Romanos 12
12
Hoyakalu Wenejnawakwa Piranapni
1Hiyáhoni Cristo tshinanu nmoletanune, Hoyakalu hetwamonre tsru potuko rixyawaka tshinanu nanjithi henejinwa Hoyakaluya himane henekachalu rixyawaka. Hoyakalu tshinanu kotspalatkalunhi hiwejinri powraluya, Hoyakalu hikchikhihlenrerutka. Wane potuko rimalukyi Hoyakalu.
2Hi hewi tshijne hiwejikatshine pixka hixanu seyni hitshitanru Hoyakalu herotexyawaklu hixa hchinikanu psol-potuko. Wan-hixatshinephi himatanru Hoyakalu halukanru kihleru hiyrunu hikchikhihlenruru hiyrunu ruhleretanru potuko.
Cristo Halixatshri Cristo Mane Psojitekni Piranapni
3Renekachale Hoyakalu hihlenu Hoyakalu henekachaxyano tshinanu, wla ntshina hixa satkakhi tshinanupa: Hi hkahwajinwa pimrine yohnik-hihlenhi hixyawaka. Seyni halixlewlu Hoyakalu henekachaleyma hyahoxinwa hanu hixatshinhi.
4Klu tshinanu wan-rixa yineru, pa manepkalu seyni híxolu himane psojitkaka hiyrunu satkaka wimane psojitkaka pnu pejnu rixa kamrureta.
5Hiyáhoni hix-koxa, yáholu hixomnuwu seyni pa manepkawu Cristo-ya. Hiyrunu ptowrunekwu pa manepka psojitwu pimrineymakananuko.
6Hiyáhoni Hoyakalu henekachale kakojerni, hpixkonu reneksatwu, womkahitanru. Hiyáhoni Hoyakalu pixkonu renekachale Hoyakalu pirana wunkaklexyawaka rixini waneya wane potuko wixanu, hi psokta wixa halixleta, wane wixanu.
7Seyni Hoyakalu henekachale wepixkakjexyawaka rixini waneya wepixkakjetanu; seyni wasruklewaxyawaka rixini waneya wasruklewatanu;
8seyni pimrine wuykoxyawaka rixini waneya wuykolewatanu. Katukta henekhejnunkatrewata poyikowluyma renekanru. Towutatshri rixini waneya ruslahpotutanu. Jetwamonukleru rixini poyikowluyma repixanru.
Hoyakalu Halujyawaka Wkamhiywaka Piranapni
9Hamotlewatanu halikak-potuko. Muhlentshi hahnanutanu seyni homkahitanru kihle hixatshri.
10Hamotkakanu hixkakluko, moletkakatshine pixka. Hkahwakpiratanru hixa satkakhi.
11Hkamrurewatanu, hi xako hmernu. Hoyakalu halujyawaka hkamhanu hixako hmixkonu psoluyako.
12Himuwpotutanu klu tshinanu hiwekkakkalunhi kahwakkalunhi. Hakotachatanru salewaktshi. Hi hituk-hanjihohneretanu.
13Henekachalewatanu mahaxikatshine moletkakatshine Jesus tshinanu. Yanamtatshine hapojini kihle yoptole hixanna.
14Hoyakalu hanjitanu kihleru hixa hapnokatjene tshinanu. Hihlewahchinikanyehitanna, hi hkamakatanna.
15Himuwatanu himuwatatshriyma. Hwamonuwatanu tshiyahatatshineyma.
16Pa hchinikanurunephi. Hi halixkoxinwa seyni haté malukkotu hitajinwa. Hi hkahwajinwa jimatkalerun-potuko hixyawaka.
17Satu yineru yotnexinhi hi hapnutanru wale. Hijhalu kihleru hkamhiywaka ptowru yineru hetanuya.
18Hixako himukaxyawaka ptowru potuko hixanu pa hchinikanupka hixanu hixkakluko.
19Nomolene, hi hix-nanuko hapnuyehixinwa seyni hetachatanru Hoyakalu hapnuyehixyawakhi. Klu tshinanu yonatkaluru wan-tshina: “Hitako hapnutanru. Napnokatanru htshina Tsru Hixikatshriwa Hoyakalu.”
20Seyni yonatkaluru tshinyawaka hixanu: “Hnatshixini pkamnitjeru, pohlutanru; ronunnahatewaxini, putanru; wane pixa hepixlexinri hpatewatanutka hatatjewa tshitshime ppokotlu hijiw-hoho hwaprotatshri.”
21Hi hetachatanru hektutu hihrokkajyawakhi seyni hektutu hkamnitanu kihleruyma.
Currently Selected:
Romanos 12: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
