Ozee 9
9
Lawa n minin sasawɛɛ
1Izirayeli minin lɛn,
ka nyan toa kaa foo kɔɔ̃nbaa
la yii-n,
ka tɔrɔ kɔsɔn kɛn wɔ bɛ́ lɔn wa,
a giala, ká kɔrɔbaa zɛnaa,
ká n na ka n bɔ kaa Lawa ganaa,
a giala ǹ bɛ́ *belee duwii bǎã
mɛn tumaa nɛ,
kaa kɔrɔbaa lɛa saraa nɛ,
ka tá a kio walan.
2Sɛnɛ, ǹ bɛ́ belee mɛn duwii,
ǹ bɛ́ nyɔɔ mɛn boe,
bɛ kɔ́n ba re ka yii kiɛ̃ wa.
Duvɛ̃ dii ke a re kiɛ ka foo la wa.
3Ǹ ba re boe la ǹ giã
Dɛnaa Lawa a gána kɛ-n wa.
Efrayimu minin tá re wusii ǹ wo
Ezipti gána nɛ,
ǹ màn-bii gɔgɔrɛ bii Asiirii gána nɛ.
4Ǹ ba re boe la ǹ duvɛ̃ zuməə
Dɛnaa Lawa wɔ lɛa doo wa,
ǹ wúlu mànan kɛn sii ba re
kɔɔ̃n koe
a ganaa doo wa.
Ǹ màn-bii ke á re foo
ziziɛ̃ ǹ màn-bii biɛ ǹ gɔn.
Min mɛnɛn tumaa bɛ́ re bii,
bɛn tá re *gɔ̀ diɛ ǹ dinin ganaa.
Ǹ màn-bii lɛ á re ǹ dinin toe sɛn,
sɛnɛ, a na a boe la a wɔ
Dɛnaa Lawa a kion kɛ-n wa.
5Kɔn-yɛ gole kɛa pinaa,
Dɛnaa Lawa a zɔ́n kɛa pinaa,
ka ǹ die wàa zɛnɛɛ?
6Á ke, ǹ gána lɛ bɛ́ á ziziɛ̃,
ǹ dinin nə́ baa si.
Maǹ die woe n lɛ soekɔn Ezipti,
Ǹ bĩ ǹ bǎã á re goɛ̃ Mɛmifisi.
Ǹ gɔn màn giɔ̀mɔ kakan kɛn
wɔrɔ lɛa
koronkoron tá re bɛn sii a n kɔ lɛ.
Nyan babaraan tá re ǹ kionən
kɛn sii, ǹ nə n kɔ ǹ lɛ.
7 #
LUK 21.22. Dɔlɔ bɔ lɛawaa dɔ,
saraa lɛawaa dɔ.
Izirayeli minin tá re bɛ doɛ̃.
Lawa a boo gii-dali lɛ n gàãnaa lɛa,
a yiri na á n si la,
a giala, kaa sã lɛ la yii ni,
kaa baraabaa lɛ dɔ la yii ni.
8Efrayimu a wɔlɔ-lɛduə̃li lɛ n kun
ka maa Lawa nɛ,
Lawa a boo gii-dali lɛ nɛ.
Maǹ kan koɛ a kiɛ̃ ǹ ziin tumaa la.
Haalɛ Lawa a kion din ni maǹ yui
a gialaa.
9 #
SYB 19.1-30. Ká dɔ baraabaa lɛ a dù ni,
ka Gibeya wɔ kɛ bɛ́ lɔn lɛlɛ.
Lawa yiri a die boe
ka kaa baraabaa ǹ siin kɛn nɛ wa,
á die kaa sii baraan lɛn dɔlɔ boe
ka ganaa.
Lawa foo a ziziɛ̃
10 #
MNS 25.1-5. Ka *rezɛ̃ da nɛ bɛ́ lɔn,
min yɛ don,
man má Izirayeli tɔrɔn lɛn yɛ miɛ̃.
Ka gɔ́rɔ da ten a nɛ bibinaa bɛ́ lɔn,
man má ka digolon kɛn yɛ miɛ̃.
Sɛnɛ, ǹsɛn dinin nə dɔ
Baali-Pewɔɔrɔ lɔn gɔrɔ,
sii mɛn bɛ́ sìi diɛ, bɛ na á goã
ǹ dí lɛa.
Ǹ goã dì mɛn narɛ,
ǹ dininmaan nə́ bɔbɔnɛɛ kɔ
ka bɛa dì kɛ lɛ bɛ́ lɔn.
11Efrayimu tɔrɔn kɛn,
màn mɛn bɛ́ gugurubaa koe ǹ la,
bɛ á re woe ka piĩn
ka bàan bɛ́ lɔn a ǹ toa walan:
lɔ a re nɛ yii walan doo wa,
lɔ nɔ̀naa a re yii walan doo wa,
lɔ a re nɔ̀ sii walan doo wa.
12Ta ǹ nə́ nɛnyaanan mɛnɛn
dɔn dinin too,
ma á re ǹ sii ǹ la,
bɛ̀ ǹ nə́ ǹ tɔn min baa wa.
Ka bɛ dɔ nɛ,
bɛ̀ má n bɔ má n bɔ ǹ li,
bɔ̀n na á ǹ yɛ!
13Ma yii n Efrayimu minin ganaa,
ka Tiiri bɛ́ lɔn nyankɔrɔ
sonbore ne.
Sɛnɛ ǹ doamaa nɛ ǹ wo
ǹ nɛnyaanan kɔ bɔlɔ-kuruli la.
14Dɛnaa Lawa, wàa din lɛa,
n kɔ kɛn la?
N nyan toa nɛ giã ǹ lɔn kɛn
gɔ́ɔ̃-n wa,
toa ǹ nyɔn nə dadama ǹ kolo-n!
15Ǹ baraabaa lɛ tumaa na
á soo kanaa Gilgaali,
walan lɛ nɛ, má ǹ baa zɔ́ɔ.
Ǹ nya ǹ dí babaraan lɛn taman yii,
ma á re ǹ lui ma ǹ bɔ maa kion.
Ma a re ǹ narɛ doo wa,
ǹ goledɛnan lɛn tumaa n piã-wɔlen lɛa.
16Gɔn nə́ Efrayimu minin lɛn kũ.
Ka da bɛ́ lɔn, ǹ gòonən nə́ laa.
Haalɛ nɛ goon din,
ǹ ba re koe doo wa.
Ta ǹ gɔ́ɔ̃gɔ́ɔ̃ ǹ nɛnyaanan mɛnɛn
nə́ yɛ,
ǹ sii n kaka ǹ gɔn,
ma á re bɛn dii ma ǹ bɔ kanaa.
17Maa Lawa á re n piɛ̃
ka Efrayimu minin kɛn nɛ,
a giala, ǹ nə n too kɔ a lon wa.
Ǹ tá re n binbirin boe tɔrɔ
kɔsɔn bii.
Currently Selected:
Ozee 9: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
