2 Coríntios 10
10
Paulo Towutlewle Piranapni
1Hitakni, Paulo-no, wla mitshi ntshinnawa, hixastsi nwiniklunu kpoyikonerno seyni howuka nwiniklunu ktokanno. Hitakni hanjithi Cristo mayohnuyma hiyrun-koxa hchinikannuyma,
2wane napojinipa hi ktokanu hixkakanno. Klu tshinanu nimatlu numukata tokanuwnalyehitna pimrine wla tshinatshine xye tshijne kamrure homkahitatshinni wtshinjene.
3Halikakni yinwu seyni hi wyapretaklu hixako wihchinikanu halujyawaka.
4Klu tshinanu wyahotkakapreni wimuylalewapre hi yine kamhalerni seyni waleni hiyahotkakapi hixkolu Hoyakalu kamhalerni wkamnitjeru munanhaleru yotkakatshri. Chinikantshikaka muhletu wnikata,
5hiyrun-koxa ptowru yine halixkowle pirana Hoyakalu himatyehixikowaka himaletatshri wnikata. Ptowru yine hchinikanu wyokanata, Cristo hchinikanu walixkajyawakna yine.
6Waneya hixa hali hekhirexnatkawa halikaka hixatshine hixikatshinetkawahi, halpokotatshinepwu ptowru hixatshri hektuntshi wapnokaxyawakapa.
7Kkahwaklu retachaklerunhi. Satu yineru Cristo himwatshri rikahwajiniklunwa hyahoxinwa hihchinikanuya klu tshinanu hix-koxa Cristo-nunwu wale pixkalunek-koxwu hixa.
8Hi npatewata seyni ntserutahchinikanuxnawa Tsru Hixikatshriwa Cristo towutle henejya tshinanwu. Xye towutlu wenekka hixa wepixyawakapa htseruwnahalixlexyawakapa Cristo piranaya hi wenekka wnikathalixlexyawakaphi.
9Hi nimyekakpiratkalhi hkahwajinno, yonawahlokaka nyokananwakaxyawaka tshinanhi.
10Satkaka hetko xawaka wla tshinjeta: “Paulo yonawahle halikaka hixko towutlewle, htowutlewata seyni hewi potuko rawini hi kmixkonru hiyrun-koxa htokanu hike kochpakatshrini.”
11Wan-tshintokanutatshri himatanu wyonawahle howuka wwakanaxiniko pixka wixa kamruretanu wane wapojinipa.
12Hi wujhalu pixkakakanwu wixyawaka ho pimrine hijhakalune hikahwajikatshinwa wikahwajikowaka. Mahchinikanunni wan-hixatshine. Klu tshinanu wanna wannakaklukokni hyahotapre pixkalune rimathetkajyawakapna ho pixkakakanrahe ho hike.
13Hixa hi koxa myahoxikowakanu tokanuwnikatshinwu. Seyni Hoyakalu henejyawu kamrurtshi pso potuko waneko pso potuk-koxlu wtokanuwninri. Haté xye kamrurtshi wkamrurewyehixyahi wale psojitek-koxatkani wale.
14Klu tshinanu hi Hoyakalu towuxyawakwu pnute wkamha. Waneya mitshi hix-yeh-potu wapkapatka Cristo pirana, kihle piranalu potuko hiwekkaklewatatshri pirana wunkakapyawakaphi.
15Hiyáhoni hi wtokanuwnanu yahoxikowakatka hichinixyawaka pnuteya satuko yineru kamrurewaxyawakaya. Hiyáhoni xawakni wkahwaklu hixa halixle htseruwnanu. Hiyrun-koxa wujhalu pnut-potu wkamhiywaklu kamrurtshi Hoyakalu henejyawu hix-yehiya.
16Waneya wujhakoxlu wunkaklexyawaklu Cristo pirana, kihle piranalu potuko hiwekkaklewatatshri pirana, hixa sreta pnute hwatshin-yehiya. Hiyáhoni hi wtokanuwnanu kamrurtshi pimrine hali kamhallerutka wma kamhanutuko tshinanu.
17Wane htshina Hoyakalu tokanu yonatkaluru: “Katukta haluka tokanuwnaletanu, Tsru Hixikatshriwayma htokanuwnanu.”
18Klu tshinanu kihle kamrureru tshinikatshriwa hi ralukko seyni halikaka Tsru Hixikatshriwa Hoyakalu hikchikhihlenreru tsonu hiknohkakko.
Currently Selected:
2 Coríntios 10: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
