Romanos 4
4
Abraão-ni Wyiminri Piranapni
1Hanhe wumukata tshinyehretanru Abraão-ni wutsrukatni? Klunerhe xawaka rukchika Abraão-ni Hoyakalu hetanuya?
2Abraão-ni hkamrure tshinanu hpowratkonimka Hoyakalu hetanuya waneyamka tsru pirana htshinyehixiniwa wale nannuko seyni Hoyakalu hetanuymaka hike.
3Klu tshinanu Hoyakalu tokanu yonatkaluru wan-tshina: “Abraão-ni halixtokanutlu Hoyakalu hiyáhoni ralixle tshinanni Hoyakalu powratniru Abraão-ni, potukalu rixyawakni.”
4Kamrurewatatshri wenutka. Hiyrun-koxa wenutkaluru hi kahwaklu renekachaxikowaka seyni hkamrure tshinanu hkaylerni.
5Klu tshinanu katukta hi munanhanru hkamrure seyni Hoyakalu potukatlewatatshri hmunahanu, ralixle tshinanu hpowratko Hoyakaluya.
6Wane potuko raluka tshinretni Davi-ni wane htshinyawaknixka hihlehchinikanyehitkalunetkani Hoyakalu powratanune ralixle tshinanu tsonna hiyrunu hi hkamrurna tshinanu hpowratkona;
7wane htshinna: “Hektune powraxikolunetka hihlehchinikanyehitkalune hiyrunu rektunna ruknojikatkana.
8Hihlehchinikanyehitkalune yine hektune mtshinkonpatkani Hoyakalu hektuntshi hiknojyawaka tshinanu.”
9Ha xye poyikowlu Davi-ni hinkakletleru yineru jiprojhikatshriwa tshinanu tsonrahe? Hike, seyni yineru mjiprojhikatwa tshinan-koxni. Klu tshinanu yonatkaluru tshinyawaka wunkakleta: “Abraão halixtokanutlu Hoyakalu hiyáhoni ralixle tshinanni Hoyakalu hitaklu Abraão potukalu rixyawakatka.”
10Hanu rixatka Abraão waneklu papko? Hjiprojhakoklunu wkatanrahe hpotukatka ho wane pnut-hohneko hpotukatkatka? Abraão hi hjiprojhakawa seyni Hoyakalu potukatatkalu.
11Wane wkatanutka hjiprojhakjixnatkawa Abraão ralixle hiphujetatshrini wale. Hiyáhoni Hoyakalu hiphujetlu, Hoyakalu potukatatkalu Abraão ralixle tshinanu tsonu seyni hi hiptojimta tshinanni. Hiyáhoni Abraão rurutna wanna ptowru neruka Hoyakalu potukatanune ralixlena tshinanu yáholu hi hjiprojhakjixnawana.
12Hiyrun-koxa Abraão rurutna jiprojhakjixikatshinwa seyni hi wale tshinanu tsonni seyni ralixlena tshinanni Abraão hma jiprojhaknuklunuwa pixka.
Hoyakalu Hinkakletleru Halixatshine Tshinanu Tsonu Piranapni
13Hoyakalu hinkaklexyalu Abraão hiyrunu hiklopichane xye tshiji psoluka renejyawakapna. Hoyakalu hinkaklexyalu Abraão, hi Moisés yonreru romkahixyawakatka tshinanni seyni Hoyakalu potukaxyawaklu Abraão ralixle tshinanni.
14Klu tshinanu Hoyakalu wla htshinkamka Moisés yonreru homkahitatshine tsonu himukata yoptoletlu runkaklexyana waneya himka rawanu halixlu hiyrunu hike mkochpakkatumkapni Hoyakalu hinkaklexyana yine.
15Yonruru tshinanu rawanu hapnokatlewlu Hoyakaluya majnakowatatshine tshinanu. Seyni yonruru mwaknumka himka rawanu majnakowlu.
16Hiyáhoni Hoyakalu hinkakletlu halixatshine tshinanu. Wan-rixa Hoyakalu rimaxikowaka Hoyakalu hinkakletanru renekachatanna Abraão-ni klopichane ptowrun-potuka, hi Moisés yonreru pirana homkahitatshine tshinanu tsonu seyni ptowru yineru pejnu halixatshri Abraão-ni pixka hixa halixletatshri tshinanni. Klu tshinanu Abraão-ni wuruta hixa halixatshinwu ptowrunekwu.
17Wane htshina yonatkaluru: “Wane nixkakatkayi Abraão-ni rurutyina hixo nerkaka hirutanru.” Hoyakalu hinkaklexyalu hakanhanu klu tshinanu Hoyakalu honra hinkakletlu. Xyekni Hoyakalu Abraão-ni munanhaleru. Hoyakalu walekni hipnatshri hiwekkakatshri hiyrunu htokanu tsonu tshinanu ptowruka mwakatuwa hakanhakakatshri.
18Hiyáhoni Abraão-ni halixachata, hkahwakachata yáholu yine yhale hetanu hmahijer-kahwaklechatanru. Hiyáhoni ralixle tshinanu Abraão-ni wuhenetna hixo nerune. Wane potuko htshinatka yonatkaluru: “Piklopichane wla pejnupna.”
19Abraão-ni psokakniru cem mhale rixyawaknixka. Seyni hi ruhroka halixlewletni yáholu rimathetlu himane hipnatshri pixka rali hixletatka hiyrunu Sara-ni hi wuhenewpiratni.
20Seyni hi rutuk-halixletni Abraão-ni hiyrunu hi ruhrok-halixletlu Hoyakalu hinkaklexyanru. Ralixle mixkotnixkalu, Hoyakalu rimalwutnixka.
21Abraão-ni himatlu psolu hchinikanuyako Hoyakalu himukata kamhaletlu wale runkakletanru.
22Wale tshinanukni Abraão-ni ralixle tshinanu Hoyakalu potukalu htshinniru Abraão-ni.
23Xye hima yonatkaluru wan-tshinatshri “Hoyakalu potukalu htshinniru” hi Abraão-ni tshinanu tsonu hyonatka.
24Seyni hixa tshinan-koxa hyonatka. Potukalune tshinikatshinwu, hixa ptowrunekwu Hoyakalu, Wutsrukate Jesus hiwekkakatshri halixatshinwu.
25Jesus, hixa hektunu tshinanu renekka rupniywaka seyni riwekkaka wuhleyehitka Hoyakaluya.
Currently Selected:
Romanos 4: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
