Éxodo 23

Allin justiciata ruwanapaq leykunamanta

1Aman llullakuspaqa runamasiykipa contranpiqa rimankichu. Aman mana allin ruwaq runakunawanqa acuerdopi haykunkichu, falso testigo kanaykipaqqa. 2Aman qanqa ashkallaña runakunapa mana allinkuna ruwasqankutaqa qatipakunkichu. Testigo kaspaykipas aman ashkallaña kaq runakunamanchu sayapakunki. Aswanmi mana piman sayapakuspa cheqaq kaqtapuni rimanki. 3Justiciata ruwaspaqa aman ni wakchakunamanpas sayapakunkichu, culpayoq kaqtinkuqa.

4Sichus huk torota otaq huk asnotapas chinkasqata tarinki chayqa, enemigoykipaña kaqtinpas aparapuyá. 5Sichus huk asnota rikunki llasallaña carganwan ñit'ichikushaqta chayqa, aman chay asnotaqa qawayllaqa qawankichu; aswanqa yanapaykuy sayarinanpaq, enemigoykiña dueñon kaqtinpas.

6Wakcha runa juezkunaman quejakuqtinqa, allin justiciata ruwaspayá chay problemantaqa arreglay. 7Runakunapa llullakuspa acusasqankunataqa aman chashkinkichu. Aman mana culpayoq inocente runataqa condenankichu wañunanpaqqa. Noqaqa culpayoq runakunataqa castigasaqpunin. 8Aman pakallapi qolqetaqa chashkikunkichu, huk runaman sayapakunaykipaqqa. Qolqe sonqo kayqa allin ruwaq justo runakunatapas pantachinmi. Saynallataqmi justo runapa rimasqantapas waqllichin.

9Aman forastero runataqa ñak'arichinkichishchu. Qankunapas Egipto *nacionpiqa forastero runakunan karankichis. Chayraykun yachankichis imaynas forastero kaytaqa.

Chakrata samachinamanta

10Soqta watan chakraykipiqa tarpunki. Hinaspan chay watakunapi chay chakrapa rurusqantapas cosechanki. 11Ichaqa qanchis kaq watapiqa samachinaykin chakraykitaqa, chay chakraykimanta llaqtamasiyki wakcha runakuna pallakuspa mikhunankupaq. Chaymanta puchuqkunatataqmi salqa animalkuna mikhunqaku. Saynallatataqmi uvas chakraykiwanpas hinallataq aceituna sach'aykikunawanpas ruwanayki.

12Soqta p'unchawmi llank'anayki. Ichaqa qanchis kaq p'unchawpitaqmi samanayki, saynapi toroykipas, asnoykipas samananpaq. Saynallataqmi wasiykipi naceq sirvienteyki runakunapas hinallataq wasiykipi forastero kaq runakunapas samananku, kallpata hap'inankupaq.

13Qankunaqa kay tukuy kamachisqaykunata kasukuychis. Aman huk falso dioskunamantaqa mañakunkichishchu; nitaqmi sutintapas rimankichishchu.

Watapi kinsantin hatun fiestakunamanta

(Ex 34.18-26; Dt 16.1-17)

14Watapin kinsa hatun fiestakunata noqapaq ruwanayki. 15Primer kaq fiestaqa *Mana Levadurayoq T'anta Fiestan kanqa. Chay fiestataqa kamachisqayman hinan *Abib killapi ruwanki. Chay killapin qankunaqa Egipto nacionmanta lloqsimurankichis. Chay fiestapiqa qanchis p'unchawmi mana levadurayoq t'antata mikhunki. Aman ni pipas mana ofrendantinqa noqamanqa ashuyamuwanqachu.

16Ishkay kaq fiestaqa Cosecha Qallariy Fiestan kanqa. Chay fiestataqa ruwanki tarpusqaykimanta primer kaq rurunkunata cosechayta qallarispan.

Kinsa kaq fiestaqa Cosecha Tukukuy Fiestan kanqa. Chay fiestataqa ruwanki wata tukukuytan tarpusqaykimanta cosechayta tukuruspa.

17Watapin chay kinsantin fiestakunapi llapallan qarikuna noqa Señor Diospa ñawpaqniyman ashuyamuwananku.

18Aman animalta wañuchispaqa yawarninwan kushkataqa levadurayoq t'antataqa ofrecewankichu. Aman chay wañuchisqayki animalpa wirantapas paqarisnintin p'unchawkamaqa waqaychankichu.

19Chakraykipi tarpusqaykimantaqa primer kaq allinnin rurusqantan noqa Señor Diosta yupaychawanayki wasiman apamunki.

Aman uña kapichataqa mamanpa lechenpiqa t'impuchinkichu.

Señor Dios angelninta mandamusqanmanta

20Noqa Señor Diosmi qanpa ñawpaqniykita angelniyta mandasaq, ñanninta riqtiyki cuidasunaykipaq, saynapi preparasqay lugarman chayachisunaykipaq. 21Qanqa chay angelpa nisqanta uyarispayá kasukuy. Aman paypa contranpiqa rebelakunkichu. Payqa noqapa rantiytan kashan. Hinaspapas noqan paymanqa atiyniyta qoni. Chaymi paypa contranpi hatariqtiykiqa, payqa mana perdonasunkichu. 22Ichaqa sichus cheqaqtapuni kasukunki, hinaspa tukuy ima kamachisqaykunaman hina ruwanki chayqa, noqan enemigoykipa enemigon kasaq. Hinallataqmi sichus pipas contraykipi kanqa chayqa, noqapas paykunapa contranpin kasaq. 23Noqa Señor Diospa angelniymi ñawpaqniykita rinqa. Hinaspan pusasunki amorreo runakunapa, heteo runakunapa, ferezeo runakunapa, cananeo runakunapa, heveo runakunapa hinallataq jebuseo runakunapa tiyasqan allpaman. Hinaspan noqaqa paykunata chinkachisaq. 24Aman paykunapa ruwasqantaqa qatipakunkichu. Paykunapa idolonkunapa ñawpaqninpiqa aman qonqorikunkichu nitaqmi yupaychankipashchu. Aswanmi idolonkutaqa llapallanta destruispa mana imaman tukuchinki. Saynallataqmi rumimanta ruwasqa estatuakunatapas lliwta destruinki. 25Noqa Señor Diosnillaykitan yupaychawanki. Noqan t'antaykitapas unuykitapas bendecisaq. Hinaspapas noqan ima onqoykunamantapas qankunataqa sanoyachisqaykichis. 26Tiyasqayki llaqtapi kaq warmikunaqa manan abortanqakuchu; nitaqmi qollori warmipas kanqachu. Hinaspapas noqaqa unay watatan kawsachisqaykichis.

27Noqa Señor Diosmi qanpa ñawpaqniykita risaq. Hinaspan chayasqayki llaqtakunapi runakunaman anchallaña manchakuyta sonqonkupi churasaq. Saynapin chay enemigoyki runakunaqa ñawpaqniykimanta ishkapakunqaku. 28Qanpa ñawpaqniykitan avispakunata mandasaq, heveo runakunata, cananeo runakunata, heteo runakunata atacanankupaq. Saynapin chay runakunaqa mancharikuymanta qanmanta ayqekunqaku. 29Ichaqa chay enemigoyki runakunataqa manan huk watallapichu ñawpaqniykimantaqa qarqosaq. Sichus huk watallapi qarqoyman chayqa, chay allpan purunyanman. Hinaspan salqa animalkunapas miraspa, dañota ruwasunkiman. 30Chay enemigoyki runakunataqa as-asllamantan qanpa ñawpaqniykimantaqa qarqosaq. Saynapin qankunapaqqa tiempo kanqa, ashkaman miranaykichispaq hinallataq chay allpatapas hap'ikunaykichispaq. 31Hinaspapas qankunaman qosqay *nación allpapa linderonkunaqa khayna señalasqa kashan: Puka Lamar Qochamanta qallarispa, asta filisteo runakunapa nacionninpi lamar qochakama hinallataq ch'inñeq desierto lugarmanta qallarispa, asta Éufrates sutiyoq mayukama. Hinaspapas qankunapa makiykichismanmi chay lugarkunapi tiyaq runakunataqa churasaq, ñawpaqniykichismanta qarqonaykichispaq.

32Chay runakunawanqa aman ni ima tratotapas ruwankichishchu. Nitaqmi falso diosninkutapas yupaychankichishchu. 33Hinaspapas qankunapa tiyasqaykichis allpapiqa aman paykunataqa tiyachinkichishchu. Sichus qankunapa tiyasqaykichis allpapi paykunata tiyanankupaq dejankichis chayqa, qankunapas paykunapa falso diosninkutan yupaychayta qallariwaqchis. Hinaspan noqapa contraypi huchallikuwaqchis, nispa.

Currently Selected:

Éxodo 23: QEAÑT

Highlight

Copy