Colossenses 2
2
Paulo Colossos Hajene Ruchinikanrexyawaka Piranapni
1Klu tshinanu naluklu hixa himaxyawaklu hi psokananu nixa kamrurewleta hixa tshinanu hiyrun-koxa Laodiceia poktshi hwatshine tshinanu. Hiyrun-koxa pimrine ptowruneka hita mimathetkane tshinan-koxa.
2Wane nixa kamrurewleta ptowrunek-yine nmixkotahchinikanuxyawakapa hiyrun-koxa pa hchinikanurune potuko rixyawakapna ruchiniklewjexyawakapna. Hiyrun-koxa rimatpotuxyawakapna psoluka pohirewnalu Cristo-ya ptowru potuko hmixkonuyma. Hiyáhoni xye tshinanu hixa himukata himatlepotutlu, himatkaltshi halikak-potuko Hoyakalu yohimakanatanru pirana tshinanu mpikkanephi. Waleni Cristo.
3Ptowruko kwenuru himretakanatkaluru himatkaltshi hiyrunu himatjemlu Hoyakalunni Cristo tsonu rimatyehixikatka.
4Waneya wla ntshinanhi: Hi hitshitanna yine hyokwixyawakaphi kihleru tokantshiyma.
5Klu tshinanu yáholu hi wanetkano nomaneya seyni nohchinikanuya wane nwiya hix-yehi. Numuwleyma netlu hixa kihle pokolunhi hiyrun-koxa hixa halixle poyeh-potuko Cristo-ya.
Paulo Haluklu Htserutahalixlexyawakapna Colossos Hajene Piranapni
6Hiyáhoni mitshikananu hixa yoptolexyawaklu Tsru Hixikatshriwa Jesus Cristo pixka hixa homkahretanru.
7Poyehirunephi Cristo-ya. Cristo hoho panawaxikatshine pixkalunephi. Halixlewlu pirana homkahpotutatshinephi. Xye ptowruka hasrukkatka hiyáhoni Cristo tshinanu htseruwna poyahnuwletanu.
Cristo Pirana Hasruklewatatshine Yahole Hislahinwa Piranapni
8Xakoka hike yineru kachitanhi yine hchinikanucha hipiranachakaka yokwijrewatatshri pirana hike mkochpakkatu piranayma. Xye hasruklewlu xye tshijne hajene hchinikanuko ruchpajya hiyrunu kamtshine towre chinikantshi runya. Seyni hi Cristo runya wale pixkalutu hasruklewlu.
9Klu tshinanu ptowruka Hoyakalu hixannu pso potuko Cristo mane hitokote rawa.
10Hiweklu hike mmahaxikatu henekka Cristo-ya. Ptowru hiwejikalune tsru hitakkalunemka hiyrunu hiwejikalune tsrukakalunemka ptowruneka tsru hitakkalur-potni Cristo.
11Jiprojhikatshinwahi Cristo hetanuya. Hi yinemyoyma jiprojhikatshinwahi. Seyni Cristo jiprojhatkawu. Walekni kochpajyano nomane hektunu towutlewleya.
12Waleyma kapnatkalunhi batiza-xikoluyma. H-batiza-tkoklun-koxa Cristo-yma hiwekkaka hipuktshiya hixa halixle tshinanu Hoyakalu kamrure himukatlewatatshri tshinanuya Cristo hiwekkakjeru hipuktshiya.
13Hixa hipnakanatatshinhi hixa hektunu tshinanu hiyrunu mjiprojhakanhi Cristo-yma hiwekkakalunhi. Hoyakalu hamtakahchinikanyehixyatkahi hixa hektunu ptowruka.
14Hcheyitlu w-deve-kanatanru m-deve-tkane rixkakwu. Hektutu wumtukakanatjeru, wjihyehjekanatjeru yonatkaluruya hcheyita Hoyakalu. Ruchyapotutatkalu w-conta-te klu tshinanu cruz rixpatatkalu.
Hkahwakpirakanatanrukaka Yapkapletlu Hinatshripa Cristo Piranapni
15Hiyrun-koxa tsrukakalune hiyrunu tsru hitakkalune himukatle konko. Rumukatlena hkonyana Cristo cruz-ya. Wanna ramtakkakanune rekhita ptowruko hetanu rimathexikowaka ramtakkakatkana.
16Hiyáhoni hike yineru xako hiykotanhi nikalu tshinanu ho hirkaluru tshinanu ho kahwakpiratkalur-hohnekak-pirana tshinanu, ho rehonotle ksurkak-piranaya ho hapnanuxikalur-hohnekak-piranaya.
17Xye hiykolu pirana hinatshripa pirana mayawlechani. Seyni hakanhatshri potukni halikaka Cristo.
18Hi pimrine heyikakjixinwa ralixkowle tshinanna. Ho hetkalurkaka tenhohne hichpajikatshri retler-himna ho mturu rutajnawakwa pirana hasruklewatatshri ho hiwejikalune Hoyakalu towrene tenhohne hajene kahwakpirru pirana hasruklewatatshri. Xye pixkalutu yineru malechawaka halixkoxikatshriwa waleko himane hihchinikanu homkahitatshrini.
19Xyekaka pixkalutu hi Cristo jiwu pixkalutuymalutni. Cristo haptowru mankaklewatatshri, mantshi psojitkaka hyokaka, psotsonujijkaka hepixka, pa manepka rixyawakapa. Satkaka mantshi psojite tserutka tserutlewatatshri Hoyakaluya.
Cristo-yma Wupniywaka Wiwejyawaka Piranapni
20Hiyáhoni Cristo-yma hipnatshine pixka hixinixka xye tshijne towutlewle tshinanuya. Klu tshinanhe xawaka xye tshijne hiwekakanaxini pixka hixa towutletkawa? Hiyáhoni klu tshinanhe homkahitawalu xyekaka hiykolukaka?
21Hiyakolukaka wla tshinatshri: Hi pyotnekanru, ho hi pnikanru, ho hi pkachitanru.
22Xyekaka ptowruka nikawninripa. Xyekaka yineko hiykolukakachani hiyrunu yineko hasruklewlechani.
23Xyekaka halikaka himatkalnutshi rixahotka. Hoyakalu towrene tenhohne hajene hkahwakpirakjixna ho mturu hitajnawakwa pirana ho wimane wsalewnakajyawaka pirana. Seyni xyekaka hi psojikna repixlu wimane het-sotanre rasujyawaka.
Currently Selected:
Colossenses 2: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
