2 Coríntios 8
8
Henekachalewatanu Ptowru Poyikowluyma Piranapni
1Hiyáhoni wmoletanune Cristo tshinanu, wimatkakpirathi Hoyakalu hihlenu henekachalewle pirana, Cristo halixatshine hapatjetatshin-yehkaka Macedônia tshijne poktshikak-hajene tshinanu.
2Halixatshine wane hajene tsru salewaktshikaka riknohna. Seyni hpoyikonu tshinanna hike mwikanmakni seyni henekachalu renekachalewatna ptowru rumukata hikchiklelerna.
3Nunkakhi rumukata hikchiklelerna haté rumukaxyawakna pnute renekachalewatna wannako hihchinikanuymana.
4Ranjipotutwuna renekachalna wyoptoxyawaka rumukata hepixlewlexyawakapsona Hoyakalu kotspalatanune Judeia hajene tshinan-koxa.
5Wpoyahohoxyawaka pnute rixna Macedônia tshijne hajene halixatshine. Mitshikananhapka Tsru Hixikatshriwa Hoyakalu renejnawana waneya wane pnute Hoyakalu halujyawaka hkamhapiraxyawaka tshinanna hix-koxa Paulo-nwu renejnawana.
6Hiyáhoni wanjitlu Tito tshinkaluru xye kamrurtshi yinuwakatshri wane hyiywakapa repixyawakaphi hix-koxa xye kihle piranaluya hpoyahokajyawakaplu.
7Hekhixnawa ptowru pirana potuyako hixa kosejyana pimrine, halixlu piranaya, hinkaklewlu piranaya, himatkalnuya, pimrine haluk-hepixlexyawaka pirana, hixa hichinijyawaka piran-koxa. Henekachalu heneklewlu piran-koxa hijhalu hkosejyawaka.
8Hi nujhalu nyokanrewaxyawaka seyni naluk-himatkaklethi pimrine hmernu pirana xye henekachlu hapatjexikolu tshinanu. Hiyáhoni himathexinwa ho halikaklahe pimrine hichinika ho hike.
9Klu tshinanu hixa himatpiranatlu Wutsrukate Jesus Cristo hihlenu henekachalewle pirana. Phurukananni Cristo seyni hixa tshinanu hike mwikatutkani, hike hmimwalnutka pohirewkakatkahi hixa.
10Xyekni nohchinikanu xye pirana tshinanu: Hitaho kihle potlu hpoyahokajyawaklu kapeta mhalni hyinuwaka kamhalleru. Hi koxa hyinuwaka kamhalechatlu seyni haluka koxlu.
11Hiyáhoni xawakni wale kamrurtshi hpaklutanru haté hnikatanru. Jmererunephi xawakni mitshikananu pixka. Hiyáhoni hpoyaho hikchiklexyawaka pso heneklewatanu.
12Klu tshinanu henekachalu raluk-heneklewlexini yineru, Hoyakalu yoptotlu renekachale rumukata hikchikleleru tshinanu. Hoyakalu hi haluklu yineru hma mimwanutuko renekachlewaxyawaka.
13Hi pimrin-potu hihlewaxyawaka tshinanupni waneya hixapni mahaxinnatka. Seyni pixkakakane hixinripni.
14Xawaknikawa hixetleru himukata hepixlexinna wanna hmahaxinriyna. Hiyáhoni hixa hmahaxinri pa hohne wanna himukata hepixlexinhi wanna rixetlerna tshinanu. Hiyáhoni pixkakakanephi.
15Wane htshina Hoyakalu tokanu yonatkaluru: “Hix-potuko nikkaluru hapatjetatshrimka, hi rixexya. Hiyrun-koxa psotsonu hapatjetatshri hike hmahaxya.”
Tito Tshinkaluru Hiyrun-koxa Rimotsane Piranapni
16Nimalwutlu Hoyakalu klu tshinanu Tito tshinkaluru renekahchinikanuta hixa Corinto hajenhi repixyawakapa. Hixa Paulo-nwu pixka rixa hichiniklethi.
17Klu tshinanu halikakni Tito yijnakotlu wtshinyalu. Seyni jmerpotuklu Tito hixa repixyawaka hiyáhoni waleko hihchinikanu tshinanu hixa nwaka hyahapkatatka.
18Waleyma wyokanatlu satu wimole, ptowruneko Cristo halixatshine hapatjetatshin-yehkaka kihle piranyehiyalu, Jesus Cristo pirana kihle piranalu potuko hiwekkaklewatatshri pirana tshinanu.
19Hi wale tshinanu tsonu Tito rimotsatanu seyni Cristo halixatshine hapatjetatshin-yehkaka hnurexika hixayma rixyawakapa xye kamrurtshi halukkaluru hkamhiywaka tshinanupa. Tsru Hixikatshriwa Hoyakalu himalwuxikowaka tshinanu. Wekhixnawa wepixlewpiraxyawaka.
20Hiyáhoni wane wixa hike yineru mjihyehixyawakanupwu henekachalu wapatjemxyawakapa.
21Klu tshinanu waluka kamhaletlu kihleru hi Wutsrukate Hoyakalu hetanu tsonu seyni ptowru yine hetan-koxa.
22Wannayma wyokanatanru Cristo tshinanu wmoletanru. Hixo kata wetlu jmere kamrurewle rixyawaka. Waneya xawakni pnut-potu jmeretkalu klu tshinan-hima hixa hmunanha.
23Tito tshinkaluru pirana haluk-himatlexini waleni wikamrurewatanru repixyawakaphi. Hiyrun-koxa pimrine rimotsane pirana haluk-himatlexini wannani Cristo halixatshine hapatjetatshin-yehkaka yokanatanunni Cristo himalwuxikolu tshinanu.
24Hiyáhoni pimrine Cristo halixatshine hapatjetatshin-yehkaka himatpiranyehixiniphi hekhitanna nyi Cristo tshinanu moltshine hichinijyawaka hiyrunu hi wmahijerutanu kihle piranyehirune pirana wunkaklexini.
Currently Selected:
2 Coríntios 8: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
