Ozee 8
8
Lawa a foo yoo laanka dɔlɔ
1Ka bɛn pɛ!
Bɔ̀n nə́ n tele á die
Dɛnaa Lawa a kion lɛ gialaa,
ka giogialatã bɛ́ lɔn.
A giala, ǹ nə́ maa lɛ kɔ kɔn la
lɛ ziziɛ̃,
ǹ nə́ n piã ka maa dí-pɛn kɛn nɛ.
2Ǹ tá re n lɛ dii ma li:
«Wɔa Lawa,
Izirayeli minin man ka wɔ nɛ,
wɔ tá n doɛ̃!»
3Izirayeli minin nə́ n piã ka sii
bǐɛ̃ nɛ.
Zɔ́ɔn lɛn dinin nə n ta ǹ gialaa!
4Ǹ nə́ kiin koa,
ma ba a siére-a wa,
ǹ nə́ goledɛnan bɔ,
má n ma zii kɔ ǹ la wa.
Ǹ nə́ ǹ wɔrɔ laanka ǹ sana goa,
ǹ nə́ dìn zɛnaa nɛ.
Ǹ dinin papaã ǹ wɔ lɛ dɔ n ka
bɛ nɛ.
5Samarii minin lɛn,
kaa diin nɛ nyín kɛ lɛ, ma ba li wa.
Bɛ lɛ na á toa ma foo yoo ka li.
Yǎa biĩ kəni,
ka tɔn goɛ̃ zɛrɛbaãdɛnan lɛa?
6Kaa diin nɛ nyín lɛ,
a n boe Izirayeli gána nɛ,
dí-dɔ̃li kɔ́n na á zɛnaa,
A bie Lawa lɛa wa!
Taãn nɛ,
Samarii minin diin nɛ nyín
lɛ á re pɔpɔsɛ.
7Bɛ̀ n piɛ̃ lɔnlɔɔn yoo,
n tá re la piɛ̃ yii.
Bɛ̀ *belee mìi bɔ wa,
a wùsu boe wa.
Ta a na á bɔ dɔn dinin,
tiin man bii.
8Izirayeli minin wɔ ziziɛ̃,
ǹ nə́ ke tɔrɔ kɔsɔn bii
ka màn mɛn bɛ́ a là ná a banban.
9Efrayimu tɔrɔn kɛn man ka
don dundunun bɛ́ lɔn,
ǹ ba n mɔrɛ min-a wa.
Maǹ nə́ woo Asiirii gána nɛ,
ǹ nə́ ǹ lɛ pii màn mɛn bɛ́ toɛ
ǹ giaárabaa yɛ.
10Ǹ nə́ tɔrɔ kɔsɔn gɔgɔ ka mànan nɛ
sɛnɛ, a laanɛ ǹ nə́ bɛ zɛnaa,
sisia kəni, man die ǹ soekɔn.
Kànaa ka boɛɛn nɛ,
kii gole kɛ bɛ́ re guĩ mɛn diɛ
ǹ mìi ni,
ǹ tá re nɔmɛɛ bɛa guĩ gɔn.
11Efrayimu minin man nə́
*wúlu bɔ ǹ bǎã gigiã dɔ,
ǹ sii baraa sawaa ǹ bǎã lɛa.
Sɛnɛ, bɛa wúlu bɔ ǹ bǎãn lɛn dinin
man nə́ ǹ kaa sii baraa
zɛnaa ganaa.
12Ta man má maa dí-pɛn
kɛn kiɛ̃ gunyin duu goon má kɔ
ǹ la,
a n die sii tii biɛ ǹ gɔn.
13Maǹ wúlu boe ma ganaa ka
tɔɔn nɛ,
ǹ siĩ soɛ̃ á lɛa.
Sɛnɛ, masɛ Dɛnaa Lawa a lɛ koe
ǹ wúlu mànan lɛn ganaa wa.
Sisia, ma yiri a boe ka ǹ sã ǹ siin kɛn nɛ wa,
ma nə ǹ sii baraan kɛn nimii.
Ǹ doamaa nɛ,
ǹ wusoo ǹ wo Ezipti.
14Izirayeli minin kɛn yiri bɔ ka
ǹ zɛnaali ni,
ǹ nə́ kion sonboren dɔdɔ.
Zudaa minin kɛn, bɛn nə́
kungɔn dɔ,
ǹ nə́ ǹ kiwi gigiã lɛnpɛnɛ nɛ.
Sɛnɛ, ma á re tɛ diɛ ǹ kiwin
lɛn ganaa,
tɛ á re ǹ duru ǹ bǎã kakan kɛn kuĩ.
Currently Selected:
Ozee 8: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
