asɨmə amaʼazənə ba mbənə ubeni Kristo ŋu fere iyad Pol, yə noʼ igha iŋu ungɨŋ Listra. Aney akuŋ, mbə́ noʼ nə Banabas iŋu a Debe.

Pol nə Banabas wene iŋu Antiyok aba abey Siria

21Pol nə Banabas ghayn ukən uchuŋ a Debe anigə mbə məŋə ba nanaʼ u beni Kristo. Amaʼazənə mbə ghəy nigə, mbə wene iŋu a Listra foro Ikonium nibi ŋuw Antiyok. 22Mbə mə́ yeŋ yə zi ikay abú ba mbənə u beni Kristo. Yeŋ yə ghayn kwi u yimə ibeni fiŋ uma ini ka ŋuw aba imbey. Mbə́ ghayn abú úŋwən kwi, “Mba yi zəw ingəʼ nanaʼ ki si inyi ungɨŋ anó fon Nwiye.” 23Amaʼazənə úŋwən bə ŋuw akə ufere ba Kristo moʼ mbə́ mə́ choʼo ba mbənə u mi mə cha ufere ba Kristo wu. Mbə́ mə chaʼara Nwiye ijiyə injəy zi úŋwən inya ubugə Asɨyisəg ŋunə ú zi fiŋ uma igun.

24Amaʼazənə mbə́ si chigə á Pisidiya mbə́ iŋu Pamfilia. 25Amaʼazənə mbə́ ghayn inay Nwiye á Pega, mbə́ noʼ awu iŋuw Ataliya 26Mbə́ noʼo awu inyi abaŋ ugwi wene iŋu Antiyok. Amə asin zənə mbə́ chaʼara Nwiye abú úŋwən akuŋ kwi Nwiye aghəy ichuŋ abú úŋwən uŋuw ifaʼ afaʼa zənə u chini mara. 27Amaʼazənə mbə́ pey Antiyok, mbə́ fere ba Kristo ujum ighayn unó ujum mbənə Nwiye aghəy nə úŋwən nibi ghayn umugə u fiʼi inji abú ba mbənə akaʼa ma ba Jû kwi u beni Kristo. 28Mbə́ chomo awu akə amaʼa sá nə ba mbənə u beni Kristo.

Currently Selected:

Ifa 14: NGI

Highlight

Copy

Compare