2 Coríntios 9
9
Paulo-ne Hanijyawaklu Henekachlukaka Judeia Hajene Tshinanu Piranapni
1Hoyakalu kotspalatanune Judeia tshijne hajene hepixikolu piran-halikaka xawakni hike pirana mahata nyonyehixyawakhi.
2Klu tshinanu nimatlu jmerhi wanna hepixyawaka. Ntserutpiranathi Macedônia tshijne hajene tshinanuya. Nunkakletlu hixa halixatshine Acaia tshijne hajenhi pirana kapeta mhalni kananuko rujhaluna repixlewaxyawakna ntshina mitshi. Hiyáhoni hixo yineru jmere kamhaletka hixa hmernu pirana hjeminixkana.
3Hiyáhoni nyokanatna Cristo tshinanu wmoletanune wma muhlepiranyehichaxyawakanuphi kihlewaka henekachlu hapatjexikolu pirana tshinanu. Wane mitshi ntshinapna hixa halpokoxyawaklu hepixlewaxyawakapa.
4Klu tshinanu Macedônia hajene himotsaxinipno waneya rukchikanunhina malpokotkanepnihi waneya wpatewatanu. Hix-potu patewatanu klu tshinanu wmahijeru munanhaletatkahi.
5Hiyáhoni wale tshinanu hijhakalurni Cristo tshinanu wmoletanune nyokanhapkaxyawaka hixa nwaka hyiywakapna. Ralpokokjixyawakapluna henekachale hinkakletleru mitshi. Hiyáhoni wane napojinpatka ralpokotkotka henekachalu waneya ptowru yineru himatanru henekachalewle hi htowuxikowakni hixako hmernu tshinanni.
6Xyekni naluka tshinreta, psotsonu hitaklu hitakatshri psotsonu rama seyni tsru hitaklu hitakatshri tsru potuko rama.
7Satkaka yineru hihchinikanuyma potuko renekachalewatanu. Hi mpomaluklenurutuko hi koxa htowutko henekachluya. Klu tshinanu Hoyakalu hikchikhihlenutlu popoyikoner-potuko heneklewaxiklu.
8Hiyrun-koxa hmahakanaxinrikaka pnut-potu rumukata heneklethi Hoyakalu hike hma mujhiywakanpatka haté hixetatshri himukata hwalexya klu kamrurtshi kihleruktako tshinanu.
9Wane htshina Hoyakalu tokanu yonatkaluru: “Tsru potuko hmahaxinrina renekachatna Hoyakalu hike mwikane. Hiyrun-koxa ruhlenu hikeklu hohne nikawnanu.”
10Hiyrun-koxa Hoyakalukni hitataji heneklewatatshri rutajikowakapa. Hiyrun-koxa pão nikkalurupa heneklewatatshrini. Waneko pixka rixanhi hix-koxa ptowru hitataji halukkaluru pixkalutu renekanhi. Htseruwnakakanru tsrupotpákolu honantshi, hixa henekachale tseruwnaleko pixka.
11Ptowru potuko hepixiko, jeneklewaklerune hixyawakapa. Hiyáhoni hixolune himalwutanru Hoyakalu henekachle waniklerupa tshinanu.
12Klu tshinanu xye hkamhaleru hi Hoyakalu kotspalatanune hike mwikane repixyawaka tshinanu tsonni seyni wan-rixkakhi Hoyakalu hpoyahnuxyawakapluna wanna koxa.
13Wanna himalwutanru Hoyakalu hixa hepixle tshinanu hiyrun-koxa henekachle tshinanu kajnako hixle tshinan-koxa hiyrunu Cristo pirana kihle piranalu potuko hiwekkaklewatatshri pirana homkahixyawaka tshinan-koxa. Hiyrun-koxa rimalwuhetkotanruna Hoyakalu hixa henekachlepa tsrur-potuko tshinanu wannako htshinan-koxna hiyrun-koxa pimrine ptowruneka tshinanupa.
14Hiyrun-koxa ranjihohneyehihetkotanhina tsru hichinijikoluyma Hoyakalu henekahchinikanuxya tshinanhi.
15Hoyakalu wpoyahnutanu renekachale tsrur-potuko hike pixka mixkatu tshinanu.
Currently Selected:
2 Coríntios 9: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
