Romanos 7
7
Hnunrowlu Yapkakle Piranapni
1Cristo tshinanu nmoletanune, hixa Moisés yonreru himatheta. Hiyáhoni hixa himatkoxlu Moisés yonreru homkahitatshine tsonu rumukata towutleta.
2Klu tshinanu suxo thanuru hiwekka pchinika hi titshitka thanuru tuchoxyawaka. Seyni rupninipa thanuru, Moisés yonreru towre tuchpajyatka.
3Seyni satuko thanuruxini riwekka pchinika thanuru Moisés yonreru wan-tshina, timopatlewata. Seyni rupninixka thanuru waneya tuchpajyatkalu Moisés yonreru. Hiyáhoni hi himopatlewatatshrotkani, satu thanuruxini.
4Cristo tshinanu nmoletanune, waneko pixka hixahotka, hipnahoxiniklunwa hix-nanuko hiyáhoni hixa hichpajyatkalu Moisés yonreru towuxyawakhi Cristo mane tshinanu. Wan-hixatka satunuko hixinripatka, waleni hipuktshi tskala hichpajikatshritka hiyáhoni wumukata Hoyakalu halujyawaka kamhalexyawakpatka.
5Klu tshinanu wimane halujyawaka womkahjekanaxiniklunu, hektuntshi het-sotanrewle mixkowatatka wimaneya, yonruru tshinanu. Wkamrure hipuktshi renekwu.
6Seyni xawakni yonruru hi towutjetwu klu tshinanu wupniyatkalu Moisés yonreru wkachikanatjeru. Xawakni wumukata homkahretlu Hoyakalu, herotu hiwejikaluruya. Waleni Hoyakalu Hiwejikaluru towutlewleya. Hi mitshikananu yonruru womkahjekanatanru womkahitatka mitshikananu pixka.
Hiykolu Yonatkaluru Hiphujexyawaklu Hektuntshi Piranapni
7Ha xawakni hanhe wtshinanu? Wlalhe wtshinanu, Yonruru hetko hektuntshi? Hike, hikeklu! Seyni Moisés yonreru tshinanu nimathetlu hektuntshi. Himka nimatatkalu het-sotanuhonutshi, Moisés yonreru wane hma tshinkanumka: “Hi pet-sotanrewatanu.”
8Yonruru tshinanu hektuntshi hikchiklu ptowru hixatshri het-sotanuhonutshi rekhixyawakno. Klu tshinanu yonruru mwaknumka hi kmixkonru hektuntshi.
9Hetanno hita, mitshikananu yonruru hi nimatyehitatka seyni niwekatka. Seyni nimatyehixinixkalu hiykolu pirana, rakanhahapkatatka hektuntshi.
10Waneya nupnapatka. Hiyáhoni hiykolu hiphujewnal-tshinanu, hipuktshimka renekno.
11Hiykolu tshinanu hektuntshi hikchikatkalu hyokwijexyawakno. Hiyáhoni hiykolu tshinanu hektuntshi hiylatapno.
12Hiyáhoni halikakni Moisés yonreru kihleru potukalni hiyrun-koxa hiykolu potukalni, halikakni, kihlerni.
13Hiyáhoni wkahwakhe hiykolu kihleru rumukata hipuktshi henekletno? Hike, hikeklu! Seyni hektuntshi kamrurni wale. Hektuntshi kihleru hyapa ruylaxyawakapno rimathetka hanu potu rixa hektuntshi. Hiyáhoni hiykolu tshinanu hektuntshi hekhixnawa hektuntshi hektupotukananu rixyawaka.
14Klu tshinanu wimatlu Moisés yonreru Hoyakalu runya seyni hitni xye tshiji hichpajikatshrino hektuntshi towreru nixapa.
15Hi nimatjemlu nkamhajetanru klu tshinanu naluka kamhaletanru hi nkamha seyni neyiklewle nkamha.
16Hiyáhoni nmalukanutuko nkamhajeta, nuphujtatanru Moisés yonreru kihleru rixyawaka.
17Hiyahokni hi hita kamhalu seyni halikaka hektuntshi nimwaleruko kamhalu.
18Klu tshinanu nimatlu hita hitokote hikeni kihleru, walekni, nomane hi rawa kihleru. Klu tshinanu hitamka haluka kihleru nkamhiywaka seyni hi nkamhalu.
19Hiyáhoni kihlerumka hi nkamha seyni halikaka hektutu nma malukanutuko nkamha.
20Hiyáhoni nkamhinri wale nma malukanutu hi hita kamhalu seyni hektuntshi hita hitokote hwatshriko kamhalu.
21Hiyáhoni nukchiklu xye yonruru, kihleru naluka kamhalexinimka hektutu tsonu nnureta.
22Nohchinikanuyma nuphujetlu Hoyakalu yonreru kihleru.
23Seyni netlu satuko yonruru nomaneya ntowutjeru. Walekni kamnijetlu yonruru nohchinikanu hikchikhihlenutanru. Yonruru kamnitatshri walekni hektuntshi ntowutjeru hiyáhoni hektuntshi hosturerno.
24Kwamonurpotukno! Katnihe nepixjeru xye nomane hipuktshi heneklewatatshri tshinanu?
25Npoyahnutanru Hoyakalu niwekkakjeru Jesus Cristo wutsrukate tshinanu. Waneya nohchinikanuyma ntowutjeru waleni Hoyakalu yonreru seyni nomane towutatshri waleni hektuntshi yokanreru.
Currently Selected:
Romanos 7: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
