Proverb 16
16
1Zom kapav fer bel-bel plan,
me LESEGNER ki ena dernie mo.
2Bann imin krwar ki zot pe bien azir;
me LESEGNER konn bien ki ena dan zot leker.
3Konfie LESEGNER to travay,
li pou realiz tou to proze.
4LESEGNER finn kre tou kiksoz pou enn rezon;
mem bann malfeter finn kre pou zot konn zizman.
5 LESEGNER deteste larogans;
bann arogan pou gagn zot pinision.
6Dimoun ki lwayal ek fidel, so bann pese pardone;
me si to respekte LESEGNER, to pou evit fer lemal.
7Si to manier viv fer LESEGNER plezir,
li fer to lennmi vinn to kamarad.
8Preferab to gagn enn ti-kas dan lonette,
ki gagn boukou kas dan fason malonet.
9Bann imin fer bann plan dan zot leker;
me LESEGNER ki deside seki pou arive.
10Si parol enn lerwa inspire par Bondie,
so zizman pou touletan korek.
11Balans onet ek mezir zis, zot pou LESEGNER;
li finn donn sak pwa so valer.
12Lerwa deteste kan dimoun fer lemal;
lazistis fer enn rwayom vinn pli for.
13Lerwa apresie bann koze onet;
li kontan dimoun ki koz laverite.
14Enn dimoun saz fer tou pou lerwa res kalm;
kan lerwa sap lor kal, lamor lor baz.
15Kan lerwa dan lazwa, lavi briye dan pei;
so bonte manifeste, kouma lapli ki rafresi.
16Rod lasazes plito ki lor;
swazir bon rezonnman plito ki larzan.
17Lespri eklere evit pran sime lemal;
kan to vey to manier viv, to prezerv to lavi.
18Lorgey amenn destriksion;
larogans amenn larwinn.
19Preferab enn lavi sinp parmi bann pov,
ki pran par dan rises mal-gagne bann orgeye.
20Pran bien kont seki finn montre twa, to pou konn sixe;
fer LESEGNER konfians, to pou ere.
21Dimoun ki ena lespri lasazes ena disernman;
pli li koz bon parol, pli lezot ekout li.
22Dimoun ki ena lasazes, li ena enn lasours lavi.
Bann bet pou tonbe ar zot prop betiz.
23Enn dimoun saz reflesi avan li koze;
so bann bon parol pou konvink lezot.
24Bann bon parol parey kouma dimiel;
li adousi lespri e li nouri lekor.
25Fer atansion! Ena sime ki paret bon,
me dan so bout, to kapav zwenn lamor.
26Kan enn travayer gagn fin, li bizin travay;
si li pa travay, so vant res vid.
27Move dimoun rod tou mwayin pou fer ditor;
zot parol kouma enn dife ki devor tou.
28Move lespri fann rimer pou lev lager;
palabrer met dibri ant bon kamarad.
29Dimoun violan anbet so prosin;
li kondir zot dan sime malsin.
30Atansion! Dimoun ki pez lizie konplot mesanste;
seki pez lalev manigans lemal.
31Enn long lavi, li enn rekonpans, enn kouronn laglwar;
sa, zis bann dimoun ki azir bien ki resevwar.
32Preferab ena pasians ki pouvwar.
Vomie to kontrol tomem ki to sey kontrol enn lavil.
33Ena get oroskop pou konn lavenir;
me zis LESEGNER ki desid tou.
Currently Selected:
Proverb 16: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.