Romanos 3
3
Hoyakalu Hi Yohikanru Htokanu Piranapni
1Hiyáhoni klunerhe rawyana judeu-nerune, judeu mixkane pnute? Klunerhe repixlewaxya jiprojhalu?
2Tsru potuko repixlewaxya judeu rixkaklewaxyawaka. Mitshikananhapka klu tshinanu Hoyakalu henekna judeu-ne htokanu rimwiywakna.
3Ha xawakni, hanhe rixna satkaka hma malixlenna tshinanu? Ha xawakni Hoyakallahe yohikanru htokanu?
4Hike, hi psojikna. Hoyakalu hikeklu hweyawata yáholu yine ptowruneko kayloklerunemkani seyni Hoyakalu hike. Hiyáhoni Hoyakalu tokanu yonatkaluru wan-tshina: “Pimathexikowakapni pixa Hoyakalu potukalyi kluneruktako ptshina hiyrun-koxa pimalwutko yahmaklu pweyawyehitko.”
5Seyni hi he xawaka wektunu hiphujetlu Hoyakalu hihlenu? Hanu wtshin-hihretanru xye? Wumukata wla tshinrehetkota, Hoyakalu hetko pupjeta rapnokaxyawakwu. (Seyni hewiya yine hchinikanu pixka ntshinachaxya.)
6Maka hike! Klu tshinanu Hoyakalu mpotukatu rixkamka himka rimat-hikolukanuwnayehjixanna ptowruneko yine.
7Hiyáhoni nmajnakowaxini hi he xawaka rimalwutko Hoyakalu pimrineya? Klu tshinanu rimathexikowaka potukalu rixyawaka Hoyakalu nektunu tshinanu. Hiyáhoni kluneru tshinanhe napnokatko nektunu tshinanu, wtshinjeta?
8Wan-rixkamka wlamka wtshinanu: “Wuya, hektututshi wkamhanu kihleru hakanhiywakapa.” Wane htshina hapatlexinnona pimrine seyni wane ntshinjenepni rapnokatkonna halikaka.
Ptowru Yineru Hektuwaka Kamhatshri Hixyawaka Piranapni
9Hiyáhoni ha wanna judeu-ne xawaka hixa yohnik-hihlenurunrahe? Hike, hi psojikna klu tshinanu wekhixnatkawa judeu-neru hiyrun-koxa judeu mixkane pixkakakanni klu tshinanu rektunna tshinanu.
10Wla htshina yonatkaluru tshinyawakakotnaka: “Hi satukna yineru potukalu.
11Hi satukna himatjematshri. Hi satukna Hoyakalu homkahitatshri.
12Wanna ptowruneka howuka hwa Hoyakaluya. Pupjetatshinni wanna ptowruneka. Hi satukna kihleru kamhatshri, hi satuknako.”
13Hiplamna hatatjewa yomletshi hihpukatshri. Hinruna hweyawaxyana tokantshi hipnakaklewatatshri. “Himnu kamaklewatatshri pixka rixa hinamna hichpajikatshri.”
14“Hinamayna katseplu hektutu htshinrena.”
15“Hchiretna yine hsalexyawakna hiyrunu ruylalewaxyawakna.
16Hanukta hyapna ranikluna himtuklewlu, tsru saletlewlu.
17Hi rimatluna hapnanuhchinikankaklewlu pirana.”
18“Hiyrun-koxa hi hpikluna Hoyakalu.”
Moisés Hiykole Yonatkaluru Miwekkaklewatkatu Piranapni
19Seyni wimata Moisés yonreru tshinyawaka wan-tshinanwakatna Moisés yonreru pirana homkahitatshine. Wan-rixa klu tshinanu hike yineru himukata powratlexinwa seyni ptowru tshijne hajeneko hikolukanuwnatka Hoyakalu hetanuya.
20Seyni hike yineru Moisés yonreru kamhatshri powratko Hoyakalu hetanuya. Klu tshinanu Moisés yonreru pirana rimathexikatka muhletu rixyawaka yineru.
Jesus Cristo Halixatshri Tsonu Piranapni
21Seyni Hoyakalu hali hiphujetletatkalu Moisés yonreru mwaknuklunuwa rawapiranatatka hpowraxikowakna yine Hoyakalu hetanuya. Xye pirana rekhita Moisés yonreru pirana hiyrun-koxa Hoyakalu tokanu hinkakletatshine hiphujetlu.
22Wpowratjerni Hoyakalu walixle Jesus Cristo tshinanuya. Ptowru halixatshri pejnu wan-hixka; klu tshinanu hikewani yineru pnuko hixatshriwa,
23seyni ptowru potuko yineru hektuwaka kamhatshrini hiyáhoni Hoyakalu hoyaknu hpupjexyana.
24Seyni Hoyakalu powratachatlu yineru, hi rujhalu hwenuxikowaka, Hoyakalu henekachalewata klu tshinanu Cristo Jesus wenutatkalu.
25Hoyakalu heneklu Cristo henekachaluru hiylatkaluru rixyawakapa hiyáhoni cruz rupniywaka tshinanu, yineru hektunu hiknokatshri rixyawakatka Cristo, ptowru yineru munanhalerutkani Cristo. Hoyakalu wan-hixa rekhixyawaklu potukalu rixyawaka. Mitshikananu Hoyakalu hetachatna hektuwaka kamhatshine, hmachiretannu tshinanu; hiyáhoni hi rapnokatna rektunna.
26Seyni xawakni Hoyakalu henekatkalu Cristo rekhixyawakaplu potukalu rixyawaka. Potukalni Hoyakalu hiyáhoni hpotukatanru Jesus halixatshripa.
27Hiyáhoni wumukata tserpiranatlexnawhe hix-nanuko? Hike! Kluneru tshinannihe? Moisés yonreru pirana womkahixyawakatka tshinanrahe? Hike, seyni Jesus walixyawaka tshinanni.
28Hiyáhoni wimatjemlu Hoyakalu powratlu yineru ralixle tshinanu tsonu seyni Moisés yonreru pirana romkahixyawaka hi powratlu yineru.
29Hkahwakhe judeu Hoyakalute tsonni, hi he judeu mixkane Hoyakalut-koxni wale? Hehe, halikakni, judeu mixkane Hoyakalut-koxni wale.
30Klu tshinanu Hoyakalu satupkalu. Hiyáhoni wale powratlu judeu-neru hiyrun-koxa judeu mixkane ralixlena tshinanu.
31Ha xawakni, wuknokachatatjerhe Moisés yonreru walixle tshinanu? Hike, hi psojikna wuknojinri seyni wpoyahokakanru Moisés yonreru.
Currently Selected:
Romanos 3: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
