Bɔ bɛ̀rɛbaa nɛ 35

Susu ǹ pii

1Muizu Izirayeli nɛnyaanan zaman tumaa lɛ sɔkɔn, á pɛ ǹ nɛ: – Dɛnaa boon mɛnɛn pɛ mà ka ǹ zɛnaa, bɛn nə́ ke: 2#BBN 20.8-11; 23.12; 31.15; 34.21; LWS 23.3; TDP 5.12-14. «Lɛawaa sɔrɔ gɔ́ɔ̃ nɛ, ka kaa dí nya, sɛnɛ, lɛawaa sɔbaabaa ǹ wɔ pinaa kɛ á re goɛ̃ lɛawaa sonbore lɛa ka gɔn, ka kɔ Dɛnaa la, *susu ǹ pii ni. Bɛ̀ min mɛn dí nya bɛa lɛawaa kɛ li, ka á re ǹ dɛnaa dii a gã. 3Ta ka n bǎã woo bǎã nɛ, bɛa susu ǹ pii kɛ lɛ li, ka baran tɛ dɔ din koa wa.»

Zaman lɛ n màn boe kion sonbore kɛa lɛa

4Muizu pɛ Izirayeli nɛnyaanan zaman lɛ-n doo:

– Dɛnaa boo mɛn pɛ, bɛ á ke: 5«Ka màn bɔ ka gɔn màn nɛ, ka kɔ Dɛnaa la. Ka bɛ zɛnaa ka dinin bii, ka bɛa màn lɛ bɔ ka foo kɔɔ̃n nɛ, ka kɔ Dɛnaa la: ta sana nɛ, ka wɔrɔ nɛ, ka zan tã nɛ. 6Ta gɛ̀sɛ korebore ne, a tã nɛ, a tã zenzen ne. Ta mɔnaa guguru sonbore ne, ka bòe ka nɛ, 7ka sère gɔ̀lɔ̀n ki ni, ka màn tã kaa la, ka don siĩ ki sonboren ne. Ta kaasia gɔn nɛ, 8ka nyɔɔ nɛ bolon wɔ lɛa, ka nyɔɔ gìĩ kɔɔ̃n nɛ, minin bɔ a koa ǹ wɔ lɛa, ka màn gìĩ kɔɔ̃n nɛ tã ǹ wɔ lɛa. 9Ta kɔlɔ sonboren manɛ: dí nya ǹ mɔnaa wɔ màn paa kɛ laanka tìãbii zéwo wɔ fulupaa kɛ wɔn lɛa. 10Dɛnaa màn mɛn tumaa pɛ, dí doɛ̃ wolen kɛn ka bii, bɛn nə daa ǹ na a tumaa zɛnaa sɔnbɔraanɛ. 11Kion kɛ laanka a mɔnaa nɛ, ka a kɔmalɛ ǹ wɔ kɛ nɛ, ka a karan nɛ, ka a doa ǹ bàlàn nɛ, ka a gɔn kerekaãn kɛn nɛ, ka a mɔnaa lɔɔ ǹ bàlàn nɛ, ka a giãmala ǹ mànan nɛ. 12Ta goo lɛ nɛ, ka a gũ ǹ bàlàn nɛ, ka a lɛpii ni, ka kion bii kuru kɔn-a ǹ mɔnaa kɛ nɛ. 13Ta tabala kɛ nɛ, ka a gũ ǹ bàlàn nɛ, a màn bisinin tumaa nɛ, ka Lawa gɔ ǹ buuru kɛ nɛ. 14Ta bolon da ǹ bǎã kɛ nɛ, ka a màn bisinin ni, a bolonən ne ka ǹ lɛ sã ǹ nyɔɔ nɛ. 15Ta màn gìĩ kɔɔ̃n tã ǹ bǎã kɛ nɛ, ka a gũ ǹ bàlàn nɛ, ka minin bɔ a koa ǹ nyɔɔ kɛ nɛ, màn gìĩ kɔɔ̃n kɛ nɛ tã ǹ wɔ lɛa, ka kion lɛ a kiɛnlɛ mɔnaa kɛ nɛ. 16Ta *wúlu bɔ ǹ bǎã kɛ nɛ, ka a zan tã tɛmɛ kɛ nɛ, a gũ ǹ bàlàn nɛ ka a màn bisinin ni, ka doo kaaraa kɛ nɛ, a laanka a gũ ǹ màn nɛ. 17Ta sumu lɛnpɛnɛ ǹ mɔnaan kɛn manɛ, ka a lɔɔ ǹ bàlàn nɛ, ka a giãmala ǹ mànan nɛ, ka sumu lɛ a kiɛnlɛ mɔnaa nɛ. 18Ta kion lɛ a kiɛ zumiin manɛ, sumu kɛ wɔn nɛ, ka ǹ biɛn nɛ. 19Sii yɔrɔ bɔ ǹ mɔnaan kɛn, dí nya kion lɛ a lɛa, wúlu-bɔle Aarɔn a mɔnaa sonboren kɛn, ka a nɛgiĩn wɔn nɛ ǹ nə́ die dí nyɛɛ ǹ nɛ.»

20Izirayeli nɛnyaan zaman lɛ tumaa nə́ n bɔ Muizu yɔrɔ-a. 21A kɔɔ̃n kɔ min mɛn tumaa foo ganaa, á dɔ ǹ yiri dɔ nɛ, bɛn nə́ daa ka ǹ màn bòen ne, ǹ nə́ ǹ kɔ Dɛnaa la, kɔn yɛ ka Lawa nɛ ǹ kion kɛ lɛ a dí a lɛa, a sii yɔrɔ bɔ tumaa a lɛa, mɔnaa sonboren kɛn dɔn lɛa. 22Giĩn nə́ daa, lɔn dɔn nə́ daa ka foo kɔɔ̃n nɛ, ǹ nə́ sana màn tɔrɔ tumaa bɔ, ǹ nə́ kɔ Dɛnaa la, á kɔnpɛ ka sii lɛ a zɛnaa ǹ gɔn nɛ. Ǹ mànan mɛnɛn bɔ: nyin ni ǹ mànan manɛ, ka too ne ǹ wɔn nɛ, ka gòon ganaa ǹ kaaranan nɛ, ka bɔlɔ-a ǹ mànan nɛ. 23Gɛ̀sɛ goã min mɛn lon, a korebore ne, a tã nɛ, a tã zenzen ne ka mɔnaa guguru sonbore ne, ka bòe ka nɛ, ka sère gɔ̀lɔ̀ kin mɛnɛn bɛ́ ǹ nə́ màn tã kaa ǹ la, hinlaa don siĩ ki sonboren, bɛa dɛnaa daa ka bɛ nɛ. 24Min mɛn wɔrɔgiala hinlaa zan tã bɔ, bɛa dɛnaa daa ka bɛ nɛ, á kɔ Dɛnaa la. Kaasia gɔn goã min mɛn lon, bɛa dɛnaa daa ka bɛ nɛ, dín kɛn lɛn tumaa a lɛa. 25Lɔ dí doɛ̃ wolen kɛn tumaa gɛ̀sɛ ma ka ǹ dinin gɔn nɛ, ǹ nə́ daa nɛ, gɛ̀sɛ korebore lɛa ka a tã nɛ, a tã zenzen tɛ-pɛle ne ka mɔnaa guguru sonbore ne. 26Bɛa lɔ dí doɛ̃ wolen kɛn lɛn tumaa bòe ka dɔ ma. 27Nyɛɛnaandɛnan nə́ daa ka kɔlɔ sonboren kɔnɔn nɛ: dí nya ǹ mɔnaa kɛ paǹ tɛn laanka tìãbii zéwo kɛ a zɛnaa ǹ wɔn lɛa. 28Ǹ nə́ daa ka nyɔɔ gìĩ kɔɔ̃nɔn dɔn nɛ, ka nyɔɔ nɛ bolon wɔ lɛa, ka minin bɔ a koa ǹ nyɔɔ kɛ nɛ, ka màn gìĩ kɔɔ̃n kɛ nɛ tã ǹ wɔ lɛa. 29Giĩn ni ka lɔn nɛ, Izirayeli minin mɛnɛn foo bɛ́ kɔɔ̃n ka mànan kɛn kɔ nɛ, dí lɛ a nya ǹ mànan lɛa, Dɛnaa nə́ ǹ pɛ Muizu ni, bɛn man nə́ goã die mànan koe Dɛnaa la ka nyɛnyɛɛ nɛ.

Kion sonbore kɛa dɔlin

30Muizu pɛ Izirayeli nɛnyaanan lɛn manɛ: «Á ke, Dɛnaa na á Urii a nɛgiĩ Besaleli bíi ka a tɔ nɛ, Urii mɛn di tɔ bɛ́ á goã Uuru, Zudaa tɔrɔ lɛa. 31A ná a n din Yiri kɔ la, màn mɛn bɛ́ toɛ, a sii-doɛ̃ laanka yiridɛnaabaa yɛ, ka màn-doɛ̃ laanka kanaa sii tumaa zɛnaa doɛ̃ nɛ: 32màn zɛnaa ka nyaǹ nɛ nɛ, sana dí nya nɛ, wɔrɔ wɔ nɛ ka zan tã nɛ, 33kɔlɔ sonboren sɛlɛɛ nɛ, ǹ nə ǹ da màn nɛ, gɔn sɛlɛɛ nɛ, ka dí nya a nyaǹ kaa ma-a tumaa nɛ. 34Dɛnaa wɔ a foo ne mà a minin daraa bɛa dín kɛn lɛn ganaa, asɛ nɛ, ka Dan tɔrɔ Ayisamaaki a nɛgiĩ Oholiabu kɛ dɔ nɛ. 35Á dí-doɛ̃ kɔ ǹ la, mà ǹ boo dí tumaa la, ǹ boo a nyaǹ kaa ma-a wɔn dɔn la: kɔlɔ sonboren sɛlɛli a dí ni, nyaǹ kaa ma-a wole wɔ nɛ, mɔnaa-tãli a dí ni: gɛ̀sɛ korebore tãli wɔ nɛ, a tã tãli wɔ nɛ, a tã zenzen tãli wɔ nɛ, ka mɔnaa guguru sonbore fɔ̃li wɔ nɛ.

Currently Selected:

Bɔ bɛ̀rɛbaa nɛ 35: SCE2013

Highlight

Copy