Gálatas 3
3
Ho Moisés Hiykole Yonatkaluru Ho Halixlu Piranapni
1Gálatas poktshi hajene mchinikanunhi, kathe yokchathi halikak-potuk-tokantshi hmajnakowyehixyawaka? Hanhe himukata wan-hixleta, hixa Jesus Cristo pirana phujewak-potukomka hiphujewnayehithi, cruz hixa tshinanu rupniywaka pirana?
2Xye pirana naluk-himatlexyahi. Hanu hixa yoptoletlu Hoyakalu Hiwejikaluru? Ho Moisés yonreru pirana homkahixikolu tshinanrahe ho halixlu pirana yijnaxikolu tshinanrahe halikaka?
3Mahchinikanunrahe? Hixa Hoyakalu Hiwejikaluruya yinuwakatshinhi hkahwakhe xawakni hpotukatko hixa nanwaka tshinanu?
4Hixlahe ptowruko mahijeru salewnakaklechathi? Halikaka hike mkochpakkatu rixkamka?
5Hoyakalu honra Hoyakalu Hiwejikaluru heneklewatatshri hiyrun-koxa himyekaklewatatshri kamhatshri hixa tskalaya wan-rixa Moisés yonreru pirana homkahixikolu tshinanrahe ho halixlu pirana yijnaxikolu tshinanrahe halikaka?
Hoyakalu Hinkaklexyalu Abraão Pirana Halixluyma Tsonu Retko
6Petanru Abraão-ni. Hoyakalu ralixa hiyáhoni wale tshinanu hike mixkatu hkahwakka Abraão.
7Hiyáhoni hixa himatlu Abraão klopichane halikakalune wannani halixatshine.
8Hoyakalu tokanu yonatkaluru hinkakletahnaputlu judeu mixkane halixlu tshinanu hpowratkona Hoyakaluya. Hiyáhoni hma makanhaknuklunuwa kihle piranalu potuko hiwekkaklewatatshri pirana yonatkaluru wan-tshinanwakatlu Abraão: “Pixa tshinanu Hoyakalu hihlewahchinikanyehitna ptowru tshijne hajeneko.”
9Abraão halixatka. Hiyáhoni ruhlewahchinikanyehitka Abraão. Waneko pixka rixka ptowru halixatshri Abraão pixka ruhlewahchinikanyehitkana.
10Moisés yonreru pirana homkahlu munanhatshine wannakni Hoyakalu kamakatanunepa. Klu tshinanu wane htshina halikaka tokantshi yonatkaluru: “Ptowruneka katuktako hi homkahitlu ptowru potuko yonruru pirana hajeru, wanna Hoyakalu kamaklewle hwatshinni.”
11Wimaxyawaklu hi satukna yineru powratko Moisés yonreru pirana homkahlu tshinanu Hoyakalu hetanu. Klu tshinanu halikaka tokantshi yonatkaluru wan-tshina: “Hoyakalu powratleru halixlu riwejya.”
12Klu tshinanu Moisés yonreru pirana homkahlu hi halixlu tshinanni. Klu tshinanu halikaka tokantshi yonatkaluru wan-tshina: “Katukta kamhanru Moisés yonreru tshinyawaka ptowruka, wale kamhatshri hiwekanu yonruru pirana homkahixikolu tshinanu.”
13Cristo hipnanatka hkochpajyawakwu Moisés yonreru pirana hapnokatlewleya. Hixa kachrijru kamakatkalurni Cristo. Klu tshinanu halikaka tokantshi yonatkaluru wan-tshina: “Kamakatkalurupni katukta hahmuna hixripkakko.”
14Hoyakalu hihlewahchinikanyehixyawaklu Abraão pirana himukata hapokyehretna judeu mixkane yehi Jesus Cristo tshinanu wyoptoxyawakaplu Hoyakalu Hiwejikaluru runkakletleru halixlu tshinanu.
Hoyakalu Hinkakle Piranapni
15Cristo tshinanu nmoletanune, yineru hixannu pirana ntshina: Yáholu yineru hinkaklechani seyni ruphujetko halikak-piranni, hike hiknoktokanutanru. Hiyrun-koxa hike hiwjetanru.
16Hoyakalu hinkakle pirana, Abraão hiyrunu Abraão klopichane tshinanu runkakletlu Hoyakalu. Halikaka tokantshi yonatkaluru wan-tshina hi hiklopichane tshinanni htshina, hi hixolune hkochtsheka seyni hiklopicha htshina satupka hkochtsheka. Piklopicha tshinanni htshina. Waleni Cristo.
17Hiyáhoni xye ntshina: Hoyakalu hinkakletlu hkamhalerupa Cristo-ya. Waneya Moisés yonreru pirana quatrocentos e trinta mhale wkatanu hohneko rakanhatka seyni hi rumukata makanhalnuta Hoyakalu tshinreru. Hoyakalu hinkakle hi hmahijerutanu wkatanu hohneko hapokatshri tokantshi tshinanu.
18Klu tshinanu wyoptotanrupa Hoyakaluya, Moisés yonreru tshinanu wyoptotkamkalu, hiyáhoni hi Hoyakalu hinkakletlerumka wyoptoxinri. Seyni Abraão yoptoleru Hoyakalu henekachale.
19Hiyáhoni kluneru tshinanhe Moisés yonreru hitakka? Rutakka rimathexikowakapa hanu rixa hektuntshi. Moisés yonreru towutlewatanu haté rapokpotuxinipa Abraão klopicha hinkakletkaluru. Moisés yonreru henekka hiwejikalune Hoyakalu towrene tenhohne hajeneya. Satu jeji papohchinikanutkolumyo rutakka.
20Papohchinikanutkolu hepi sretako rujhika. Seyni Hoyakalu satupka.
Klu Rimaluka Moisés Hiykole Yonatkaluru Piranapni
21Moisés yonreru piranrahe xawaka kamnitlu Hoyakalu hinkakle pirana? Hike, hikeklu. Klu tshinanu rawkamka satu hiykolu hiweklu heneklewatatshri, waneyamka Moisés yonreru hima ruchpajikmaka yineru potukatatshri Hoyakalu hetanuya. Hikemka mahatanutka.
22Seyni Hoyakalu tokanu yonatkaluru wan-tshina, ptowru yineru potuko hektuntshi towutlerni. Wan-rixa hiyáhoni halixlu tshinanu ptowru yineru potuko himukata yoptoletanru Hoyakalu hinkaklexyana hyoptotanrupna Cristo halixatshinetka.
23Seyni hmapokkanuklunuwa Cristo halixikolu pirana, Moisés yonreru pirana himretlewakanata hinotlewatatshri pixka rixapa haté ruphujewninixka halixlu pirana.
24Moisés yonreru hinotlu yineru haté rapojinipa Cristo. Hiyahokni halixlu tshinanu Hoyakalu halukwu mimaletkonetkawu.
25Xawakni rapokatka halixlu papkolu. Hiyáhoni hi wujhalu wtowuxikowaka.
26Klu tshinanu hixa Jesus Cristo halixyawaka tshinanu hixa ptowrunekhi Hoyakalu whenenhi.
27Klu tshinanu hixa batiza-tka himathexikolupa Cristo-ymalunhi hixyawaka hiyahokni hixa Cristo-kni wimkalu.
28Satupkahi Cristo Jesus-yma. Hi judeu-nhi hi judeu mixkanhi. Hi towrertshiko hi hichotkaluruko. Hi jejineko hi suxoneko.
29Cristo-nune hixyawaka tshinanu hix-koxa Abraão klopichanhi. Hiyrun-koxa wyoptotanru Hoyakalu hinkaklexyawu wyoptotanrupa.
Currently Selected:
Gálatas 3: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
