Ifa 13

Mbə́ choʼo Pol nə Banabas itom úŋwən

1Ungɨŋ ufere ba Kristo ŋunə yə́ mə Antiyok, ba ukən Nwiye nə mbə́ taʼa ba mbənə mbə́ mə́ awu mə́ Banabas, nə Sayimon (nu mbə́ mə́ nibə tiya kwi uyə firi) nə Lusiyus nu amə wa Sirin, nə Manian nu yə́ kwey nə Herod ŋunə amə gobuna foro nə Sol. 2Umugə mbə́ mə́ iwumini Asɨyisəg ijiyə injəy, Azugə zayn zayn ghayn abú úŋwən kwi, “Mbən zi aborobod igun Banabas nə Sol da ufaʼa afaʼa zənə a choʼo úŋwən kwi ú faʼa” 3Amaʼazənə mbə́ si ijiy injəy ichaʼara Nwiye mara, mbə́ niŋi ubugə ma igun Banabas nə Sol icha úŋwən kwi ú ŋuw.

Anó zənə yə aghəy á Siprus

4Umugə Azugə zayn zayn cha Banabas nə Sol nigə, mbə́ swiʼi ŋú a Selusiya, mbə noʼ awu inyi abaŋ ugwi iŋu asin zənə amə ungɨŋ ugha ugwi nu umə tiya akə Siprus. 5Amaʼazənə mbə́ pey a Salamis, mbə́ ghayn inay Nwiye ungɨŋ ina bumi ba Jû. Jon Mak mə́ nə úŋwən ni yə ywere úŋwən.

6Amaʼazənə úŋwən si yeŋ ungɨŋ usin wu mbə́ ŋu pey a Pafos. Mbə pey awu yi kuw wa ukən Nwiye figə unó nu umə tiya uŋwən kwi bar-yeso nu amə ingaŋ ikwa. 7Bar-yeso wu mə azi abú gobuna ŋunə mbə́ mə́ tiya akə Sergiyus Paulus. Gobono wu mə wa yə́ mə́ ni iwe. Gobono wu tiya Banabas nə Sol kwi u zaʼa zən uŋwən damugə yə mə kaba i zəw inay Nwiye. 8Asəmə ingaŋ ikwa wu nu ukum ma mə́ Elimas (amə ukum akə inay Grik) kən úŋwən. Yə mə kaba kwi ka gobono wu beni ma inay Nwiye. 9Anigə Azugə zayn zayn sugi ungɨŋ Sol ŋunə mbə́ mə nibə tiya akə Pol anigə yə́ toŋ ighɨ inyo ingaŋ ikwa wu ighayn kwi, 10“Ungwə ŋwə̂ debere! Ngwə yə bana unó ujum mbənə ukəʼərə. Unó iboŋ sugi unɨŋ injə fiŋ anigə ngwə yə ni inji iboŋ ujum itama ba. Ngwə yə́ bə́ kaba inji igha unó chuŋ da Asɨyisəg kwi u məŋi unó iboŋ. 11Aba akinine, Asɨyisəg yi zi ingəʼ inji igun. Ngwə yi figə cha ngwə mi zənə ayə uzayn zayn nyama chugi akə umaʼ moʼ.”

Aba ghari wu aghəy moʼ kəbərə aghɨ ba Yeso anigə usin fid abú uŋwən ighari feyn anigə yə kab wa kwi u yimə abugə ma icha uŋwən. 12Amaʼazənə gobono wu zən anó zənə yə duw, yə beni inay Nwiye damugə anó zənə mbə mə́ tey da Asɨyisəg chigə uŋwən.

Sol nə Banabas ŋu Antiyok aba abey Pisidiya

13Pol nə ba mbənə mbə́ mə́ nə úŋwən nyi abaŋ ugwi noʼo Pafos iŋu á Pega, nu amə ungɨŋ aba abey Pamfilia. Awu, Jon Mak sayn úŋwən wənə iŋu Yerusanem. 14Úŋwen noʼ Pega iŋu Antiyok ungɨŋ aba abey Pisidiya. Aney ku ba Jû, úŋwən ŋu inyi ungɨŋ na bomi ba Jû pey yi chomo asey. 15Amaʼazənə mbə́ si foŋ inay Nwiye ungɨŋ aŋwaʼanayn ikɨy mose nibi foŋ ungɨŋ aŋwaʼanayn ba ukən Nwiye, Ba mbənə mbə́ mə́ faʼa ungɨŋ ina bomi wu cha ukən abú Pol nə Banabas kwi, “unya, mbən bə mə ni inya moʼ ighayn ina mba yi wuʼ ngwa.” 16Pol zəw nigə noʼ təm atey iməg akə ubugə ma iti ni inay ghayn kwi, “Umbuŋ unya anóm Izre nə ba mbənə akaʼa ma ba Jû mbənə umə wumini Nwiye mbən zəw. 17Nwiye mbi Izre choʼ umba umbaʼ imbey ighəy úŋwən akə abey kyayn Amaʼazənə mbə́ mə́ chomo ungɨŋ Ijip. Anigə yə num ikay kyay ma ichi úŋwən ungɨŋ Ijip 18Anigə yə́ ikod fiŋ nə úŋwən ungɨŋ imbayn zomo akə atuʼ ighumi kyugə. 19Nwiye niy ubey sambigə á Kana anigə ina imbayn wu abú ba Izre. 20Unó mbəŋ ujum num usin akə atuʼ asə ŋuw ka akɨ kyugə nə ighumi itəŋ.”

Amaʼazənə unó wu si chigə, yə naʼ ba kwi uni saʼa abey iŋu pey akə wa ukən Nwiye Samuel. 21Anigə úŋwən ghayn abú Nwiye kwi, u naʼa ufon abú úŋwən. Yə naʼa Sol ŋwə̂ Kish wa unebey Benjamen kwi amə ufon abú úŋwən. Sol tumi úŋwən akə atuʼ ighumi kyugə. 22Amaʼazənə Nwiye chi uŋwən igun atən ufon, Nwiye zi Dafid akə ufon uma. Yə ghayn da Dafid kwi, “Mə zən kwi Dafid ŋwə̂ Jese mə ukudu wa ŋunə a wuʼi, wa umi aghəy unó ujum mbənə amə kaba.” 23Yeso ŋunə Nwiye ghəy kwi u chi ba Izre angəʼ du akə aghaŋ Dafid wu anji zənə Nwiye kaʼa. 24#Mak 1.4; Luk 3.3Ki Yeso sə zaʼa, Jon ŋunə yə́ mə́ naʼa une ghayn abú ba Izre ujum kwi u beŋe fiŋ uma inum une. 25#Jon 1.20; Mat 3.11; Mak 1.7; Luk 3.16; Jon 1.27Amaʼazənə Jon ŋunə yə́ mə́ naʼa une sə ŋu mara faʼa ma, yə ghayn kwi, “Mbən mə́ kono kwi amə ngwa? Cha amə aŋu wa ŋunə mbən mə́ nəmə. Anigə wa moʼ yə zaʼa inyi injim nu cha adi kəʼ aŋu ichi kaba utabay ughəw ma.”

26U mbəŋ unya anóm boŋ aghaŋ Abraham, nə ba mbənə akaʼa ma ba Jû nu umə wumini Nwiye, ukən ŋunə Nwiye chi ba angəʼ amə ina, 27Ba mbənə mbə́ mə́ chomo Yerusanem nə ba kyayn ma cha mbə di kyay ma kwi uŋwən mə wa u zaʼa ichi ba angəʼ kə cha mbə di kyay uma aŋwaʼanayn ba ukən Nwiye zənə umə foŋo unəy ku ba Jû ujum. Anigə mbə́ zwere Yeso aghəy inay ba ukən Nwiye du akə asiʼ. 28#Mat 27.22, 23; Mak 15.13, 14; Luk 23.21-23; Jon 19.15Ka nə cha mbə́ di zən uma aton izwere uŋwən, mbə ghayn abú Pilate kwi u ghayn u zwere uŋwən. 29#Mat 27.57-61; Mak 15.42-47; Luk 23.50-56; Jon 19.38-42Amaʼazənə mbə́ aghəy unó ujum mbənə ba ukən Nwiye ŋwaʼanayn da uŋwən u du akə asiʼ, mbə swiʼiri awu ma azad abaʼaray ŋu tweyn uŋwən isey.#13.29 Mbə toŋ isəy wu ungɨŋ ukob anigə yə chomo ni ikəb. 30Asɨmə Nwiye zəmə uŋwən. 31#Ifa 1.3Yə buw ifigi ba mbənə mbə́ yeŋ nə uŋwən inoʼ a Galeli iŋu a Yerusanem akə unəy nanaʼ. Akinine, úŋwən amə uzənə imə ghayn anó da uŋwən abú ba Izre. 32Anigə mba zaʼa nə ukən uchuŋ inen kwi anó zənə Nwiye káʼá abú umba umbaʼ imbey, 33yə du akə asiʼ ina umba buŋ akə aghaŋ uma. Yə ghəy nigə umugə u zəmə Yeso. Ayə ungɨŋ aŋwaʼanayn sam zənə aŋu pey akə ubigə kwi,

“Ngwə mə uŋu ŋwə̂

akə akə̂choŋ mə si məŋə ungwə mbaʼ.

34Nwiye ghayn anó da mugə u zəmə uŋwən kwi, cha umi figi ungɨŋ isəy,

a yi naʼa aborobod zayn zayn

zənə mə́ kaʼa abú Dafid inen.

35A yə nibə asin chini ungɨŋ aŋwaʼanayn sam kwi,

‘Cha ngwə mi sayn yə ungwə wa Zayn zayn kwi u figə.’

36Amaʼazənə Dafid mə bugə ikay, yə ghəy unó mbənə Nwiye kaba kwi u aghəy, anigə yə ku u tweyn uŋwən aboʼo umbaʼ ma anigə yə́ figi ungɨŋ isey. 37Anigə cha wa ŋunə Nwiye zəmə di figi ma.”

38Anigə umbəŋ unya anóm mbən kyay kwi amə anjim ika Yeso nu mba mə ghayn inay Nwiye inen kwi Nwiye yə waʼa unó iboŋ ba. 39Anigə Nwiye si waʼ unó iboŋ wa ŋunə u beni Kristo nu cha ikɨy mose di kyay wa. 40Mbən num amaʼ kwi ka anó zənə ba ukən Nwiye ghayn ka aghəy ma inen. Mbə́ ghayn kwi, 41“Mbən mbənə mbən mə́ chomo ni tebe Nwiye

mbən yi zəw ingəʼ ku

da anó zənə amə́ aghəy injən maʼ zənə mbən mə ikay

amə anó ni cha mbən mi beni

kanə wa moʼ di məg inen.”

42Amaʼazənə Pol nə Banabas mə duw ungɨŋ ina ibumi ba Jû wu, ba wu kaʼa úŋwən kwi u gha zaʼa aney aku ba Jû aka azaʼa ghayn anó chini da unó mbəŋ abú úŋwən. 43Amaʼazənə mbə si mara ungɨŋ na ibumi ba Jû wu, ba Jû nanaʼ foro ba mbənə akaʼa ma ba Jû nu u si beŋe fiŋ ma ibeni anó Nwiye ba Jû, niŋi anjim Pol nə Banabas. Anigə Pol nə Banabas mə inay abú úŋwən izi ikay kwi mbən ŋu mbey imə zi fiŋ igun Nwiye ŋunə umə aghəy ichuŋ inen.

44Aney zənə aney aku ba Jû kəʼə, ba nanaʼ ungɨŋ asin wu ŋu fere ungɨŋ na ibumi ba Jû izəw inayn Nwiye. 45Amaʼazənə ba Jû zən unoŋ ba wu, imbəw sugi ungɨŋ fiŋ ma. Mbə́ mə́ taŋa anó zənə Pol mə ghayn iti ni jimə uŋwən. 46Amaʼazənə mbə́ aghəy nigə, Pol nə Banabas ti ni inayn akə fiŋ ka ka kwi yə kəʼ kwi u dey ghayn inayn Nwiye inen. Asəmə numugə mbən ton gwen izən kwi cha mbən di kə ijəg itəni, mba yi sayn gwen iŋu abú ba mbənə akaʼa ma ba Jû. 47Asɨyisəg ghayn ina kwi,

“Mə aghəy kwi mbən mə u zayn zayn abú ba mbənə akaʼa ma ba Jû

da ba ujum mbənə umə ungɨŋ isəg mi du angəʼ.”

48Amaʼazənə ba mbənə akaʼa ma ba Jû zəw anó zəŋ, mbə wuʼ uma anigə iyere inayn Asɨyisəg zənə inayn da úŋwən. Ba ujum mbənə Nwiye si choʼ kwi umbi jəg itəni beni anó zənə mbə́ ghayn da Kristo.

49Inayn Asɨyisəg saŋa ungɨŋ aba abey wu ujum. 50Asəmə utəw ba Jû moʼ beʼere ba kyayn ungɨŋ asin wu nibi beʼere ayey kyayn mbənə u zi fiŋ igun Nwiye anigə mbə́ ti ni nwini inya ughəw Pol nə Banabas anigə i fuw úŋwən ungɨŋ aba abey wu. 51#Mat 10.14; Mak 6.11; Luk 9.5; 10.11Anigə Pol nə Banabas kərə imboyi inya ughəw ma i chide úŋwən kwi u beŋe fiŋ uma. Amaʼazənə mbə aghəy nigə, mbə́ noʼ iŋuw Ikonium. 52Iwuʼi nə Azugə zayn zayn sugi ungɨŋ ba mbənə mbə́ beni Kristo Antiyok.

Currently Selected:

Ifa 13: NGI

Highlight

Copy

Compare