Gálatas 5
5
Moisés Hiykole Yonatkaluru Ho Ruchochaxikolu Piranapni
1Cristo hichokakwu hichotkalune potuko wixyawaka. Hiyáhoni hpoyehixinwa hichoxikolu pirana tshinanu. Hi hkachitkotnaka towretshine hixyawaka hiyrunukotnaka.
2Hyijnakpotutanno! Hita Paulo-no wan-tshinhi. Katukta jiprojhakjixinwa, hi psojikna repixiko Cristo tshinanuya.
3Hiyrunu wane ntshinatnaka. Katuktako jiprojhakjixnawa rujhalu Moisés yonreru pirana psoluka romkahixyawaka.
4Hanunektahi hixa kahwaklu Moisés yonreru pirana homkahixini powratlewaxyawaka Hoyakalu yhaleya hkotspalaxinwa Cristo yehiya, Hoyakalu hihlenu renekachale psoluka hamtakatshinetkahi.
5Seyni hixa, wkahwaklu Hoyakalu halukanwu. Klu tshinanu Hoyakalu Hiwejikaluru pixkonu tshinanu hiyrunu walixle tshinanu wumukatlu.
6Klu tshinanu Jesus Cristo hetanu hi jiprojhikatshrikwa himukatlu, hi mjiprojhikatukwa yineru himukatlu. Seyni halixlu hichiniklewluyma halikaka himukatatshri potukni.
7Kihle hixjekanata. Klu himaletatkahi halikaka pirana hma momkahixyawakanu?
8Xye hichinikanretleru hi htshanixjeru henejyahi.
9Xye pirana: “Psotsonujiji chitshponatshri psolujpako hchitshponkaka.”
10Hixa nkahwaka Tsru Hixikatshriwa Hoyakalu hepixle tshinanu hi pnuko hixahchinikanutanu. Seyni katuktako hkojwakjeru rapnokatko Hoyakaluya.
11Ha hita xawaka, Cristo tshinanu nmoletanune, jiprojhaptojru pirana tsonu nunkaklexini himka rukolukanno seyni kluneru tshinanhe nkamnitka haté xawakni? Jiprojhalu munanhikolu tsonu nunkakletkamka waneyamka hike yineru kojwakahchinikanutanutka cruz hinkaklexikolu pirana tshinanu.
12Nalukmaklu hkojwakahchinikanutjene hjihejhapotuxikowakna.
Hamotkaklu Wuchoxikolu Pnute Hijhakaluru
13Cristo tshinanu nmoletanune, hixa tshanixka hichotkalune hixyawakapa. Seyni hi hixako himane halujyawaka hkamhanu mtowutkone hixyawaka tshinanutka. Seyni Hoyakalu hichiniklewle tshinanu hepixkakanu.
14Moisés yonreru ptowruko hpoyahokakatka xye towutlupka tshinanu: “Puchinikanru pimwastsitanru pix-nanuko pixka.”
15Seyni hejnune kmatsyirune pixka hachkotkakatshine, nikkakatshine pixka hixini, xako hnikatkakapaka.
Hoyakalu Hiwejikaluru Kamrure Ho Hixako Hihchinikanu Kamhapirleru Piranapni
16Naluka wan-tshinreta: Hitshitanru Hoyakalu Hiwejikaluru hixa hiwejinri hkosejyawakapa. Hikeklu hixako hihchinikanu halujyawaka homkahitanu.
17Klu tshinanu hixako hihchinikanu kamhapirlu kamnitlu Hoyakalu Hiwejikaluru hchinikanu. Hoyakalu Hiwejikaluru hchinikanu kamnitlu hixako hihchinikanu. Hixako halujyawaka hiyrunu Hoyakalu Hiwejikaluru halujyawaka kamnikaka. Hiyáhoni hixa halukanrukaka hi himukata kamhaleta.
18Klu tshinanu hixa hitshixiniplu Hoyakalu Hiwejikaluru kosejyawakaphi, Moisés yonreru hi hixa towutatshrini.
19Wimatlu hixako wihchinikanu hichpajikatshrikaka. Wannani himopatlewlu, hapoklewlu, pitshotlewatatshri, hektutu kamhalu,
20mayawletshicha kahwakpiraxikolu, kahontshiwlu, jhekantshi, kamnirewlu, hejnuhimlu, hahxalu, himtuwaktshi, hihjekaklu, kotspalahchinikanrewlu, pnuko hasruklewlu hasruklewatatshri,
21sotanuhonutshi, himri, tsru nikatshri, hiyrunu wane pixkalutkaka. Ntshinyawakatka mitshi pixka ntshinanukotnaka, wan-hixatshinenapa hi hyoptotanruna Hoyakalu pohirewaxyawaka.
22Seyni Hoyakalu Hiwejikaluru kamrurni hixkakluko hamotkajyawaka, wumuwaxyawaka, hwachalu, ptowru potuko wakoxyawaka, kchinikanurune wixyawaka, pimrine wuchinikanrexyawaka, walixyawaklu,
23hixanu tsonu wma muchinikanrexyawakanu, hi hix-nanuko walujyawaka tsonu womkahitanu. Xyekaka Hoyakalu Hiwejikaluru kamrurni. Hi rawatka satu yokanruru xyekaka himaletatshritka.
24Cristo-ymalune wannako ralujyawakna ruknokna. Himanna halujikolkaka hiyrun-koxa himanna het-sotanrewle ruknokna Cristo pixka. Hatatjewa Cristo-yma cruz rixpatkatka himanna.
25Hoyakalu Hiwejikaluru himukatle wiwejini, wujhalu Hoyakalu Hiwejikaluru halujyawaka koxa womkahixyawaka.
26Hi hix-nanuko halixkoxinwa. Hi wyotnekakanu. Hi whahxakajini.
Currently Selected:
Gálatas 5: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
