Romanos 1
1
1Hita, Paulo-no, Jesus Cristo towrerno, yonatlo twu yonawahlo. Hita Jesus nurrerno, nnuretka, ntowutka Hoyakaluya nunkaklexyawakaplu kihle piranalu potuko hiwekkaklewatatshri pirana.
2Kihler-potuko tokantshi hiwekkaklewatatshri piran-honra Hoyakalu mitshikananuko hinkakletlu Hoyakalu tokanu hinkakletatshineya hiyrunu Hoyakalu tokanu potukalu yonatkaluru rawa wale pirana.
3Xye yonatkaluru hinkakletlu Wutsrukate, Jesus Cristo, Hoyakalu whene. Himane Davi klopichani.
4Seyni rimaxikowaka potukalu rixyawakatka, Hoyakalu ruchpajya, retka hpixkonu tsru potuko. Klu tshinanu hipuktshi riwekkajika, rimathexikowaka Hoyakalu whene rixyawakatka.
5Hiyáhoni Jesus Cristo tshinanu Hoyakalu henekno xye hitakkaluru, hnurreru nixyawakatka, Cristo tshinanu, nalixkajyawakapna, kajnako nixkajyawakapna yine psol-tshijne hajeneko.
6Hixa Roma poktshi hajenhi ptowrunekhi Jesus Cristo tshanixlenhi.
7Hiyáhoni nyonanwakathi hixa ptowrunekhi Roma poktshi hwatshinhi, Hoyakalu hamotanunhi, htomhaka Hoyakalu kotspalatanune hixyawakapa; waneyaphi Hoyakalu hihlenu hiyrun-koxa hihlehchinikanrewlu Wuru Hoyakaluya hiyrunu Tsru Hixikatshriwa Jesus Cristo-ya.
Paulo Hichinikjexyawakna Cristo Halixatshine Hiyrunu Rexyawakapna Piranapni
8Mitshikananhapka npoyahnutlu Noyakalute, Jesus Cristo-ya hixa ptowruneka tshinanu; klu tshinanu hixa halixle pirana ptowruchaka hjemika.
9Hoyakalu nomkahitanruni psoluka nmixkonuya hiwhene Jesus, kihle piranalu potuko hiwekkaklewatatshri pirana nunkakletjereru hetanu, hi nweyawata. Hoyakalu himata ptowru hohneka nuchinikjethi nanjihohnereya.
10Hiyrun-koxa nanjijetlu Hoyakalu, ralujinipno, ritshixiniklunupno hita xekoyaka hixa napyehitanu.
11Klu tshinanu halikaka naluk-hetlethi klu tshinanu naluk-hapiklethi hixa satkaka himutlewlu henekachalu Hoyakalu Hiwejikaluruya hmixkotahchinikanutjerupa.
12Waleni hixa ptowrunekwu, hixa hiyrun-koxa hita walerutu papkoko wepixko; hixa hepixko nalixle tshinanu hiyrunu hita hepixko hixa halixle tshinanu.
13Hiyáhoni Cristo tshinanu nmoletanune, nalukhi hixa himaxyawaklu hixo katamka nalpokotatkalu hix-yehi napojinripa seyni ptowru katako satu pa hixanu himaletno wane nma yiywakanupa. Klu tshinanu naluk-halixkakletna yine hixa tskala hwatshine nixa halixkaklexyawakpotukna pimrine judeu mixkane pixka nkamrure tshinanu.
14Klu tshinanu naluk-hinkakletna ptowru neruka, yáholu yine ho kajitune, yáholu jimatkalerune ho hike mimatkane seyni nujhalu nunkajyawakna.
15Hiyáhoni ptowru numukaxyawaka naluk-hinkakletlexinri kihle piranalu potuko hiwekkaklewatatshri pirana haté hixa Roma poktshi hwatshinhi.
Hiwekkaklewatatshri Pirana Wale Pixkonu Piranapni
16Hi npatewyehitlu kihle piranalu potuko hiwekkaklewatatshri pirana klu tshinanu nimatlu waleni Hoyakalu pixkonu ptowru Cristo halixatshripa hiwekkakkalurupni; mitshikananhapka judeu-nerune tshinanupni waneya wane pnute judeu mixkane tshinanupni.
17Klu tshinanu Hoyakalu hekhixnawa potukalu rixyawaka yineru hiwekkaklewatatshri pirana tshinanu, hyinuwaklekananukawa haté wetpotutanhonuklu. Hiyáhoni wane ttshina yonawahlo potukalo: “Katukta Hoyakalu potukata, ralixle tshinanu riwekkakko.”
Yine Hektunu Piranapni
18Hiyáhoni Hoyakalu tenhohne hwatshri hekhixnawa hjihekannu ptowru yine hektunu tshinanu, halikakalutu tokantshi yohimpiratatshine tshinanu.
19Klu tshinanu wale Hoyakalu himatyehixikaluru phujetkalu; phujetkalu klu tshinanu Hoyakalu potuko phujewak-potuko hitakatkalu.
20Hoyakalu xye tshiji ruyakoxiniklunukananukotka haté xawakni, Hoyakalu metkotni seyni wale hpixkonu mnikawnakatni hiyrunu royaknu retpotutkahonukatka. Xye ptowru potuka hetka Hoyakalu kamhalerutka tshinanu hiyáhoni wannako htshinanupnina hmalixlenna tshinanupni.
21Rimathetmakluna Hoyakalu seyni hi hkahwakpiratluna Hoyakalu, Hoyakalu rixkal-tshinanu hiyrunu hi hpoyahnutluna Hoyakalu. Hiyáhoni hike muchinikanretkanni raj-koxna mapchahayna.
22Jimatkalerune hkahwajnawana seyni halikaka jipukalerunni.
23Hi Hoyakalu hoyaknu, hikeklu hohne mnikawnakatupni hkahwakpiratna seyni mayawletshichakaka hkahwakpiratluna yine moyaknuko pixka hixatshri hkahwakpiratna ho kamejirune mayawle ho niktshine quatro jixirune mayawle ho niktshine yosrolotatshine mayawle.
24Hiyáhoni Hoyakalu hichochatna hektut-potuko hkamhiywakna hektu haji rixle tshinanna, kapatmenuru hkamhakajyawakna wannakakluko.
25Ripekotluna halikakalutu Hoyakalu tokanu weyawluya. Hiyáhoni rimalwutluna, romkahitluna Hoyakalu kamhaleru seyni Hoyakalu potuko ptowru potuko hiyakotatshri hi romkahitna. Hiyrunu Hoyakalutkani himalwuhohnekanatkalurupa hikeklu hohne mnikawnakatupa. Amém.
26Hiyáhoni Hoyakalu hichochatna hektutu haluklu hkamhachaxyawakapna. Haté hsuxonerna suxo mixyawakanu kamha suxonkakluko pnu hixkakjeta.
27Waneko pixka rixkakna jejine, suxone ruchotna wane rixjexyawakna seyni jejinekakluko het-sotankakjeta, jejinekakluko pnu hixkakjeta Hoyakalu mukchikhihlenutanutu hkamhana hiyáhoni hyoptotluna rapnokaxikolna rujhalerna rumtuknu tshinanna.
28Hi raluk-himretahchinikanretluna Hoyakalu. Hiyáhoni Hoyakalu henekatkana hektu hchinikanu rixyawakna, malukkotu hkamhiywakna.
29Katsepoyna ptowru muhlentshi, himtuklewatatshri, hektutuya, hahxalewluya, ruylalewleyna, tokantshiya, yokwirewluya, hma hchinikannuymana, hapatlewluya,
30kapatlewaklerune, Hoyakalu kamnitatshine, malixletu, tsru rikahwajnawana, tserpiranawlu, hektutu hakanhakakatshine, tsrune majnakowyehitatshine,
31mahchinikanune, kyokwijeklerune, mamotlewatkane, chikohchinikanrune, metwamonrene.
32Hiyrunu rimatjemmakluna Hoyakalu hitakanru, ptowru pejnu wan-hixkalune hijhalu rupninripna, wanepnawaka wan-rixjetna seyni hi wane tsonu rixjetna; rukchikhihlenutluna haté pimrin-koxa wan-hixatshine.
Currently Selected:
Romanos 1: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
