Colossenses 3
3
Cristo Hoyaknu Yehi Hwatshine Piranapni
1Hiyáhoni Cristo-yma wiwejinixka wujhanru tenhohne hajerkak-pirana, Cristo hwiywaka hwatshri, Hoyakalu potukle sreta tuplatatshri.
2Tenhohne hajerkak-pirana hichinikanretanu. Hi xye tshijne hajeru pirankaka hichinikanretanu.
3Klu tshinanu hipnatshinetka pixkalunhi hiyrunu hixa hiwejinri Cristo-ymalu, Hoyakalu yohimlenetkahi.
4Hixa wiwejinri halikakalutu Cristo-ni. Waneya ruphujewninipa Cristo hix-koxa hiphujewnanu waleyma royaknu yehi.
Wiwejinri Mitshikawluru Herotexikolu Piranapni
5Hiyáhoni hkamakatanru mantshi het-sotanrerkaka xye tshijne hajeru, hapoklewlu, kapatmenuru, kapnoka makawleru, hektutu haluklu, hiyrunu sotanuhonutshi, walekni mayawletshicha munanhikolu.
6Klu tshinanu xyekaka tshinanu runa Hoyakalu hapnokatlewle hmajnakowyehitjene tshinanu.
7Hix-koxa xyekaka hkamhajekanata wan-hixa homkahrejekanaxini mitshi.
8Seyni xawakni hixa haluk-hiknokletanru xyekaka ptowruka: jhekantshi, hahxalu, hapatlewlu, hektuwaka htshinanwakaxyawaklu Hoyakalu, kapatmenuru hyanumaxyawaka.
9Hi hyokwikakanu. Klu tshinanu hixa hiknokatkalu mitshikananu hixantshi hkamhajekanatanruymakananuko.
10Herotu hitajinixkawa. Waleni chinikantshi herotexikolu. Rerotetjetlu wihchinikanu haté Hoyakalu wuyakotjeru hchinikanu psoluka wapkapanu.
11Hiyáhoni xawakni hi kakojerune hkahwakkatka ho judeu mixkane, ho judeu-ne, ho mjiprojhikanwa, hi jiprojhikatshriwa, ho pa tokanu yanumaxikatshriko, ho kajituko, ho towrertshiko, ho mtowutkotuko. Klu tshinanu ptowrukni Cristo-nu hiyrunu Cristo-kni ptowruko.
Jesus Cristo Hiwaka Himwatshri Hixyawaka Piranapni
12Hoyakalu hayinetenetkahi. Hihchinikanunetkahi. Hnurethi walenuko hixyawakpatka. Hiyáhoni hixa hijhalu hyochmajnawakwa hetwamonrewluya, hichiniklewluya, mturu hixnawakwa, mchiretannutshi, kahwakachluya.
13Hakotachakakanu, hkaspukahchinikankakyehitanu satu yineru kojwajinhi. Cristo kaspukahchinikanyehixyawakhi pixka hixanu hixa.
14Waneya xyekaka pnute hyokakanru pimrine hichinijyawaka. Klu tshinanu hichiniklewlu ptowruka hpoyahokaka.
15Hitshitanru Hoyakalu wapnanuhchinikankakjeru kosejyawaklu hixa hchinikanu. Klu tshinanu tshanixkalunhi hapnanuhchinikanru tshinanu pa manepka hixyawakapa. Hiyrunu hpoyahnutlewjetanu.
16Hitshitanru Cristo tokanu himwiywakhi psoluka ptowru himatkaltshiya. Hasrukkakanu, hiykokakanu Hoyakalu tokanu chikaltshiyma hiyrunu himalwuru chikaleyma hiyrun-koxa pimrikaka chikaltshiyma. Hoyakalu Hiwejikaluruya hchikalewatanu. Hchikalewaxini Hoyakalu tshinanuya hpoyahnutanru hajiya.
17Hiyrun-koxa kluneruktako hkamhini ho kluneruktako hyanumaxini wan-hixanu Tsru Hixikatshriwa Jesus hiwaka himwatshine pixka. Himalwutanru Wuru Hoyakalu Cristo tshinanuya.
Wixa Hiweklexyawakapa Herotu Hiwekluya Piranapni
18Suxone yijnakotanna wannako hhanurna, Wutsrukate Cristo halujyawaka pixka.
19Hnurtshine hamotanna hhanunrone. Hi himtuwnakakanna hhanunrone.
20Whentshine yijnakotanna rurune, runrona ptowru potuyako klu tshinanu xyekni Wutsrukate Cristo halujyawaka.
21Hirtshine hi himtuwnakakanna hwuhenene hma mamernuwaxyawakanupna.
22Towrertshine xako yijnakotanna htowutjene xye tshijne hajene ptowru potuko hjemlerna. Hi htowutjene hetanu tsonu kajnakophi hyokwijechaxyawaka tshinanupna. Seyni psoluka hihchinikanu mixkonuyma hkamhanru Hoyakalu halujyawaka, Hoyakalu kahwakpirlu tshinanu.
23Hiyrun-koxa kihle hchinikanurunhi kamrurewatanu hatatjewa hi yine towutlenhi seyni Wutsrukate Cristo towutlenhi.
24Hichinikanru xye, hyoptotanru hkamrure wenru hixanupa Wutsrukate Cristo henekanhi. Klu tshinanu hixa Wutsrukate Cristo towrenhi.
25Seyni hektutu kamhatshri yoptotanru hwenuxikolu hkamrure hektutu tshinanu. Klu tshinanu payakalunephi Hoyakaluya.
Currently Selected:
Colossenses 3: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
