Romanos 2
2
Hoyakalu Hapnokatlewle Piranapni
1Hiyáhoni hi pkahwakanru powra pixyawaka wane ptshininri satu hektutu kamhatshri. Klu tshinanu peyijinri satu hektutu kamhatshri, wane potuko pixa heyiklexnawa. Klu tshinanu waneko pixka hixatshri koxyi pixa, pixa wan-tshina rukolukanuwninripa.
2Seyni wimatlu potukalni Hoyakalu wan-rixa hikoluklexnawana xyekaka kamhatshine.
3Ha pixa, yineryi, rukolukanuwnana ptshinanwakatnahe xyekaka kamhatshine seyni waneko pixkalutu pkamhajeta. Pkahwakluhe pasujyalu Hoyakalu hapnokatlewle?
4Ho peyikluhe xawaka Hoyakalu potshwanu, wale hchinikanu, hkahwakhohnekanaxyawakyi? Hi he puchiniklu Hoyakalu hihlenu kosejyawakyi pehchinikanuxyawakapa?
5Seyni chiko haji pixini, pma mehchinikanhajitkanu tshinanu papatjeyehixnawa tsru jhekantshi hapnokaxikolu hohne tshinanu Hoyakalu hekhitlu hchinikannu potukal-potuko.
6Klu tshinanu Hoyakalu henekanru satkaka yineru waleko hkamrure wenru kihleru ho hektutu.
7Hoyakalu heneklewatanu riwejinri hikeklu hohne mnikawnakatupa hanunektako hi hituka kihleru kamhaleta hiyrunu Hoyakalu hpoyikoxyawakna hijhatshine. Hoyakalu honra rumuwkakpiratna hiyrunu riwejinrina mnikawnakatuko hijhatshine.
8Seyni halixkoxikatshinwa, halikakalutu tokantshi majnakowyehitatshinewa hektutu romkahixyawakna, wanna hoho rapokanu Hoyakalu jhekanu hiyrun-koxa rapnokaxikolna.
9Tsru salewaktshipni hiyrun-koxa wamontshi hapokhohotanru satkaka yineru riwejinri hektutu kamhatshriwa. Mitshikananhapka judeu-nerunepni waneya wane pnute judeu mixkane wan-hixko.
10Waneya himalwutkalurupni, kahwakpiratkalurupni, kihlehchinikanrupni satkaka yineru kihleru kamhatshri wan-hixkomka, mitshikananhapka judeu-nerunemkapni waneya wane pnute judeu mixkane wan-hixkomka.
11Klu tshinanu Hoyakalu hike yineru hkahwakpirata.
12Hiyáhoni ptowruneka hektune Moisés yonreru mwikane wan-hixatshinepniko, Moisés yonreru mwikanepniko hamhanuna. Hiyrunu ptowruneka Moisés yonreru majnakowaxikatshine rukolukanuwnanna Moisés yonreru tshinanu.
13Klu tshinanu Moisés yonreru yijnakochatatshine hi ruhletkana Hoyakalu hetanuya seyni Moisés yonreru homkahitatshinepa hihletko.
14Klu tshinanu judeu mixkane, Moisés yonreru mwikanemkani, seyni wane potuko rixinna ruphujetluna wannako rimwalerna htowutjerna yáholu Moisés yonrerumka hi rimwana.
15Wan-hixatshinekni hekhitlu wan-rixna yáholu Moisés yonrerumka hi rimwana seyni rajiyna hiyrunu hihchinikanuyna rawa wale yonreru pixkalut-potuko. Hiyáhoni rimat-hichinikanuwatna ho kihlerahe hkamhana ho hike.
16Waneklu hohnepa Hoyakalu hapnokatanru ptowru yine hchinikanu mimatyehikanatkotu ntshinyawaka kihle piranalu potuko hiwekkaklewatatshri pirana tshinanu Jesus Cristo tshinanuya.
Rapnokaxikowakna Judeu-ne Wannako Htshinanu Piranapni
17Ha pixa xawaka? Judeu-neru ptshininwa, Moisés yonreru munanhatshriyi hiyrunu palixkoxnawa Hoyakaluneru ptshininwa.
18Pixamka judeu himatlu Hoyakalu halujyawaka. Hiyrunu Moisés yonreru tshinanu ppoyaho himatletmaklu kihleru pnurexyawaka.
19Pkahwajnawa mayhalene kosekatshriyi hiyrunu mapchahawaka hwatshine tshinanu, katalu pikahwajnawa pixa, judeu
20mahchinikanune hasrukatshriyi pkahwajnawa, mturune yimanruyi ptshinnawa. Pkahwaklu Moisés yonreru tshinanu pimwalu ptowru potuko himatkaltshi hiyrunu halikakalutu pirana.
21Pimrine pasruka, haklu tshinanhe hi pasrujinwa? Punkakna hi htshowhuwatanu seyni pixa xawaka ptshowhuwatewhe?
22Pixa wan-tshina: Hi himopatlewatanu, seyni pixa xawaka pimopatlewathe? Peyikjetlu mayawletshichakaka seyni wanepnawaka hinkaklewawakapjikaka hajeru ptshowhuxini.
23Palixkoxnawa Hoyakalu pirana pimwiywaka seyni pma mimretkanuklunru yonruru pirana hi he ppatetjetlu Hoyakalu?
24Hoyakalu tokanu yonatkaluru wan-tshina: “Hixa judeu-nhi hektunu tshinanu judeu mixkane hektuwaka htshinanwakatluna Hoyakalu.”
Judeu Halikakalune Piranapni
25Moisés yonreru pirana pomkahixini, pujhalu judeu jiprojhiynawakwa pixka pixyawaka hijhakalurni wale. Seyni yokanruru pmajnakowaxini, hi psojikna repixatkayi pjiprojhikolu.
26Klu tshinanu judeu mixkatu hi jiprojhiynawa seyni Moisés yonreru pirana potukalu romkahixini, hi he xawaka Hoyakalu kahwaklu hatatjewa hjiprojhiynatkawa?
27Hiyáhoni hixa judeu-nerunhi heyikanwakatko judeu mixkaneya klu tshinanu hixa himwalu yonatkaluru hiyrunu hjiprojhajexnawa wanepnawaka hixa majnakowaxyalu yonruru pirana seyni judeu mixkane homkahitlu Hoyakalu hiykole pirana yáholu hi hjiprojhiynawana.
28Hiyáhoni hanu pothe rixa judeu? Roho mane hi judeu hixkaklu yineru. Hiyrun-koxa hi jiprojhaptojimtaluko judeu hixkaklu yineru.
29Seyni judeu pixkalut-potni yineru hitokote hwatshri, waleni hihchinikanu histakkaluru seyni hi kotshiroyni, xyekni Hoyakalu kamrure hi yineru mixkonuyni yonatkaluru homkahitatshri tshinanni. Wan-hixatshri yineru Hoyakalu rimalwuxiko, hi yineruyapni.
Currently Selected:
Romanos 2: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
