Ifa 12
12
Mbə mə bə nwini inya ghəw ba Kristo
1Amə akə amaʼ wu, Ufon Herod mə nwini inya ghəw ba moʼ mbənə umə ungɨŋ ufere ba Kristo. 2Yə́ aghəy u zwere Jams unya anóm Jon akə ubey bêd. 3Amaʼazənə yə́ zən kwi ba Jû iwuʼ anó wu, yə ŋú imbey ighəy u ibiya Pita. Yə́ aghəy anó zəŋ Amaʼazənə mbə́ mə jəgə ufere ingəŋ zənə cha aforo 4Amaʼazənə yə ibiya Pita, yə zi uŋwən andəŋ naʼ uŋwən abú iwaŋ usogwi ikyugə nu amə usogwi ikyugə umə akə uwaŋ feyn kwi uki nəmə uŋwən. Herod mə kaba kwi Ufere Izaʼara Chigə Igun di chigə ki usi saʼ uŋwən asaŋ asaŋ. 5Anigə mbə siy Pita andəŋ. Ufere ba Kristo mə chara Nwiye abú uŋwən ni fiŋ uma ujum.
Angəd chi Pita andəŋ
6Akə afəb zənə isəg mi kyiʼi u chi Pita naʼ kwi u saʼ uŋwən asaŋ asaŋ, Pita mə bunə ungɨŋ ugha usogwi bigə. Mbə kod uŋwən akə indəŋ bigə. Usogwi chomo uchəw ukam ana ndəŋ wu. 7Angəd Asɨyisəg saʼa buw uzayn zayn bigə ungɨŋ na ndəŋ wu. Angəd wu ŋiʼiri Pita amboʼ ubugə inoʼ uŋwən ghayn abú uŋwən kwi yabi noʼ. Amaʼazənə yə ghayn nigə indəŋ tənə mbə́ kod ubugə Pita wu du. Fwayn 8Angəd wu ghayn abú uŋwən kwi, “Tiŋe ungwə uti izi umbə Utabay” Pita aghəy nigə. Angəd wu ghayn abú uŋwən kwi, “Zi injə ndwi inji inyo iniŋi inyi injim”. 9Pita niŋi anjim ma u du a wu na ndəŋ cha yə di kyayn ma kwi anó zənə angəd wu mə aghəy amə anó asiʼ yə kono kwi amə ukaŋ umə chigə uŋwən. 10Mbə́ chigə uwaŋ usogwi imbey, chigə uŋunə iŋu pey akə ubigə, mbə́ pey uchəw ukam atəni ŋunə umə inyi awu ungɨŋ abey. Uchəw ukam wu fəʼə abú úŋwən ma amboŋ anigə úŋwən du isəg. Amaʼazənə mbə chigə mə swiʼi anji moʼ, angə wu bi si siyn uŋwən nu cha u kyay ma. 11Amaʼazənə Pita kyay anó zənə yə aghəy abú uŋwən, yə ghayn kwi, “Akinine mə kyay asiʼ asiʼ kwi Asɨyisəg tom angəd ma kwi u zaʼa ichi aŋu ungɨŋ ubugə Herod anigə ichi aŋu akə unó ujum mbənə ba Jû mə kono kwi umbi aghəy ineŋ.” 12Amaʼazənə yə kyay nigə, yə́ ŋú aku Meri ingwo mbi Jon mak nu ba nanaʼ si fere awu mə chara Nwiye. 13Amaʼazənə yə gweʼe ubunu ukam, ŋwə̂ ayey afaʼa moʼ nu ukum ma mə Roda ŋú ibiri wa ŋunə umə gweʼe ubunu ukam. 14Amaʼazənə yə zəw igəg ikyay kwi amə Pita, yə wuʼe ma kwaʼa akə ingəʼ anigə gha nod ŋú ungɨŋ na ni cha ufiʼə ma ubunu ukam abú Pita ŋú ghayn abú ba kwi Pita yə́ ubunu ukam. 15Mbə́ ghayn abú uŋwən kwi, “Ngwə mə abigə” anigə yə mə bə ghayn kwi amə asiʼ. Anigə mbə ghayn kwi amə angəd ma. 16Pita ŋú imbey imə bə gweʼe ubunu ukam wu. Amaʼazənə mbə́ fiʼi ukam wu, mbə zən uŋwən iyere. 17Pita məg akə ubugə kwi u chuʼ izi. Amaʼazənə mbə chuʼ izi, yə toʼoro umugə Asɨyisəg chi uŋwən andəŋ. Yə́ ghayn nigə ighayn abú úŋwən kwi “Mbən ghayn anó zəŋ abú Jams foro abú unya anóm mbi.” Amaʼazənə yə́ ghayn nigə yə́ noʼ iŋú asin chini. 18Amaʼazənə isəg kyiʼi abuyi kyayn du akaʼa usogwi wu. Cha mbə kyay uma anó zənə yə duw abú Pita. 19Herod cha ba kwi ukaba Pita anigə cha mbə zən uma uŋwən. Herod biri unó abú usogwi wu anigə ghayn kwi u zwere uŋwən. Amaʼazənə yə ghayn nigə, yə noʼ á Judiya swiʼi ŋúw kayisariya pey chomo awu akə amaʼa moʼ.
Inji zənə Herod kuw
20Herod mə siy itəm ni ba Tare foro ba Sidon. Anigə mbə fori iŋú zən uŋwən akə unóŋ. Mbə́ pey yi zən Blasiyus nu amə uŋwən mə nəmə itoʼ Herod. Mbə́ aghəy kwi u ywere úŋwən. Mbə́ ŋú zən Herod pey yi boʼo ubugə abú uŋwən ghayn kwi ugha uchomo akə aborobod mbə boʼ nigə damugə u aghəy jəgi ma mə noʼo ungɨŋ abey Herod.
21Akə aney moʼ nu mbə choʼo, Herod zi ndwi ufon ma ichomo igun atən ufon ma inay abú ba. 22Amaʼazənə yə mə inayn nigə, ba wu mə iwumini uŋwən ighayn akə ikay kwi, “Akama igəg wa zəŋ amə igəg Nwiye.” 23Aba ighara wu, angəd Asɨyisəg tum Herod asey damugə cha yə mə naʼa ma iwumini abú Nwiye. Igwəd nyi ikad uŋwən uku.
24Inay Nwiye mə bə saŋa iŋúw imbey, ba nanaʼ zəw beni.
25Amaʼazənə Banabas nə Sol maray afaʼa zənə mbə ŋú ifa a Yerusanem, mbə wene iŋu Antiyok. Amaʼazənə mbə́ mə́ wene iŋúw, mbə num Jon mak iŋú ni uŋwən.
Currently Selected:
Ifa 12: NGI
Highlight
Copy
Compare
Share
Want to have your highlights saved across all your devices? Sign up or sign in
© 2023 CABTAL
