Éxodo 24

Israelpa mirayninkuna Señor Diospa pacto ruwasqanta kasukunankupaq comprometekusqankumanta

1Señor Diosmi Moisesta khaynata niran:

—Noqapa kasqay orqoman wichamuy. Hinaspa pusarikamuy Aaronta, Nadabta, Abiuta hinallataq Israelpa miraynin runakunapa qanchis chunka liderninkunatawan ima. Hinaspa paykunaqa karullapi qonqorikuchunku. 2Ichaqa qan sapallaykin noqapa kasqaymanqa ashuykamuwanki. Pusamusqayki líder runakunaqa aman ashuyamuwanqakuchu nitaqmi llaqta runakunapas kay orqomanqa wichamunqakuchu, nispa.

3Chaymi Moisesqa runakunaman willaq riran. Hinaspan Señor Diospa tukuy nisqankunata hinallataq llapallan kamachisqankunatawan willaran. Hinaqtinmi runakunaqa llapallanku qapariranku khaynata:

—¡Señor Diospa tukuy kamachikusqankunataqa cumplisaqkun! nispanku.

4Hinaqtinmi Moisesqa Señor Diospa tukuy nisqankunata escribiran. Chaymantan paqarisnintin p'unchaw tutallamanta hatarispa, huk altarta ruwaran Sinaí nisqa orqo sikipi. Hinaspapas sayachillarantaqmi chunka ishkayniyoq rumikunatapas, Israelpa chunka ishkayniyoq *ayllunkunaman hina. 5Chaymantan Moisesqa Israelpa mirayninmanta jovenkunata mandaran, *sacrificio *ofrendata Señor Diosman ofrecemunankupaq. Chaymi paykunaqa animalkunata wañuchispa sacrificio ofrendata Señor Diospaq k'anaranku. Saynallataqmi hawkayaypi kawsanankupaqpas torillokunata ofreceranku. 6Hinaqtinmi Moisesqa animalkunapa yawarninta kushkanta posillokunaman hich'aran. Ichaqa huknin kaq kushkan yawartañataqmi altarpa hawanman ch'aqchuran. 7Hinaspan Moisesqa pacto ruwasqanku librota hap'ispa, llapallan runakuna uyarinanpaq leeran. Hinaqtinmi runakunaqa khaynata niranku:

—Noqaykuqa Señor Diospa tukuy niwasqankuta kasukuspan ruwasaqku, nispanku.

8Hinaqtinmi Moisesqa posillokunapi kaq yawarta hap'ispa Israelpa miraynin runakunaman ch'aqchuran. Hinaspan khaynata niran:

—Kay yawarqa Señor Dios noqanchiswan pactota ruwasqan señalmi. Kay pactotaqa kikin Señor Diosmi rimasqanman hina ruwaran, nispa.

9Chaymantan Moisesqa Sinaí orqoman wicharan Aaronwan, Nadabwan hinallataq Abiuwan, Israelpa mirayninmanta qanchis chunka liderkunapiwan. 10Chay Sinaí orqopin paykunaqa Israelpa Diosninta rikuranku. Sarusqan pampataqmi sumaq-sumaq k'ancharishaq cielo hinaraq kasqa, imaynan *zafiro rumimanta ruwasqa piso sumaqta k'ancharin chay hinaraq. 11Chaypin Israelpa mirayninmanta liderkunaqa Señor Diosta rikuranku. Ichaqa Señor Diosqa manan paykunataqa ni imanaranpashchu. Hinaspan paykunaqa (Diospa ñawpaqninpi) mikhuranku hinallataq tomaranku ima.

Sinaí orqopi Moisés kasqanmanta

12Señor Diosmi Moisesta khaynata niran:

—Wichamuy noqapa kasqay orqoman. Hinaspa chaypi suyaway. Noqan entregasqayki rumimanta tablakunata. Chay tablakunapin escribini leyniykunata hinallataq kamachikuykunatawan ima. Chaykunatan qanqa Israelpa miraynin runakunaman yachachinki, nispa.

13Hinaqtinmi Moisesqa ayudanten Josueypiwan Diospa kasqan orqoman wicharan. 14Ichaqa manaraq wichashaspanmi Moisesqa Israelpa mirayninmanta liderkunata khaynata niran:

—Kutimunaykukama kayllapi suyawashayku. Aaronwan hinallataq Hurwanmi qankunawan qepakunqaku. Sichus pipapas problemanku kaqtinqa, paykunamanmi rinkichis, saynapi chay problemaykichista arreglanankupaq, nispa.

15Saynata niruspanmi Moisesqa chay Sinaí orqoman wicharan. Hinaqtinmi chay orqotaqa phuyu tapaykuran. 16Saynallataqmi Señor Diospa k'anchayninpas chay Sinaí orqoman uraykamuran. Chay orqotaqa soqta p'unchawmi phuyu tapaykuran. Ichaqa qanchis kaq p'unchawpitaqmi Señor Diosqa phuyu ukhumanta Moisesta waqyamuran. 17Hinaqtinmi Israelpa miraynin runakunaqa Señor Diospa k'anchayninta chay orqopa puntanpi rikuranku. Chay k'anchayninqa karan imaynan orqotapas nina ruphashanman chay hinaraqmi. 18Hinaqtinmi Moisesqa phuyu ukhuman haykuspa, chay orqoman wicharan. Hinaspan Moisesqa tawa chunka p'unchaw hinallataq tawa chunka tuta ima, chay orqopi qepakuran.

Currently Selected:

Éxodo 24: QEAÑT

Highlight

Copy