Proverb 17
17
1Li meyer manz enn bout dipin sek dan trankilite,
ki enn festin dan enn lakaz ranpli ar dispit.
2Enn serviter intelizan ena plis merit ki enn eritie ki ena lespri volaz;
sa serviter la pou gagn enn par dan leritaz.
3Nou servi dife pou teste lor ek larzan;
zis LESEGNER ki kapav teste nou leker.
4Enn malfeter ekout koze malang;
enn manter ekout koze mansonz.
5Si to mepriz bann pov, pa bliye, to pe mepriz zot kreater osi;
ena pinision pou seki pran plezir dan soufrans lezot.
6Bann ti-zanfan fer fierte bann granparan;
bann paran fer loner zot zanfan.
7Li paret drol kan enn bet koz bon koze;
me li ankor pli drol kan enn dirizan koz ninport.
8Ena panse kan zot donn gous koumadir zot pe fer mazik;
zot krwar li enn lakle paspartou.
9Si to anvi dimoun kontan twa, pardonn zot erer;
si touletan to repros zot erer, to kapav dir bay-bay lamitie.
10Enn ti repros ena plis lefe lor enn dimoun saz,
ki san kout baton lor ledo enn bet.
11Move dimoun konn zis fer ninport.
Tansion! Mesaze lamor pou vinn tap so laport.
12Li preferab zwenn enn mama lours ki finn perdi so piti,
ki afront enn bet ki finn plonze dan so foli.
13Si to rann lemal pou lebien,
lemal zame pou kit to lakaz.
14Komansman enn dispit li kouma enn felir dan rezervwar;
aret li vit, sinon inondasion.
15 LESEGNER pa kontan kan fer inosan pey pou koupab,
e kan fer malfeter pas pou sin.
16Ki serti met larzan dan lame enn vantar? Pou li aste lasazes?
Non, bonsans mem li pena.
17Enn vre kamarad res fidel dan tou sirkonstans;
nou fami la pou partaz nou soufrans.
18Fode latet pa bon pou dibout garan,
e pou pey det ou prosin.
19Si to kontan sem diskord, to lavi pou dan dezord;
si to orgeye, to pou zwenn tase.
20Enn triser pa pou gagn valer;
enn manter pou tom dan maler.
21Paran ki gagn enn zanfan bet, li dan lapenn;
zanfan bet met paran dan tourman.
22Si lazwa dan leker, lasante pou meyer;
kan traka dan lespri, lekor deperi.
23Kan ziz pran gous,
lalwa vinn lous.
24Enn dimoun intelizan gard so regar lor lasazes;
enn dimoun bet gard so latet dan niaz.
25Zanfan bet met so papa dan lapenn;
li rann lavi so mama amer.
26Li pa bon kan fer inosan pey lamann;
li inzis kan met dimoun integ dan prizon.
27Dimoun ki pa koz boukou ena konesans;
dimoun ki gard so kalm ena lasirans.
28Mem enn bet ki gard silans pas pou enn saz;
kan li ferm labous, li pas pou enn gran malin.
Currently Selected:
Proverb 17: KMOTPOR
Highlight
Share
Copy
Want to have your highlights saved across all your devices? Sign up or sign in
Kreol Morisien OT Portions © Bible Society of Mauritius, 2020.