Romanos 11
11
Hoyakalu Hetwamonuxyawakna Israel-neru Piranapni
1Hiyáhoni wane ntshina: Hiyáhola Hoyakalu hiknokachatna hinerune potuko? Hike, hikeklu, hi psojikna ruknojikna. Klu tshinanu hit-koxa israel-ner-potukno, Abraão-ni klopichno, Benjamim-nerno.
2Hoyakalu hi koxa ruknokachatanna hinerune hnurrene mitshikawlune. Hixa himatlu wane htshina Hoyakalu tokanu yonatkaluru Elias-ni tshinyawaka, Hoyakalu rapohchinikanuta israel-nerune tshinanu:
3“Ha Tsru Hixikatshriwa Hoyakalu, ruylatkana ptokanu hinkakletatshinni hiyrunu altar-kaka hyotkakna. Hita tsonu hitukatka hiyrunu xawakni hit-koxa raluk-hiylaletna.”
4Waneya hanhe htshin-hihretniru Hoyakalu? Wla htshina Hoyakalu: “Waneyawano sete mil yine Baal momkahitkane.”
5Waneko pixka rixna haté xawakni rawna yine hi híxona Hoyakalu nurrene Hoyakalu hihlenu nuretanune.
6Waneya Hoyakalu hihlenu hnurexinixkana hiyáhoni hi hkamrurna tshinanni. Wannako hkamrurna tshinanu hnuretkomkana waneyamka hi Hoyakalu hihlenu tshinanu hnuretkana.
7Ha xawakni hanhe wtshinanu? Israel-nerune hijhalermaka hi rukchikluna seyni Hoyakalu nurrene hikchiklu. Hiyáhoni pimrine chikohajiwata.
8Wane htshina yonatkaluru: “Hoyakalu hixkajyawakna chikohajiwatatshine rixyawakna, mchinikanune rixyawakna hiyáhoni haté xawakni kayhalmakna seyni hi retna hiyrunu kajnakmakna seyni hi hyijnakotna.”
9Hiyrun-koxa Davi-ni wla tshinnixka: “Wla hixkalunepni nikjexikowaka hkachixikona hiyrunu hyokwijetkona; hiyrun-koxa rallitkonna, rapnokatkonna.
10Ruchyayhaletkana hma mexyawakanupna; hiyrunu hi kmixkonutskijinapna hsaptshohikanuna kojwaklewlu tshinanu.”
Hma Muchopotuxikowakanna Judeu-ne Piranapni
11Waneya wane ntshin-hepomhalethi: Ha judeu-nerune, hpupjerna tshinanrahe ruknokkana? Hike, hikeklu. Seyni hpupjerna tshinanu hiwekkaklewatatshri pirana hakanhayehitatkana judeu-nerune minje. Hiyáhoni judeu-nerune het-sotanutna judeu mixkane.
12Hiyáhoni judeu-nerune pupjere wan-hixkaklu Hoyakalu hihlehchinikanre hapokanwakatna xye tshiji hajene hixolune. Judeu-nerune hamtakleru rukchikatkana judeu mixkane. Waleni Hoyakalu pohirewle. Hiyáhoni rehchinikanuxiniklunpatkana judeu-nerune yohnikpatkalu Hoyakalu pohirewle wanna yehiya.
13Hixa nunkaka, judeu mixkanhi. Hit-honra nuretkalurno judeu mixkane tshinanu hiyáhoni nuslahpotutlu nkamrure.
14Hiyáhoni pa katako numukata het-sotankakletanna nomolene, nonerune. Hiyáhoni pa katako Hoyakalu satkaka wanna hiwekkakanu nkamrure tshinanu.
15Klu tshinanu Hoyakalu hiknokanutkana judeu-nerune, rimatletatkana psol-tshijne hajeneko. Ha xawakni, hanu rixkonna judeu-nerunepni rimatlexikowakpatnaka Hoyakaluya? Wla rixkona, hipnatshinetka hiwekkakko.
16Hijpa psojite Hoyakalunu rixini hiyáhoni psolujpako Hoyakalunni. Hiyrun-koxa hahmuna tskihi Hoyakalunu rixini waneya hiplukak-koxa Hoyakalunni.
17Hatatjewa oliveira muna hislahluro plukaka kastakka. Waneya hixa judeu mixkanhi hatatjewa oliveira muna kahnete hwatshri pixka hixatshinhi waleplu kastajikolu hislahkaluru muna yokakkalunetkahi. Hiyáhoni hixa yoptotlu judeu-nerune mixkonu hiyrunu riweklena.
18Hiyáhoni hi halixkoxinwa klu tshinanu hiplukakachanhi. Hixa hi hiwekkaklu hitskihi seyni halikaka hitskihi hiwekkakhi hixa.
19Seyni hixa pa katako wane htshina: Hehemka seyni hislahkaluru plukaka kastakkatka wale ptaklu hyokakkatka hixa.
20Hichiniklu xawaka judeu-nerune kastakaplutka klu tshinanu hmalixlenna tshinanni. Seyni hixa wane hyokakkatka halixle tshinanu. Hiyáhoni hi halixkoxinwa seyni halikaka hpikanu.
21Klu tshinanu Hoyakalu hi hetachatatkana judeu-nerune hiplukak-potu pixka hixatshine seyni rapnokatatkana. Hiyáhoni hixlahe kahwaklu Hoyakalu hi hapnokatanhi hix-koxa? Wane.
22Hislahanu hanu potu rixa Hoyakalu. Kchinikanru seyni kapnokatle koxlu. Wale hapnokatanunna hektuwaka kamhatshinepni seyni hixa tshinanu kchinikanurni, Hoyakalu hchinikanu homkahixini. Wane hmixkanuklununapa hix-koxapni kastakkona.
23Hiyrun-koxa judeu-nerune hichoxiniplu hmalixlenna ruchpajyawakna munako hyokakkotnakna klu tshinanu Hoyakalu kpixkonru hyokajyawakpatnakna.
24Hixa judeu mixkanhi hatatjewa oliveira muna kahnete hwatshri plu kastajikolu oliveira muna hislahkaluru yokakkalune pixka hixatshinetkahi. Hi he xawaka myapretpotni Hoyakalu yokajyawaklu wale munako hyokakapluxyawakatnaka?
Israel-nerune Hiwekkajikolu Piranapni
25Cristo tshinanu nmoletanune, naluklu hixa himaxyawaklu pa pirana yohimluru pirana. Himaxyawakaplu hi ptowru potuko himatawa. Judeu-nerune hi ptowru hohnekananuko chikohajirunepni seyni wan-rixachatna judeu-ne judeu mixkane hma poyahokajiknu pchinikwana hi ralixanna judeu-ne.
26Waneya wane pnute ptowru judeu-neru hiwekkakko klu tshinanu wane htshina yonatkaluru: “Hiwekkaklewatatshri Sião poktshi ruchpajini, waleko hektuntshi konanu Jacó klopichaneya.”
27Hiyrunu wane htshina Hoyakalu: “Ntshinyawak-potuko nixanu. Rektunna nkoninna.”
28Judeu-nerune hiknokatkalu kihle piranalu potuko hiwekkaklewatatshri pirana hiyáhoni Hoyakalu kamnitna, hixa judeu mixkanhi hpoyaho hepixlexyawakapa. Seyni Hoyakalu nurexyawaka tshinanna, Hoyakalu himatletatkana judeu-ne, rutsrukatenna tshinanu.
29Klu tshinanu Hoyakalu hi yokmakahchinikanyehitlu katuktako raluka nurreta hiyrunu katuktako raluk-hihlehchinikanyehreta, hi hyokmakahchinikanuta.
30Seyni hixa judeu mixkanhi mitshikananu majnakowaxyatkalu Hoyakalu. Seyni judeu-nerune majnákonu tshinanu Hoyakalu hetwamonutatkahi.
31Hiyáhoni Hoyakalu hetwamonuxyawakhi tshinanu, judeu-nerune majnakowaxyalu Hoyakalu, wanna koxa himukata yoptolexyawakpatnaklu Hoyakalu hetwamonre.
32Ptowruneka hektuntshi towre mixkonu hitakka Hoyakaluya. Hiyáhoni xawakni Hoyakalu himukata hetwamonretna ptowru neruka.
Hoyakalu Himalwuxikolu
33Ha hi psokananru Hoyakalu hihlenu. Hanhe ruchinixya hihchinikanu hiyrunu rimatkalnu! Kathe xawaka himatjemlu Hoyakalu hixjexyawaka?
34Wane htshina yonatkaluru Hoyakalu pirana: “Kathe xawaka himatlu Hoyakalu hchinikanu? Kathe xawaka himukata hasrukletlu?”
35Hike deve-kaklu Hoyakalu satu pa hixanu renekkoklunu.”
36Klu tshinanu ptowru potuko hkamhatka Hoyakalu. Ptowru potuko hakanha Hoyakalu tshinanu hiyrunu waleko htshinanu rawa ptowru potuko. Hiyáhoni himalwutkalurni Hoyakalu hikeklu hohne mnikawnakatupni. Amém.
Currently Selected:
Romanos 11: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
