Romanos 8
8
Kajnakopwu Xako Hoyakalu Hiwejikaluru Piranaya
1Hiyáhoni Cristo Jesus munanhalene hi hjihyehitkona Hoyakaluya.
2Hiwejikaluru hiykole Cristo Jesus tshinanuya, hiwekkaklewatatshri kochpakno hektuntshi towre pixkonuya hiyrunu hipuktshi heneklewatatshri pixkonuy-koxa.
3Moisés yonreru hi kmixkonu klu tshinanu hektuntshi hihrokahchinikankaklewatatshri himaletlewata. Seyni Hoyakalu hituruko hyokanatatka yineru hektuntshi hwaleru pixka rixyawakapa hektuntshi hkamnixyawakapa hiyáhoni ruylatlu hektuntshi yineru mane hwatshri.
4Hiyáhoni Moisés yonreru potukalu wpoyahokaka, wale hiykole wkamhiywaka, hixako walujyawaka wma kamhiywakanupa seyni Hiwejikaluru halujyawaka wkamhiywakapni.
5Katukta waleko ralujyawaka homkahita waleko hihchinikanu towutanru. Seyni katukta Hoyakalu Hiwejikaluru halujyawaka homkahita Hoyakalu Hiwejikaluru hchinikanu towutanru.
6Klu tshinanu hixako wihchinikanu towuxinwu, hipuktshipni seyni Hoyakalu Hiwejikaluru hiwekluni hiyrunu hapnanuhchinikanru reneklewata.
7Hiyáhoni waleko ralujyawaka kamhatshri Hoyakalu hkamnita. Klu tshinanu wan-hixatshri hi yijnakotlu Hoyakalu yonreru. Halikaka wan-hixatshri hi himukata homkahretlu Hoyakalu.
8Yineru waleko ralujyawaka romkahixini hi rumukata poyikowkakletlu Hoyakalu.
9Seyni hixa hi homkahitlu hixako halujyawaka seyni Hoyakalu Hiwejikalurununhi. Katukta hi himwalu Cristo Hiwejikaluru hi Cristo-nni wale.
10Hiyáhoni Cristo hixa hitokote hwini, wimane hipnatka hektuntshi tshinanu halikaka Hoyakalu Hiwejikaluru hiwekkaklewata. Klu tshinanu Cristo potukatatkawu Hoyakaluya.
11Hixa hitokote rawini Hoyakalu Hiwejikaluru, Jesus manni hiwekkakjeru, Cristo mane hiwekkakatshri hix-manen-koxa riwekkakanu Hoyakalu Hiwejikaluru tshinanu hixa hitokote hwatshri.
12Hiyáhoni Cristo tshinanu nmoletanune, towutkalunwu seyni hi hixako halujyawaka wtowuxika.
13Klu tshinanu hixako halujyawaka hkamhinipa, hipnanu; seyni Hoyakalu Hiwejikaluru mixkonuyma hixa hiylaxinri hektuntshi himane hwatshri, hiwekanu.
14Klu tshinanu ptowrunek-yine Hoyakalu Hiwejikaluru kosekanna, Hoyakalu whenene rixyawakna tshinanna.
15Klu tshinanu Hiwejikaluru honra Hoyakalu henekanwu, hi jhamleholune rixkakanwu. Seyni Hoyakalu Hiwejikaluru wan-hixkakwu Hoyakalu whenene wixyawaka. Hiyáhoni Hoyakalu Hiwejikaluru pixkonu tshinanuya hipokananu wane wtshinanu: Hirtshi! Nuru!
16Hiyrunu Hoyakalu Hiwejikaluru hixa wiwejinri repixa wla wtshinyawaka Hoyakalu whenenetkawu.
17Hiyrun-koxa Hoyakalu whenene wixini, wyoptotanru Hoyakalu himwaleru. Cristo-yma wyoptotanru. Halikaka Cristo pixka wixa salewnalexini wimatan-koxa Hoyakalu hoyaknu wyoptotanu Cristo pixka wixa yoptoletanru.
Hoyakalu Hoyaknu Wyoptotanrupa Piranapni
18Klu tshinanu nimatlu salewaktshi xye hohnekaka hwatshri hi hpoyaho yapkakletletlu hoyaknutshi hix-yehi hakanhikatshripa.
19Ptowru potuko Hoyakalu kamhaleru chiretmaklu rakanhiywakna Hoyakalu whenene.
20Klu tshinanu ptowruka Hoyakalu kamhaleru hiprotakatka moyakatu rixyawakatka, hi waleko ralujyawaka tshinanni seyni Hoyakalu haluklu wan-rixyawaka. Klu tshinanu rawa xye kahwakachalupa:
21pa hohnepa ptowru Hoyakalu kamhaleru kochpakko moyaknutshi mtowuxyawakanuplu. Waneya ruchotkoklunpatka kihler-potuko hkayatanna, Hoyakalu whenene kayatanrupa.
22Klu tshinanu wimatlu haté xawakni ptowru Hoyakalu kamhaleru hotshhita tsru katshinoluyma hatatjewa mturu tshino hjemna.
23Hi Hoyakalu kamhaleru msamenrutu tsonu hotshhita seyni hix-koxa wan-hixa. Hiwejikaluru Potukalu Hoyakalu henekachale himwatshinwu. Wotshhita hitoko maneya haté Hoyakalu hali wan-hixlexinipwu wale whenenepotpakotkawu. Waleni wimane hiwekkajikol-potuko.
24Wiwekkakka kahwakachaluya seyni wexinpatkalu wkahwakakanatanru hi wkahwakanutkalu. Klu tshinanu kathe kahwakachatanru retanru?
25Seyni wma metkanuklunru wkahwakachaleru, wkahwakachatanru.
Hoyakalu Hiwejikaluru Hanjihohnere Piranapni
26Hoyakalu Hiwejikaluru hepixjetwu klu tshinanu himka wimata klunerukta wanjita. Hiyáhoni Hoyakalu Hiwejikaluruko hapohchinikanutlu Hoyakalu hixa tshinanu. Tsru hotshhiruyma ranjitlu Hoyakalu haté tokantshi hi poyaho yanumleta.
27Hoyakalu himathethajitlu yineru. Hiyrunu Hoyakalu himatlu Hiwejikaluru hchinikanu. Hoyakalu Hiwejikaluru, Hoyakalu halujyawak-potuko ranjijetlu Hoyakalu, Hoyakalu kotspalatanune tshinanu.
28Wimatlu ptowru potuyako Hoyakalu kamrurewata hixa hihlenu tshinanu, ptowrunek-yine Hoyakalu hamotatshine, Hoyakalu nurrenni. Hoyakalu nuretatkana waleko hkamrure hkamhiywaka tshinanupna.
29Hoyakalu himathetatkana nuretkalunepa xye tshiji hiyakotkoklunu pnutekananuko. Hiyrunu hnuretna hituru pixka rixyawakapna hiyáhoni Jesus himukata mitshikananu matutatshri rixyawaka himolene hixolune tskalaya.
30Hoyakalu hitakna hituru pixka rixyawakapna hiyrunu wanna koxa hnureta. Hiyrun-koxa hnurrene hpotukatatka. Hiyrunu potukatkalunetka royaknu reneka.
Hoyakalu Hamoxyawakwu Jesus Tshinanu Piranapni
31Hiyáhoni hanhe wtshina xye chinikantshi tshinanu? Hoyakalu hixa sreta hwini, kathe xawaka himukata kamniretwu?
32Hoyakalu hi tshipetawheneta seyni hyokanatlu hixa ptowrunekwu tshinanu. Hiyáhoni hi he Jesus-yma renekanunwu ptowru potuko?
33Kathe xawaka himukata kahekletna Hoyakalu nurrene? Hikeni klu tshinanu Hoyakalukni potukatatkana.
34Kathe xawaka jihyehitwu? Hikeni, klu tshinanu Cristo Jesus hipnapatka waneya riwekatka hipnatshine tskalaya. Hiyáhoni xawakni Hoyakalu potukle sreta rawa, hixa tshinanu Hoyakalu ranjita hipokananu.
35Rawhe xawaka satu Cristo hamotle konatshri? Rumukathe kojwawnalu, ho kojwakahchinikanutatshri, ho kamnirewlu, ho natshitatshri, ho mamkatu ho kyowikolu ho hinokakaklu hamlenrahe himukata hitspalkakletlu Hoyakalu hamotlewle?
36Hiyahokni wane htshina yonatkaluru: “Hoyakalu, pixa hiwaka tshinanu ptowru hohneruka hipuktshi hamlenu wwa. Carneiro pixka hiylatkalunepwu.”
37Seyni xyekaka yohnik-hiknohatshinwu wamotjeru tshinanu.
38Hiyáhoni nimatlu hi hipuktshiko, hi hiwekluko, hi hiwejikalurune Hoyakalu towrene tenhohne hajeneko, hi kamtshineko, hi xawakniko, hi hinatshripako, hi towretshriko,
39hi teno hwatshriko, hi hixa hpuko hwatshriko, hike xye tshiji psoluka hwatshriko hikeklu hohne himukata kotspallexyawu Hoyakalu hamotlewle Wutsrukate Cristo Jesus tshinanu.
Currently Selected:
Romanos 8: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
