Romanos 6
6
Hektuntshi Hi Towutlu Cristo Munanhatshri
1Ha hkahwaklu wan-hixini yohnik-kihle hixyawaka wektuwatanu waneya Hoyakalu pnute powratachatanwu?
2Hike, hikeklu! Klu tshinanu hektuntshi hetanuya hipnatshine pixka hixatshinetkawu hanhe xawaka wixa himukata hwaletanutnaklu hektuntshi?
3Hi he hichiniklu w-batiza-tkoklunu Cristo Jesus hipnale wyima? Hiyáhoni Cristo Jesus hipnale w-batiza-xikatka.
4W-batiza-tkoklunu Cristo kapnaxikolu wyimatka, hatatjewa waleyma wupnatka. Hiyrunu Cristo hiwekatnaka hipuktshiya Hirtshi hoyaknu tshinanu hiyáhoni wale pixkonu herotu hiweklu henek-koxwu hixa.
5Cristo hipnatka hiyáhoni hatatjewa hix-koxa hipnatka waleyma. Cristo hiwekatnaka hiyáhoni hix-koxa hiwekanu Cristo-yma.
6Hiyáhoni wimatanru wiwekle mitshikawlurni hipnanatka Cristo-yma cruz-ya hnikawniywakapa hektuntshi mixkonu, hektuntshi mtowuxyawakanupwu.
7Klu tshinanu hektuntshi hi himukata towutletlu hipnatshritka.
8Waneya Cristo-yma wupninixka, wimata waleyma wiwekanu.
9Cristo hipuktshi hiwekkajikatka hiyrunu wimatlu Cristo hi himukata hipnaleta hiyrunukotnaka. Xawakni hipuktshi hi himukata kachretlu Cristo.
10Hiyáhoni rupninixka Cristo, rupnatka pa katapka hektuntshi mixkonu hkonyawaka hikeklu hohne mnikawnakatupa tshinanu. Seyni Cristo hiweka hiyrunu hpaklu hiwekleta Hoyakaluya.
11Wane pixka potuko hixanu hixa. Hipnatshinetka hkahwajinwa hektuntshi mixkonu tshinanu seyni hiwekatshinephi Hoyakaluyma Cristo Jesus tshinanu.
12Hiyáhoni hi hitshitanru hektuntshi towuxyawaklu himane moyakatu, himane het-sotanre hma kamhiywakanupa.
13Hiyrun-koxa hi henekanru himane psojite hektuntshi towuxyawaklu, muhlentshi kamhatshri rixyawaka. Seyni henejinwa Hoyakaluya hatatjewa hipnakanatatshine pixka hixa seyni xawakni hiwekatshinetkahi. Hiyáhoni himane psojite Hoyakalu henejinri kihleru kamhatshri rixyawakapa.
14Hi hetachatanru hektuntshi towuxyawakhi klu tshinanu htowutjeru hi Moisés yonreru seyni Hoyakalu hihlenu tsonu halikaka towutanhi.
Potukatlewatatshri Towutanru Piranapni
15Ha xawakni? Wektuwatewhe klu tshinanu yonruru hi towutwu seyni Hoyakalu henekachale yoptotatshinwu wixyawaka tshinanu? Hike, hikeklu wane wixanu.
16Hixa himatlu katukta henejinwa towrertshi rixikowaka rujhalu hyijnakoxyawaklu htowutjeru. Hiyáhoni hixa hijhalu hkamhiywaklu htowutjeru towuxyahi. Hektuntshi towuxinhi hipuktshi hkayatanu seyni kajnako hixini Hoyakaluya, hiyáhoni hihletko Hoyakaluya.
17Seyni poyahnu Hoyakalu! Klu tshinanu mitshikananu hektuntshi towutjekanathi seyni wkatanuko hixa homkahitatkalu psol-mixkonuyako halikakalutu pirana Hoyakalu hiykole pirana hixa henejikolu.
18Hixa hektuntshi towuxyawakhi hkochpajika hiyáhoni hpotukaxikolu pirana towutjethi.
19Yineru pixka ntshina, yine hchinikanu hihrokle tshinanu. Mitshikawni hixa mpotukanhi hixapa hiyrunu hektutu hyijnakjekanata, ptowru hixatshri hektutu hkamhajekanaxyawaka. Hiyáhoni xawakni waneko pixka hixanu henejinwa psoluyako potukatlewlu pirana towuxyawakhi, kihleru hkamhiywakapa.
20Hixa hektuntshi towrerune hixjekanaxiniklunu hi yijnakjekanatlu potukal-towutlewle pirana.
21Klunerhe xawaka repixatkahi kapatmenuru hkamhajekanaxini? Wan-hixatshri kamhatshri kayatanru hipuktshi.
22Seyni xawakni Hoyakalu kochpakatkahi hektuntshi mtowuxyawakanutkahi. Hiyáhoni hixa kayatatkalu hiwejikaluru hikeklu hohne mnikawnakatupa.
23Klu tshinanu hektuntshi wenru walekni hipuktshi. Seyni Hoyakalu henekachale hiwekluni hikeklu hohne mnikawnakatupa Wutsrukate, Jesus Cristo-ya.
Currently Selected:
Romanos 6: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
