Bɔ bɛ̀rɛbaa nɛ 36

1«Besaleli ni, Oholiabu ni ka dí doɛ̃ wolen mɛnɛn tumaa bɛ́, Dɛnaa din sii-doɛ̃ laanka màn-doɛ̃ kɔ ǹ la, mà ǹ Kion sonbore kɛ lɛ a sii yɔrɔ bɔ, ǹ na a din tumaa nya, bɛn lɛn man die Dɛnaa a di-kɔn kɛn lɛn tumaa nyɛɛ.»

2Muizu lɛ dia Besaleli la ka Oholiabu ni, ka minin kɛn lɛn tumaa nɛ, Dɛnaa sii-doɛ̃ kɔ ǹ la. Ǹ tumaa nɛ, ǹ nə́ n dinin kɔ dín kɛn lɛn lɛa. 3Izirayeli nɛnyaanan nə mànan mɛnɛn bɔ, Kion sonbore lɛ a dín kɛn nyɛɛ a lɛa, ǹ nə́ bɛn tumaa si Muizu li. Sɛnɛ, minin man tɔn die baraabaraa, mànan koe ka foo kɔɔ̃n nɛ. 4Bɛ lɛ nɛ, dí doɛ̃ wolen kɛn lɛn dín lɛn nyɛɛ, bɛn tumaa nə́ n gɔn bɔ ǹ nya ǹ dín ganaa gogoon. 5Ǹ nə́ pɛ Muizu ni: «Dɛnaa din dín mɛnɛn pɛ, mà wɔ ǹ nya, zaman lɛ n die ka màn nɛ, á liɛ bɛa dńn kɛn lɛn manɛ.» 6Muizu pɛ, mà minin nə bɔ giã ǹ bǎã lɛ nɛ ǹ pɛ: «Giĩn laanka lɔn, ka Kion sonbore kɛ lɛ a dí nya ǹ mànan boe lɛ doa.» Zaman lɛ màn lɛ a bɔ lɛ doa. 7A màn mɛn bɔ, bɛ tɛ kɔ, á kion lɛ a dí nyɛɛ boe. A gialakun din tá goɛ̃ dinin.

Kion lɛ boo

8Dí doɛ̃ wole taãn-taãnan kɛn, bɛn nə́ kion lɛ zɛnaa ka mɔnaa gɔn fù ni, zɛnaa-n ka mɔnaa guguru sonbore ne, foɛ̃-n ka gɛ̀sɛ korebore ne, ka a tã nɛ, ka a tã zenzen ne. Ǹ nə́ lon màn yiikoonaan nyínin zɛnaa ǹ ganaa sɔnbɔraanɛ. 9Mɔnaa gɔn goon a sasabaa n gùrù yii fuəwenkiwisi, a pəməbaa n gùrù yii sii. Ǹ tumaa dɔ a zɔɔ̃ n goon. 10Ǹ nə́ mɔnaa gɔn lɛ a sooro kaa kun ǹ nə́ ǹ kũ kɔn ganaa. Sooro kɔsɔ kɛ dɔ, ǹ nə́ bɛn dɔn kaa kun, ǹ nə́ ǹ kũ kɔn ganaa. 11Ǹ nə́ gɛ̀sɛ pɛnɛ kɔn koreboredɛnaa dɔ mɔnaa gɔn bibinaa kɛ lɛ lɛ, a kaa kun lɛ lɛkoro-a. Ǹ nə́ kɔsɔ dɔ dɔ mɔnaa gɔnɔn kaa kun goon kɛ lɛ a mɔnaa gɔn nyɔɔbaa kɛ lɛ. 12Ǹ nə́ gɛ̀sɛ pɛnɛ kɔn posooro dɔ mɔnaa gɔn bibinaa lɛ lɛ, ǹ nə́ posooro dɔ mɔnaa kaa kun paabaa ǹ wɔ kɛ lɛ dɔ a mɔnaa gɔn nyɔɔbaa kɛ lɛ. Ǹ nə́ toa gɛ̀sɛn lɛn nə́ goã kɔn a peperebaa la. 13Ǹ nə́ kara posooro zɛnaa ka sana nɛ, ǹ nə́ mɔnaa gɔnɔn lɛn doa kɔn ka bɛa karan kɛn lɛn nɛ, ǹ nə́ mɔnaa kion lɛ kũ ni, á goã kɔn.

14Bɛ kio, ǹ nə́ mɔnaa gɔnɔn zɛnaa ka bòe ka nɛ, ǹ nə́ bɛn baa Kion lɛ a kala lɛa. Ǹ nə́ zɛnaa mɔnaa gɔn fulugoon. 15Goon a sasabaa n gùrù yii pɔsɔɔ, a pəməbaa n gùrù yii sii. Ǹ fulugoon lɛ tumaa a zɔɔ̃ n goon. 16Ǹ nə́ mɔnaa gɔn sooro nimi kɔn ǹ gɔrɔn, bɛ kio, ǹ nə́ sɔrɔ nimi kɔn ǹ gɔrɔn. 17Ǹ nə́ gɛ̀sɛ pɛnɛ kɔn posooro dɔ mɔnaa gɔn bibinaa kɛ lɛ, mɔnaa gɔnɔn kaa kun wɔ a nyɔɔbaa kɛ lɛ, ǹ nə́ gɛ̀sɛ pɛnɛ kɔn posooro dɔ dɔ mɔnaa gɔnɔn nimi kɔn paabaa ǹ wɔ kɛ dɔ a mɔnaa gɔn nyɔɔbaa lɛ. 18Ǹ nə́ kara posooro zɛnaa ka zan tã nɛ, ǹ nə́ kion lɛ kũ kɔn nɛ. 19Ǹ nə́ kɔmalɛ ǹ wɔ zɛnaa kion lɛ wɔ lɛa ka sère gɔ̀lɔ̀ kin ni, ǹ nə́ wɔ màn tã li, ǹ nə́ kɔmalɛ ǹ wɔ kɔsɔ dɔ zɛnaa ka don siĩ ki kəkə ni, bɛ goã a lalan.

20Bɛ kio, ǹ nə́ Kion lɛ a doa ǹ bàlàn zɛnaa ka kaasia gɔnɔn nɛ, ǹ nə́ ǹ zumu. 21Kion lɛ a doa ǹ bàlà gogoonmaa a sasabaa n gùrù yii fù, a pəməbaa n gùrù yii goon ka talɛɛ. 22Wɔkɔnlɛ ǹ lɛ màn paa goã bàlà gogoonmaa ganaa, ǹ nə́ kɔn para li. Ǹ nə́ Kion lɛ a doa ǹ bàlàn lɛn tumaa zɛnaa bɛa yɔrɔ kɛ lɛ la. 23Ǹ nə́ bɛa kion doa ǹ bàlàn kɛn lɛn fuə zɛnaa Kion lɛ a gusin a lɛ̀gɔn la ganaa. 24Ǹ nə́ giãmala ǹ màn pusi zɛnaa ka wɔrɔgiala nɛ, bɛa bàlà fuə kɛ lɛ giulun, giãmala ǹ màn màn papaa bàlà gogoonmaa giulun, ǹ wɔkɔnlɛ ǹ lɛ màn paa lɛ a lɛa. 25Kion lɛ a paǹ goon kɛ li dia-n woe gɔsɛ a lɛ̀gɔn la, doa ǹ bàlà fuə goã, 26ka ǹ giãmala ǹ màn pusi kɛ nɛ, zɛnaa-n ka wɔrɔgiala nɛ, giãmala ǹ màn màn papaa n bàlà gogoonmaa giulun. 27Kion lɛ gɔ́ɔ̃ wɔ a paǹ ke, dia-n woe lɛ̀nyɛɛn la, ǹ nə́ doa ǹ bàlà sɔrɔ zɛnaa bɛ wɔ lɛa. 28Ǹ nə́ bàlà màn paa dɔ zɛnaa a tɔ-a kion gɔ́ɔ̃ gùrù wɔkɔnlɛ ǹ wɔn lɛa. 29Ǹ giala na á goã boe-n kɔn tán, sɛnɛ, ǹ lɛwɔn nə́ woo wɔ kɔn lɛ lon kaaran lɛ a bibinaa kɛ nɛ. Maǹ nə́ zɛnaa miɛ̃ ka bɛa doa ǹ bàlà kaka màn paa kɛ lɛ nɛ. 30Doa ǹ bàlà kiwisi na á yɛ walan kəni, ka ǹ giãmala ǹ mànan nɛ, zɛnaa-n ka wɔrɔgiala nɛ. Giãmala ǹ màn fulusɔrɔ, màn papaa bàlà gogoonmaa giulun.

31Bɛ kio, ǹ nə́ kerekaã ǹ bàlàn zɛnaa ka kaasia gɔn nɛ: sooro n kion lɛ a paǹ bibinaa kɛa bàlà wɔn lɛa, 32sooro dɔ n kion lɛ a paǹ paabaa ǹ wɔ kɛ wɔn lɛa. Kion lɛ a paǹ mɛn bɛ́ dia-n woe lɛ̀nyɛɛn la, kion lɛ gɔ́ɔ̃ ke, sooro n bɛ dɔ a bàlàn wɔn lɛa. 33Kerekaã ǹ bàlà mɛn bɛ́ kion doa ǹ bàlàn kɛn lɛn lon laanka tán bii ni, ǹ nə́ bɛ zɛnaa á bɔ kion lɛ lɛ goon ganaa yǎa goon kɛ dɔ ganaa. 34Ǹ nə́ sana kaa bàlàn lɛn la. Ǹ nə́ ǹ kaaranan zɛnaa ka sana nɛ, kerekaã ǹ bàlàn kɛn lɛn wɔ ǹ bǎãn lɛa, ǹ nə́ sana kaa kerekaã ǹ bàlàn lɛn dɔn la.

35Bɛ kio doo, ǹ nə́ mɔnaa zɛnaa ka mɔnaa guguru sonbore ne, foɛ̃-n ka gɛ̀sɛ korebore ne, a tã nɛ, ka a tã zenzen ne. Ǹ nə́ lon màn yiikoonaan nyínin zɛnaa a ganaa nyaǹan lɛa. 36Ǹ ná a lɔɔ ǹ bàlàn zɛnaa màn sii ka kaasia gɔn nɛ, ǹ nə́ sana kaa ǹ la, ǹ karan nə́ sana lɛa. Ǹ nə́ wɔrɔgiala yo, ǹ nə́ ǹ giãmala ǹ màn zɛnaa nɛ, màn sii.

37Bɛ kio doo kəni, ǹ nə́ mɔnaa kɔsɔ zɛnaa Kion lɛ a kiɛnlɛ wɔ lɛa. Ǹ nə́ zɛnaa, foɛ̃-n ka mɔnaa guguru sonbore ne, a tã nɛ, ka a tã zenzen ne, a dí doɛ̃ wolen nə́ nya sɔnbɔraanɛ. 38Bɛa kiɛnlɛ mɔnaa lɛ a lɔɔ ǹ bàlàn màn sooro, ka ǹ karan nɛ, ka ǹ mìin ni, ka ǹ kiɛn kɛn nɛ, ǹ nə́ sana kaa ǹ la. Ǹ giãmala ǹ mànan man sooro, zan tã lɛa.

Currently Selected:

Bɔ bɛ̀rɛbaa nɛ 36: SCE2013

Highlight

Copy