Gálatas 4
4
Hoyakalu Whenenetkawu Cristo Tshinanu Piranapni
1Hiyáhoni wane ntshina: Mturu hkaylerupa hma myoptotkanu pchinika towrertshi pixka rixnawa. Yáholu ptowru potukomka walenutkani.
2Mturu rixka pchinika, jinotaklerune hiyrun-koxa suslahaklerune towre rutakka haté rapokhohnexinipa ruru marca-hohnexyalu hyoptotanru hkaylerupa.
3Waneko pixka wixa hix-koxa mturune pixka wixakanaxiniwa, xye hohne hajerkaka towutjekanatwu.
4Rapokhohnepotuxinixka Hoyakalu yokanatlu hituru, suxo hmatuxyatka Moisés yonreru homkahitatshrotkani.
5Wan-rixa, Moisés yonreru towre hkochpajyawakapna Moisés yonreru homkahitatshine Hoyakalu whenene wixyawakapa.
6Hiyáhoni rekhixyawakaplu Hoyakalu whenene wixyawaka, Hoyakalu yokanatlu Hituru Hiwejikaluru, wan-tshinatshri wajiya. Hipokananu wla htshina: “Hirtshi, Nuru.”
7Hiyáhoni hi towrertshinhi seyni whentshinhi. Hiyahokni whentshine hixyawaka tshinanu, Hoyakalu henekanhi ptowru potuko hiwhenene renekanrupa.
Paulo Kojwakahchinikanuta Gálatas Hajene Tshinanu Piranapni
8Seyni mitshikananu Hoyakalu hmimatyehitkanuklunuwa, hoyakalune minjene towutjekanathi.
9Seyni xawakni hixa himathetatkalu Hoyakalu, halikak-potu Hoyakalu himathetatkahi hixa. Hanhe xawaka himukata satokanwakletanru xye hohne hajeru mahijerkaklewatatshri hike mkochpakkatu? Kluneru tshinanhe hixa hijhalu xyekaka towuxyawakhi hiyrunukotnaka?
10Hixa himretpotutlu hihohnekaka, hiksurkaka, hipapkolkaka, mhalkaka.
11Nkojwakahchinikanuta hixa tshinanu. Hiyáhola nmahijeru kamrurewletatka hix-yehiya?
12Cristo tshinanu nmoletanune, nanjithi hita pixka hixahchinikanuxyawaka klu tshinanu hixa pixkalut-koxno hita. Hike halikaka himtukno hita.
13Hixa hichiniklu mitshikananu nyeyixle, nuhrokmanre tshinanu nehinkakletkahi kihle piranalu potuko hiwekkaklewatatshri pirana.
14Yáholu tsru yaprentshi nenekhi nyeyixle tshinanu, hixa hi heyikatkano. Hiyrun-koxa hike hiknokno seyni kihle hixa yoptoletno hatatjewa hiwejikaluru Hoyakalu towreru tenhohne hichpajikatshri hyoptota ho hatatjewa Jesus Cristo potuko hyoptota.
15Poyikpotukananhi. Klu tshinanhe hi wan-hixa xawakni koxa? Klu tshinanu nimatlu mitshikananu hike potuko htshipexyano haté himukatkamka hiyhal-sahi koxa hkochpakanumka henejyawakapno.
16Halikaka pirana nunkajyawakhi tshinanrahe xawakni hixa kahwakno hkamnitjeru nixyawaka?
17Nyi jejine hmixkotahchinikanutjene phuta hi kihlerunni. Seyni hixa rujhahchinikanutna rumtujyawakaphina hita hma momkahixyawakanupa seyni wanna potu homkahixyawakapni.
18Kihleru hmixkowahchinikanhohnekanaxinripa kihleru tshinanu. Hi hix-yehi nwini tsonu wan-hixanu.
19Ha nowhenene pixkalune! Matuwhenetatshro pixka nixa jemletshinothi. Hi nutuka jemletshinothi haté Cristo hali tsepotlehchinikanuxiniphi.
20Hix-yehimka naluk-hwaleta xawakni klu tshinanu hi nimat-hichinikanuwyehithi. Sara Hiyrunu Agar Tshinkalune Yapkakle Pirana
21Hinkakanno, hixa Moisés yonreru homkahpiratatshinhi, hi he xawaka himatjemlu Moisés yonreru pirana?
22Wla htshina yonatkaluru. Hepi whenru Abraão. Satu hiwhene towretshro whenni. Satutnaka mtowutkoto whenni.
23Towretshro whene matuchata ptowru mturu pixka. Seyni mtowutkoto whene Hoyakalu hinkakletahnapurerni wale.
24Xye yapkaklu piranni. Hepi kojiretlu piranni. Satu himriji Sinai tshinikowaka hichpajikatshrini, Agar tshinkaluro hyapkakleta. Towhenene koxa wala pixkako hixa towutletko.
25Agar tshinkaluro yapkakletlu himriji Sinai tshinikowaka, Arábia tshijne hwatshri. Halikaka Jerusalém poktshi tyapkakleta Agar. Jerusalém poktshi towretshri Jerusalém hajene ptowruneymako.
26Seyni Jerusalém poktshi tenhohne hajeru waleni wunro mtowutkoto pixkalutu.
27Klu tshinanu halikak-potuk-tokantshi wan-tshina: “Suxo mwuhenewatkatokananyi, ppoyikowatanu! Pixa, hikeklu tshinowatatshrokananyi, psaplewatanu ppoyiknuyma. Klu tshinanu khanururo pnute hixonu whenro hichotkaluro.”
28Seyni hixa, Cristo tshinanu nmoletanune, Isaque pixka hixa. Hoyakalu whenenetkahi Hoyakalu hinkakle tshinanu Isaque pixka.
29Klu tshinanu waneklu papko ptowru mturu pixka hixa matlechatatshri kamnitlu Hoyakalu Hiwejikaluru matkakleru. Waneko pixka rixa haté xawakni.
30Seyni hanu htshina Hoyakalu tokanu yonatkaluru? Wla htshina: “Puknokanro towretshro toturuyma. Klu tshinanu towretshro whene hi yoptotanru rumlujikolna mtowutkoto wheneyma.”
31Hiyáhoni, nmoletanune Cristo tshinanu, hi towretshro whenenwu hixa seyni mtowutkoto whenenwu hixa.
Currently Selected:
Gálatas 4: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
