Bɔ bɛ̀rɛbaa nɛ 34
34
Dí-pɛn kɔlɔ dii màn paa
1Dɛnaa pɛ Muizu ni: «Kɔlɔ màn paa sɛlɛ, ka bibinaa wɔ màn paa kɛ lɛ bɛ́ lɔn. Ma boon mɛnɛn kiɛ̃ bibinaa wɔn kɛn lɛn ganaa, n nə́ ǹ yɔyɔrɛ ke, man die wusii, ma bɛa boon kɛn lɛn kiɛ̃ ǹ dɔn ganaa. 2N yɔrɔ bɔ, n koa biɛ̃ baayɛlɛ nyɛɛnɛ. Baayɛlɛ gɔrɔ, n dii Sinayii kele lɛ la, n golee masɛ yɔrɔ-a kele lɛ mìi ni. 3Min kɔ́n baran dii kun ni wa, min dɔ din baran n din nyaa kele lɛ paǹ kɔ́n la wa. Tɔɔ kɔ́n, ta sère ne, ta bòe ne, ta dii ni, ǹ kɔ́n baran buu sɔ̃ kele lɛ yɔrɔ-a wa.»
4Muizu kɔlɔn sɛlɛ ka bibinaa wɔn kɛn bɛ́ lɔn, á yoo baayɛlɛ lɛliɛnɛ, á dii Sinayii kele lɛ la, ka Dɛnaa bɛ́ á pɛ lɔn, á kɔlɔ sɛlɛɛ màn paa lɛ goa a gɔn. 5Dɛnaa gisĩ tɛmaa bara lɛ nɛ, á golee walan Muizu li. A ná a tɔ lɛ pɛ mà: «Dɛnaa.» 6#BBN 20.5-6; MNS 14.18; TDP 5.9-10; 7.9-10. Dɛnaa kiɛ̃ a yɔrɔ-a, á pɛ: «Masɛ din nə Dɛnaa lɛ lɛa, man Lawa lɛa, man bǐɛ̃ zɛnɛɛ, man makara doɛ̃. Ma foo a yui fufuu wa, man bɔlɔgoondɛnaa lɛa, dama minin narɛɛ ganaa ǹ foo n ma nɛ. 7Man maa bǐɛ̃ lɛ zɛnɛɛ minbuiinin manɛ yǎa lɛ̀ duu damata. Man kaa sãn sii ma ganaa, ka kaa bɔlɔ-tiin ni, ka kaa sii baraan nɛ. Sɛnɛ, maa zɛ̀rɛdɛnaa bíi zɛ̀rɛ baãnaa wa. Man díin dɔlɔ boe ǹ nɛnyaanan ganaa, yǎa ǹ nɔ̀ɔ fulupaa ganaa.»
8A din bǎã-n gɔrɔ, Muizu kaa tán, á Dɛnaa guguru kɔ, 9á pɛ: «Dɛnaa, bɛ̀ masɛ á kɔɔ̃nɛ n ganaa sonbore, ma nə n nyankoe, n tɔ wɔ kun wɔsɛn nɛ. Ma á doɛ̃, máa minin kɛn lɛn man tɔrɔ too kaka-a lɛa. Sɛnɛ, lɛ kɔ n wɔsɛn sãn laanka wɔa sii baraan toa wɔ nɛ, n ga wɔ ganaa n din wɔn lɛa.»
Wusoo a lɛ kɔ kɔn la
10Dɛnaa pɛ Muizu-n kəni: «Man die lɛ kɔ kɔn la we ka ka nɛ. N zaman kɛ lɛ yɔrɔ-a, man die sii dadaran zɛnɛɛ, siin mɛnɛn miã bɛ́ a tɔn nə n zɛnaa kanaa paǹ kɔ́n nɛ wa, ka gána kɔ́n dɔ-n wa. Zaman lɛ tumaa á re yii, mà pàã tá masɛ Dɛnaa a dí lɛ nɛ, ma bɛ́ re ǹ mɛn lɛ nyɛɛ n gɔn lɛn.
11«Ma bɛ́ màn mɛn pii ni pelo, bɛ tamaa sɔnbɔraanɛ. Man die Kanaan minin kɛn lui, ma ǹ bɔ n nyɛɛnɛ, ka Amɔɔrɔ minin kɛn nɛ, ka Ɛti laanka Perɛzi minin ni, ka Ivii laanka Zebuzu minin ni. 12Ka n dinin kũ, ka bɛ́ woe gána mɛn nɛ, ka baran toa ka lɛ kɔ kɔn la wɔ ka bɛa minin ni wa. Bɛ̀ ka bɛ zɛnaa, bɛ n die kan biɛ ka bii. 13#TDP 16.21. Sɛnɛ, ka kaa wúlu bɔ ǹ bǎãn dɛ ka ǹ kaa, ka kaa kɔlɔ wɔ tán-an kɛn yɔyɔrɛ, ka kaa dì gɔnɔn kukuru ka ǹ kaa. 14Bɛ lɛ tɔ ganaa kəni, ka baran toa ka lawa kɔsɔ guguru kɔ wa. A giala, masɛ din Dɛnaa lɛ, maa sii á kaka, ma a lɛ koe Lawa kɔsɔ ganaa wa. 15Ka baran toa ka wo lɛ kɔ wɔ ka bɛa gána kɛ lɛ a minin ni wa. Bɛ bie wa, bɛ̀ ǹ tá ǹ dìn guguru koe, ǹ nə́ ǹ wúlun boe, ǹ tɔn kiɛ̃ ǹ ka bíi, ka wo ǹ wúlu siĩn sɔ̃ kooro. 16Bɛ̀ ka ǹ nɛlɔn wɔ ka ǹ kɔ kaa nɛgiĩn la, ǹ nɛlɔn lɛn man die ǹ dìn guguru koe, ǹ tá re kaa nɛgiĩn lɛn dɔn kiɛ ǹ dìn lɛn guguru koe ganaa.
17 #
BBN 20.4; LWS 19.4; TDP 5.8; 27.15. «Ka baran fɔlɔ yo ka màn nyín zɛnaa nɛ, ka baa kaa Lawa lɛa wa.
18 #
BBN 12.14-20; LWS 23.6-8; MNS 28.16-25. «Ka toa ka *yɔ bùbaã buuru zɔ́n kɛ tamaa ka zɛnaa. Lɛawaa sɔbaa gɔ́ɔ̃ nɛ, ka yɔ bùbaã buuru sɔ̃. Ka zɛnaa a kɔnpɛ biikoo kɛ lɛ nɛ, má pɛ ka nɛ. Mui bibinaa nɛ, a giala, ka n ka soo Ezipti gána nɛ, mui bibinaa kɛ lɛ nɛ.
19 #
BBN 13.2. «Màn tumaa a nɛ bibinaa n masɛ wɔ lɛa. Bɛ lɛ tɔ ganaa, kaa tɔɔn tumaa wɔn man masɛ din wɔn lɛa, sèren laanka bòen ne ka diin ni. 20#BBN 13.13. Sɛnɛ, dundun nɛ bibinaa mɛn bɛ́ sà lɛa, ka bɛ lonkɔ ka sère nɛ nɛ. Bɛ̀ ka a lonkɔ wa, ka a mìi yu a dungiala ganaa, a gã. Ka dinin nɛgiĩ bibinaan kɛn sɛn, ka wusoo ka bɛn mìi bɔ.
«Kaa min kɔ́n dɔ baran da Kion sonbore kɛ nɛ masɛ yɔrɔ-a ka a gɔn kooro-n wa.
21 #
BBN 20.9-10; 23.12; 31.15; 35.2; LWS 23.3; TDP 5.13-14. «Ka die ka dí nya lɛawaa sɔrɔ, sɛnɛ, a sɔbaabaa ǹ wɔ ke, ka n susu. Haalɛ ta buu-kɔsiɛ hinlaa màn-kurii waáraa nɛ, ka toa ka n susu bɛa pinaa kɛ lɛ nɛ.
22 #
LWS 23.15-21,39-43; MNS 28.26-31. «Ka die ka kaa wuru màn lɛ bibinaa zɔ́n zɛnaa, kaa màn-kurii bibinaan kɛn biikoo li. Ka *kaa-piɛ zɔ́n kɛ dɔ zɛnaa lɛ̀ a nya biikoo li.
23«Gunyin sɔɔ lɛ̀ gɔ́ɔ̃ nɛ, kaa zaman lɛ a giĩn die ǹ da masɛ Mìinaa yɔrɔ-a, ma din Dɛnaa lɛ, Izirayeli a Lawa lɛa. 24Sonbore, bɛ̀ masɛ tɔrɔ kɔsɔn loo ma ǹ bɔ ka nyɛɛnɛ, maa kaa gána gole kɔ, min kɔ́n ba re a lɛn zoɛ̃, mà a n die kaa gána lɛ kuĩ bɛa biikoo sɔɔ kɛ lɛ gɔ́ɔ̃-n wa, ka bɛ́ re woe kaa Dɛnaa Lawa yɔrɔ-a biikoon mɛnɛn li ke lɛn.
25 #
BBN 12.10. «Ka baran tɔɔ dɛ *wúlu màn lɛa ka kɔ masɛ la, ka yɔ bù buuru da li wa. Ka bɛ́ tɔɔ mɛn dii *kiɛ̃mala ǹ zɔ́n wúlu màn lɛa, bɛa siĩ baran kiɛ̃ tèlò la a lɛ̀ waa wa. 26#TDP 14.21; 26.2. Ka toa, ka da ka kaa tán màn tumaa a nɛ bibinaa nɛ, masɛ a Kion kɛ nɛ, a giala, masɛ din Dɛnaa n kaa Lawa lɛa.»
Ka baran bòe nɛ siĩ da ǹ dan nyɔ li ka kɔrɛ wa.
27Dɛnaa pɛ Muizu-n doo: «Boon kɛn kiɛ̃, a giala, masɛ n die maa sii giala we boon kɛn lɛn la, ma lɛ kɔ kɔn la wɔ ka n nɛ, ka Izirayeli ni.»
28Muizu na á goã kun ka Dɛnaa-n walan yǎa lɛawaa pusi ka tèlò pusi. A màn bii wa, a mu dɔ mi wa. Muizu lɛ kɔ kɔn la ǹ boo fù lɛ kiɛ̃ kɔlɔ sɛlɛɛn lɛn ganaa.
Muizu nə n bɔyɛɛ woe ǹ giã ǹ bǎã nɛ
29 #
KOR2 3.7-16. Muizu gisĩ á n bɔ Sinayii kele kɛ la, ka lɛ kɔ kɔn la ǹ boon kɔlɔ màn paa lɛ ná a gɔn. A bɛ́ gisĩ, a dinmaa lɛ sɛ goã doɛ̃ mà a yɔrɔ ki na á n bɔyaa á tɛ pii, bɛ̀ a bɛ́ boo diɛ ka Dɛnaa-n wa. 30Aarɔn laanka Izirayeli nɛnyaanan lɛn tumaa bɛ́ ǹ nə́ Muizu yɛ, a yɔrɔ na á goã tɛ pii. Nyɛ́ɛ nə́ ǹ kũ ka ǹ mɔrɔ a ganaa nɛ. 31Muizu lɛ dia ǹ la. Aarɔn laanka zaman lɛ a nyɛɛnaandɛnan tumaa tɔ́n daa a li, yǎa a boo da ǹ nɛ. 32Bɛ kio, Izirayeli nɛnyaanan lɛn tumaa nə́ n mɔrɔ a ganaa, Dɛnaa din boon mɛnɛn tumaa pɛ nɛ Sinayii kele lɛ la, á bɛn pɛ ǹ nɛ.
33A bɛ́ á boo da ǹ nɛ á nya lɔn, á mɔnaa kɔ a din yɔrɔ lɛ. 34Bɛ kio, bɛ̀ á woe Dɛnaa yɔrɔ-a lɔn, a n woe boo diɛ kun ni, a n mɔnaa lɛ boe a yɔrɔ lɛ yǎa a soo doe. Bɛ̀ á soo, Dɛnaa dín mɛnɛn kɔ la, a n bɛn pii Izirayeli nɛnyaanan lɛn manɛ. 35Izirayeli nɛnyaanan lɛn man nə́ goã yii, mà Muizu yɔrɔ n tɛ pii. A n wusii doo kəni, a mɔnaa lɛ kɔ a yɔrɔ lɛ, yǎa a wusoo a wo boo da ka Lawa-n biikoo kɔsɔ doe.
Kɔn yɛ ka Lawa nɛ ǹ kion lɛ a doe
Currently Selected:
Bɔ bɛ̀rɛbaa nɛ 34: SCE2013
Highlight
Share
Copy
Want to have your highlights saved across all your devices? Sign up or sign in
San Catholic Edition Bible © Bible Society of Burkina Faso, 2013.
