Romanos 5
5
Halixlewlu Tshinanu Hpowraxikowaka Piranapni
1Wpowratka, halixlewlu tshinanu hiyrunu hihlehchinikanyehitkalunwu Hoyakaluyma. Tsru Hixikatshriwa Jesus Cristo kamhaleru tshinanu.
2Walixle tshinanu Cristo wan-hixwu Hoyakalu hihlehchinikanrewle henekachalu wyoptoxyawaka. Wane wixa haté xawakni. Wale tshinanu wpoyikowata klu tshinanu Hoyakalu hoyaknu wkahwakanu.
3Hiyrun-koxa wpoyikowata salewaktshi tshinanu klu tshinanu wimatlu salewaktshikni hasruklu yineru kahwakachatatshri rixinripa.
4Hoyakalu hikchikhihlenutlu salewaktshi wakotachaxyawaka hiyáhoni Hoyakalu hikchikhihlenreru tshinanu Hoyakalu hihlenu wkahwakanu.
5Hiyrunu hi wmahijeruchata xye wkahwakle tshinanu. Klu tshinanu Hoyakalu wajkaka hipkaklu ramotlewle Hoyakalu Hiwejikaluru, Hoyakalu henekachale tshinanu.
6Klu tshinanu hi wumukata hepixlexnawa, wumtuknu tshinanu hiyáhoni rapokpapkoluxinixka Cristo hipnapatka hixa tshinanu.
7Kyaprehetkolu satu yineru haluk-hipnalexyawaka satu yineru kachrijru rixyawakapa. Rumukata hiphujewnaleta satu yineru rupniywaka satu yineru kihleru hkachrihyawakapa.
8Seyni Hoyakalu wla rixa hekhiretlu hi pa hamotlekananu rixwu klu tshinanu hektune wixakanaxiniwa Cristo hipnapa hixa kachrijru.
9Hiyáhoni Cristo tshinanu hi wetanru Hoyakalu hapnokatlewle klu tshinanu Cristo hraha hiyokle tshinanu wpowratka Hoyakaluya.
10Wkamnitmaklu Hoyakalu seyni rimatletawawu hituru hipnal-tshinanu. Rimatletatkawu hiyáhoni wane pnuteyaka wiwekkakko Cristo hiwekle tshinanu.
11Hi wale tsonni seyni xawakni koxa wumuwata Hoyakalu tshinanu hiyrunu Tsru Hixikatshriwa Woyakalute Jesus Cristo tshinanu. Klu tshinanu Jesus Cristo tshinanu wimatletatnaklu Hoyakalu.
Adão, Cristo Piranapni
12Hektuntshi jihlokatkalu xye tshijne satupka jeji majnákonu tshinanu. Hiyrunu hektuntshi yma rapokatka hipuktshi. Wale tshinanu ptowru yineru hipnanu klu tshinanu ptowru yineru hektuwatatka.
13Hma mapokkanuklunuwa Moisés yonreru rawakanatakotka hektuntshi. Seyni hanukta hi rawa yonruru yine hi himathetlu hektuntshi.
14Hiykolu mwaknu pchinika Adão-ni haté Moisés-ni klu papko hipuktshi hiykole yine towutakanatatka. Wan-rixa towutletkanatkana Adão-ni hektunu pixka mixkannitka Adão-ni hinatshripa yaholuni.
15Seyni Hoyakalu henekachale hi Adão-ni hektunu pixka rixa. Halikaka ptowru yine hipna satupka yineru hektunu tshinanu. Seyni Hoyakalu ramotle renekachalewaxya tsru mixkon-potukni klu tshinanu ptowru nerukmaka henekka riwejyawakapna satupka yineru tshinanu. Walekni Jesus Cristo.
16Hiyrunu Hoyakalu ramotle henekachalewaxya hi satni yinern-hektunu pixka rixa. Satupka majnákonu tshinanu rapokatka jikolukanuru seyni hix-potuko hektuntshi wkatanuko rapokatka ptowru hektuntshi hiknokatshri hiyrunu renekachalewat-koxa.
17Halikakni satupka yineru majnákonu tshinanu hipuktshi towutlewata. Seyni hakanhatshritka satupka yineru tshinanu, Jesus Cristo hektuntshi yohnik-himukatatshrini. Klu tshinanu ptowru neruko Hoyakalu hihlenu yoptotatshine, Hoyakalu henekachale potukatlewatatshri yoptotatshine pohirewnanu Cristo pixkonu tshinanu.
18Adão-ni majnákonu tshinanu ptowru yineru hipuktshiyma hapnokatka hiyáhoni satu kamrurepkani kihleru Cristo potukatatkalu ptowru yineru Hoyakaluya. Walekni hiwekkaklu ptowru neruka.
19Satupka jeji majnakowaxyalu Hoyakalu hiyáhoni hixolunni hektune rixkakatka. Seyni satupkani yineru kajnakolu Hoyakaluya hiyáhoni hixolune hihletko.
20Moisés yonreru hakanhatka rekhixyawaklu hektuntshi hektupotuko rixyawaka. Seyni hektuntshi hallikanaxinixka Hoyakalu hiknojyawaklu hektuntshi koxa mixkowatatka.
21Hektuntshi mitshikananu hipuktshiyma towutatkawu. Seyni Hoyakalu mixkowata hektuntshi ruknojyawaka yine tshinanu. Hiyáhoni Hoyakalu hiknojyawaklu hektuntshi himukata hihleretna yine Hoyakaluya. Xye hiwekkaklewata hiweklu hikeklu hohne mnikawnakatupa Jesus Cristo Wutsrukateya.
Currently Selected:
Romanos 5: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
