Romanos 10
10
Judeu-nerune Hi Halixlu Hpowraxikowakna Piranapni
1Nomolene, hitamka psoluka nmixkonuyma nalukmaklu nonerune hiwekkajikowaka. Wanna nanjiyehjeta Hoyakaluya.
2Klu tshinanu nuphujtatlu judeu-nerune yapretakmaklu Hoyakalu halujyawaka hkamhiywakna. Ralukmakna seyni hi rimatyehpotutluna Hoyakalu.
3Hi rimatjemluna hanu rixa potukatletna Hoyakalu yine hiyáhoni hmunanhiynawana yine Hoyakalu hihlenu hpoyahokajyawakna. Ruknokluna Hoyakalu powratlewle pirana.
4Klu tshinanu Hoyakalu hitneprijyatkalu Moisés yonreru pirana Cristo tshinanu hiyáhoni ptowru Cristo halixatshinepa himukata powratletka Hoyakalu hetanuya.
5Klu tshinanu Moisés yonatlu Moisés yonreru pirana homkahitatshri powraxikowaka pirana, wla htshina: “Yonruru homkahitatshri riwekkakko romkahle tshinanu.”
6Seyni Hoyakalu powratanru yineru ralixle tshinanu wane htshina yonatkaluru: “Hi pepomhinwa: Kathe tenhohne hatskotanu?” Waleni hwapkalurupa tshijiya Cristo tenhohne hajeruya.
7“Hi pepomhan-koxa: Kathe serpikanu haté tshiji hitokote?” Wale piranni Cristo hatskokakatshripa hipnatshine tskalaya.
8Seyni wla htshina yonatkaluru: “Hi howuklu tokantshi. Pinama rawa, paj-koxa rawa.” Walekni tokantshi halixlu pirana, wunkakletanru pirana.
9Wane ptshininri pinamaya, “Jesus Tsru Hixikatshriwa Hoyakalu hixyawaka” ptshinini hiyrunu palixinri pajiya Hoyakalu hiwekkajyawaklu Jesus, piwekkakko.
10Klu tshinanu walixinri wajiya, Hoyakalu potukatwu. Winamayma wunkakletlu Cristo walixyawaka hiyáhoni wiwekkakka.
11Klu tshinanu wane htshina Hoyakalu tokanu yonatkaluru: “Ptowru yineru wale munanhatshri hi hmahijerutanu.”
12Yonatkaluru wan-tshina ‘ptowru yineru’ wane htshina klu tshinanu hi rawa kakojeru, yáholu judeu-neru, yáholu judeu mixkatu. Walerutu Tsru Hixikatshriwa Hoyakalu rutsrukatetna hiyrunu Hoyakalu hihlehchinikanutna ptowru yineru hanunektako munanhinri.
13Wane htshina yonatkaluru: “Katukta hanjitlu Tsru Hixikatshriwa Hoyakalu riwekkakko.”
14Seyni hanhe rixa hanjiretanruna Tsru Hixikatshriwa Cristo hma malixkanuklunruna? Hanhe xawaka rixa himukatle halixletluna hma yijnakpiranyehitanutna? Hanu rixa yijnakoletanruna hiwekkaklewatatshri pirana hike munkakkanuklunna?
15Satu hinkaklewatatshri myokanatkonuklunu, hanhe xawaka rixa himukata hinkaklewleta? Wane htshina yonatkaluru: “Hi pa hihlen-jixikananuktana kihle piranalu potuko hiwekkaklewatatshri pirana hihlehchinikanrewatatshri pirana hinkakletatshine!”
Israel-nerune Majnákonu Wannako Htshinanna Piranapni
16Seyni hi ptowru israel-neru halixatkalu kihle piranalu potuko hiwekkaklewatatshri pirana. Klu tshinanu Isaías yonreru wan-tshina: “Ha, Tsru Hixikatshriwa Hoyakalu, kathe halixlu wunkakle?”
17Hiyáhoni kihler-potuko tokantshi jemikowaka ruchpajini halixlu. Hiyrunu yine jemanru kihler-potuko tokantshi satu hinkaklexinri Cristo pirana.
18Seyni nepomhanhi: Hi he hyijnakotluna kihler-potuko tokantshi? Hehe, hyijnakotmakluna wane htshinyawaka yonatkaluru: “Psol-tshijneko hpohiwaxya runkaklena. Htokanna haté xye tshijne mahaxyawak-potuko rapokhimata.”
19Seyni wane ntshinatnaka: Ha israel-nerune, hi he xawaka rimatjematkaluna? Mitshikananhapka Moisés wan-tshina: “Hita het-sotankakanhi yine hike mkahwakpiratkane hetanuya. Pahnanutkolunephi pa nerune mchinikanune tshinanu.”
20Hiyrunu Isaías hi pika wane htshinyawaka: “Nukchikna nma mujhanuneko hiyrunu nakanhayehitna nma mepomhayehitanuneko.”
21Seyni israel-nerune pirana Isaías wan-tshinyehitna: “Psol-hohneruka naluk-himatletletmakna yine hektune, chikohajirune.”
Currently Selected:
Romanos 10: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
